بكرمي الخاتوووووني الأسطوري ، سأسمح لكم بتصفح التي هي .. مدونتي
أرجو لكم وقتاً ممتعاً

الجمعة، 25 يوليو 2008

وكعة من الدرج، و تحليل للحدث..


اللي أعرفه إني بالعادة ما أوكع من الدرج، لكن في الفترة الخيرة (خلال اسبوعين) و كعت مرتين، شصاير بيَّ؟ ما أدري، ماذا جرى لي؟ هم ما أدري..


إيييييه


وين أيام زمان، أيام ما جنت مفتحة عشرة عشرة، أرى بالعين المجردة ما لا تراه أدق مجاهير سودة الحسودة و أسمع ما لا تسمعه أدق لاقطات صوت الحجية.
آني أدري أكو مؤامرة هدفها تثبيط عزائمي قبل ولائمي، خصوصاً بعدما ثبت للجميع قدراتي الهائلة في تنظيف الـ .. حمامات، حتى الوالدة (الله يخلي لي اياها) يوميا تصيح:
و لج شهالتنظيف هذا!!


طبعاً لازم تتعجب، فقد ولت أيام العز، أيام ما جان إلي غرفتي و لأختي غرفتها و كل وحدة عدها تلفون داخلي، و بيننا حايط واحد (حايط جبير للأمانة) و بين بابي و بابها ما يقارب الثلاثين سنتيمتراً، و أدك عليها التلفون و اكولها بكل رقة:

تعالي داده ده أسولف وياج شوية
فتجيبني همين بكل رقة:

إي هسة جاية خاتون
أما إذا هي خابرتني فقد اكتفي بالحديث الهاتفي لأن بيني و بينكم هم زحمة الواحد يطلع من غرفته..
بس هسة كل شي تغير، و ها أنا أحمل الماسحة و الوصلة (قصدي الوسلة) و أقوم بعملي و ابهر الأعداء.

.

.
بالنسبة للوكعة الأولى ما حسيت بيها، عادي وكعت على ظهري و كمت.. صحيح ورا فترة صرت معوقة ما اكدر احرك إيدي بس كولوا عدت على خيير.
أما الوكعة الثانية فقد صرخت فيها صرخة اهتز لها أرجاء المنزل. فهرعت هي و اخواتي، و شافتني أمي واكعة بالكاع
هاي شعندج كاعدة؟
ماما مو..
دي كومي كومي! خابصة الدنيا.. اللي يشوفج عباله واكعة من الدرج
بس امي آني..
يلا بلا بسبسة، بلا دلاعات! هاي كل واحد يكعد لازم يعيط، أشو كلنا نكعد يوميا ما حد بينا عيط
أمي.. إهيء إهيء
ها شكو؟
ماما بس آني وكعت من الدرج ميخالف تساعديني حتى اكوووم؟
أمي الظاهر عطفت عليَّ (مو اكولكم قلب الأم) فمدت لي إيدها حتى اكوم، و انصرفت هيَّ و أخواتي و عافوني..


أما آني، كعدت على إحدى الدرجات اتفحص الخسائر الجسدية اللي لحقت بي و ما انهزمت منها (بكيفي ما انهزم منها) و كنت أثناء ذلك ادردم ع الحجية و على سودة الحسودة:
كله من ورا الحجية و سودة الحسودة..
شبيها سودة الحسودة؟
لاحظت إنه قرب قدمي هناك قدمان بنفس الحجم تقريباً، فطلعت بنظري على فوق فإذا بالوجه المألوف ذو الرمش الملفوف، جفلت بمكاني:

