إمتحان الآيلتس.. و يوم القيامة!

عاجبني اليوم أسولف لكم على الإمتحان مالي اللي سهرت علموده الليالي، و انشغلت بيه أيام، و حفظت يمكن مئات المفردات مال إنكليزي..
يعني يمكن عمري ما تعبت بامتحان بكد ما تعبت بالآيلتس، مو بس تعب قراية و هيجي، بس التفكير، يعني شهرين من التوتر، مقالات علمية على مفردات أكاديمية على الإصغاء على الإستخلاص من القطعة و و و ..

و جمالة الأستاذ بدال ما يطمنا يخوفنا
يخوفني.. إهيء إهيء

خلال الدراسة، جان يدربنا الأستاذ على الإجابة عن كل سؤال خلال وقت محدد، يعني القراءة مثلاً 40 دقيقة، و الكتابة 20، و الإصغاء 30 و هكذا، و جان كلش صعب على معظم الطلاب إنه يلحكون ع الوقت، و آني منهم..
فخلاني هالشي قلقة، كل شوية أفز من نومي، و شفت أحلام و منامات
فد حلم منهم علساس آني بالقاعة مال الإمتحان، و القاعة جانت كلش حلوة (و هذا عكس الواقع كما سيأتي لاحقاً)، و بيها أشجار و نباتات و طيور، و الأوراق مال الأسئلة هيجي مثل القصص مال أطفال، لمن فتحتها لكيت هيجي منظر طبيعي و ورد تخبل و طارت منه فراشات تجنن، و الكتابة تملخ.. ياي!
و جان السؤال يكول: أنظر إلى المربع الفارغ في الصفحة، أمامك دقيقتين لقراءة السؤال! أشو انتظرت دقيقتين جان تطلع من المربع هيجي ورود و طار عصفورين و نبع السؤال.. حدثتني نفسي : "هذولة الإنكليز من صدك فيكة"
بس شنو السؤال؟ فزيت من النوم و طار السؤال.. حرامات!!
هاي لازم الأستاذ جان يعرف شدا أحلم.. شكيد شرير
المهم.. لا أخفيكم فرفشتي و نعنشتي، و كلت هاي هي، شكلي حتونس بالقاعة، و خل أروح و أدرس بدون ما يظل بالي و أقلق
رحت على الكتب حتى أقرا، و لكن فجأة و آني ماشية... خطرت ببالي خاطرة مفزعة
خاطرة بدأت تبعدني عن أوراق الدراسة في الوقت الذي كنت أحاول فيه أن أقترب من أوراق الدراسة..
و كلما أمسك أوراق الدراسة تجي و تشوشني و تزيدني رعباً على رعبتي، و خرعةً على خرعتي!
الخاطرة ببساطة.. يوم القيامة
إذا آني هسة هالكد خايفة من الإمتحان، لعد يوم القياسة شحسوي؟!

هاي أولها أمتحان الآيلتس، و الثانية يوم القيامة.. إنتوا شايفين الأستاذ شكيد شرير؟

و بدأت أتخيل الموقف الذي سيسقط فيه (ماء وجهي) أمطاراً، و سيؤدي لخربطة شنيعة لبريستيجي
بدأت الذنوب و المقالب اللي سويتها بحياتي كلها تظهر أمامي

فسودة الحسودة يوم القيامة رح تكتشف الطراقات اللي خليت حسون و الوِلد الوياه يشعلوها يم بيتها مما أدى لهرب بعض الحيوانات (الأليفة) و هرولتهم في أنحاء الشعبية
و أم هزيبر رح تكتشف إنه آني اللي قنعت الزرقاوي (تتذكروه؟) يختل ببيتها، مما أدى لمشاكل مع قوات الأمن و الشرطة
و أم رسول رح تكتشف إنه آني اللي كلت عليها ناصبية، و إنه آني المصورة اللي جانت تطك صور للحسين و العباس و تسربها للـ (عامة)
و عبودي رح يكتشف إنه آني السبب في تطفيش الغيرل فريند ماله و توبتها بعد أن حدثتها عن الموت وعذاب الآخرة(عرفت هذا عندي رؤيتي لها و هي تركض بالشارع و تصيح: "عاااااا إلحكوا لي، مخبلة تريد تموتني، عااا" و طبعاً خيتكم مو هينة.. يعني فهمت ما بين السطور!)
و سوسو رح تكتشف الأغراض المدسوسة لدراستي الحثيثة للغة الإنكليزية (رغبتي في التفلسف مثلها)
و سنيوة.. عااااا حتموتني موتة اللخ
ونوسااا حتكتشف النوايا الغير سليمة لما جنت أمكيج بيها و أدعي بأنها تشبه سندريلا، قصدي سندريلاااااا
و حسومي.. لا حسومي يراد له عشر ملائكة يفهموه يعني شنو يوم القيامة، فتجي سنيوة تضربه ضربة رجل واحد يفتهم بعدها شنو جانوا يقصدون..
أما الحجية.. حتروح تؤكد للناس الواكفين بالسره الوراني (خاف واحد بيهم ما سمع زين) إنَّ كل ما سمعوه كان صحيحاً و تضيف بأنه جان عدها سبق صحفي لكنها تكتمت رأفةً بحالي و منعاً من الوقوف بطريق نصيبي (على حد قولها)

ياللهول!

المهم قريت إمتحاني، و رحت من وكت الصبح، و أشوفلكم القاعة مال الإمتحان، بالضبط تشبه السجون، بس سجون ترتيب أوربي و (أو لالا) للأمانة، بالله عدينا لهم إياها
بس يجيبوا لي سجانات، قصدي يجيبوا لي مراقبات بهذا الحجم؟ و يا عيني على الملابس.. يا عيني ع اللي مستخسرين هذي الكتل اللحمية المسماة بـ (الكروش) أن لا تسحر أنظار الممتحنين!
بالله عوفونا من الريجيم و فوائد الريجيم، و عوفونا من الدين يأمر بالستر
هسة اللي أجسامهن مرتبة.. افتهمنا ليش لابسين ضيق
لكن اللي أجسامهم من الطراز اللي شفته يوم الإمتحان.. ليش لابسين ضيق؟؟ شديفرجونا بالضبط؟
هاي طبعاً عدا عن أخطاء