لك هاي شدتسوي؟
الله يخليج كولي لي شبيها سودة الحسودة؟


أويلي! هذا الولد أدري بيه رح يهذري يعني أكيد يفلت لسانه كدامهم مما سيضعني في موقف محرج و يؤدي بالتالي إلى خربطة بريستيجي، و آني كله و لا بريستيجي.. لذلك قررت أن أثير موضوعاً يهتم له حسومي لينسى الموضوع بـرمته.. و (رمته) هذي هي أهم شي..
حسومي شوف آني وكعت من الدرج..
شهق حسومي
صدوووك؟!
إي شوف؟
ها يعني إنتي وكعتي من الدرج؟
إي
زين إنتي وكعتي من الدرج لو الدرج هوَّ اللي وكع عليج؟
بدينا فلسفة!
إنت شده تشوف أستاذ حسومي؟
ما ادري، الله يخليج خاتون كولي لي..
هوَّ آني وكعت من الدرج، فهوَّ وكع يعني..
وكع؟
هيجي شي
هيجي شي؟
و بعدين حسومي باوع ع الدرج، شافه أشو ما بيه شي..
بس اكولج هو أشو واكف، إنتي مو كلتي وكع؟

هنا وصل حدي، بدأت أشعر برغباتي و نزواتي المعتادة بارتكاب جريمة، بس شسوي؟ لازم أساير هذا النوع من الأسئلة في سبيل الستر و العافية، ماكو اهم من الستر و العافية (مو هيجي حجية سليمة؟؟)..
ها اكولج؟
أي مو هوَّ يمكن لما شافك وكف على حيله
و بعدين قربت راسي من حسومي: إنت تدري بهالشغلات أحسن مني.
أحسن منج؟ شغلات؟
في هذه النقطة من الحوار حسيت برغبة في قياس ضغطي.. أكييد ضغطي ارتفع، حسبي الله عليه و على أمه
حسومي.. روح جيب لي الجهاز مال ضغط
زين.. هوَّ وين موجود؟
بالمخزن الفوك
بالمخزن الفوك لو المطبخ الفوك؟؟
بهاي حسومي عنده حق، لأنه إحنا مرات نسميه المطبخ لأنه تصميمه مثل المطابخ و مرات مخزن لأنه إحنا مستخدميه مخزن..
المطبخ الفوك، هم نفس الشي يعني..
زين
بس حسومي راح على غرفة لا هيَّ مطبخ و لا هيَّ مخزن
حسومي المخزن الفووووك، هاي وين رايح؟
المخزن الفوووك لو المطبخ الفوووك؟
يا ربي هو شجان مسميه؟؟؟
المطبخ الفوك
جان أشو ينزل
هاي وين رايح؟
رايح ع المطبخ الـ..
لك هذا المطبخ الجوه، ده أكولك المطبخ الفوك، الفووووك!
بس لي هسة ما كلتي لي، هو المطبخ الفووك لو المخزن الفوك؟
هنا استسلمت للأمر الواقع و جنحت للسلام، لأن إذا هسة عندي ضغط فبعد دقائق حيصير بيَّ سكر
حسومي، ما أريد منك شي.. بس روح صيح أختي (هـ ، نـ)
هي وين موجودة؟
بالمطبخ
صعد حسومي
لك المطبخ، المطبخ الجوه مو الفووووك
ها إي صح!

فراح ع المطبخ (الجوه)، و صاح اختي..

صحيح اللي صاحها ما جانت (هـ ، نـ) و إنما (هـ ، أ) بس ما يهم، من راح حسومي ما حسيت إني بحاجة لقياس الضغط، و اكتشفت بعد قليل إنه آني اكدر أمشي!

هناك 12 تعليقًا:

هنــــــــد جمال Hind Jamal يقول...

مدونة بنكهة عراقية خالصة 100%
اشكرج خاتون الخاتونات على المدونة الجميلة......

*الخاتــــIraqi Ladyـــووون* يقول...
أزال المؤلف هذا التعليق.
Ali Yaseen يقول...

"تمت إزالة هذه الرسالة بواسطة المؤلف."
الظاهر جان التعليق كلش لطيف على هاي المدونة هههههههه

المهم زين متكليلي ليش حسومي كلما تكونين بحالة يرثى لها من الانزعاج والضوجة يطلع مثل الغراب؟ خوما حسومي يرمز الى شخصية حقيقية؟ ترة اسحب كلامي هااا

المهم شنو اخبار سودة الحسودة
اشو مختفية ترة والله اشتاقينالهة

غير معرف يقول...

مشكوره ياخاتووون على هل مغامره الغزيره بلشخصيات
.

.
تحياتي الج وانشالله اخر..........الوكعات
ياسر عوماد

Heart Rose يقول...

راااااااااائعه
رهيبه والله وقعت من الضحك
منين تجيج هالافكار؟؟
مبدعه على قولتهم عن جد
لا صدك حيل حلو
مو بس مدونه عراقيه .. روح عراقيه
حيل يعجبني اسلوبج
هذا اول موضوع اقراه
ضروري اسويلي فره عالمدونه ..
هسه سلامتج عالوقعه ؟؟ خوما اكو اثار ؟؟ تضحيات للحرب تعرفين عاد

و على فكره اني هم ارتفع ضغطي وياج على حسومي اويلي

اني الظاهر كل يوم رح اجيج .. حتى اذا اكون ضايجه تروح ضوجتي هنا

بس حبيت اقولج .. ( رائــــعــه للـــغايــه)

و عاشت ايدج

Heart Rose يقول...

اقولج عيني

احنا مو نكتب التعليق ,, تطلعلنا شغله مال ( تأكيد الكلمه )

شيليها رجاءا لان صدق عيوني تطلع و اني اكتب الحروف و بما اني كل يوم رح اجيج فباخر الشهر اخاف انعمي


^_^ بلا زحمه عليج ..

Ali Yaseen يقول...

حجية اشو شكلج صدك واكعة من الدرج وصايرة جيس مال عظام.....
لأنه ما داخلة ولا رادة على التعليقات عسى المانع خير

*الخاتــــIraqi Ladyـــووون* يقول...

ألوووو الخاتون تنادي حوول..
جنت رايحة للعين يومين و جيتكم، خاف عبالكم ناسيتكم..
بس جديات فرحتوني لما إجيت هيجي بعد يومين و كلت هسة ألكى بس أبو الحسن معلق.. اكتشفت إنه الأمة كلها معلقة و ياسر عووماد من مدونات مكتوب شخصياً معلق، آني ده أحس بالكشخة.
هاي الله جبر بخاطري بعد الوكعة (مو أكولكم دعوة المظلوم).
و يا هارت روز، من عيووني أشيلج هاي مال الكلمة بس خل اعرف شلون الواحد يشيلها

تقبلوا تحياتي

*الخاتــــIraqi Ladyـــووون* يقول...

أبو الحسن هم كلهم يرمزون لشخصيات حقيقية، حتى حسومي.. و اطمنك سودة الحسودة أحسن من عندنا، ما عدها وقت ملتهية تشتغل و تحضر تعويذاتها و خططها اللئيمة، و إن شاء الله سلامك واصل.

غير معرف يقول...

ههههههههه حلوة كلش تسلم إيدج

هاي صار مرتين أقراها ومتت ضحك تجنن وطبعا مادام حسومي بالموضوع لازم تطلع حلوة ..

وابو الحسن تره التعليق المحذوف مالتي لأن اني وخاتون نكتب من نفس الكومبيوتر فآني كتبت تعليق ونسيت أطلع من حسابها فصار التعليق بإسمها جان انصدمت ومسحته اول ما نزل

وطبعا التعليق الي كتبته جان كلش لطيف ههههه ,,, هل عندك شك ؟


اطيب تحية ...


رابعة العدوية

Ali Yaseen يقول...

هههههههههههههههههههه على كولة خاتون افحمتيني

يللة ان شاء الله نشوفج بمدونة خاصة بيج واذا لم اذكر هذا سابقا فساذكره الان (ترة المدونات بلاش والله يعني حتى ايجار ماكو الهة) فافتحيلج مدونة وخلي نسويهة ظلمة عليهم ذولاك اهل المدونات الانكليزية


ها خاتون ترة هارت روز راح تجي ويانة بس مدا اعرف شلون ادزلهة دعوة هههههههههههههههههههه

*الخاتــــIraqi Ladyـــووون* يقول...

مممم ، آني هم ما أدري شلون الواحد يدز دعوة.. بس رح أبحبش و أشوف.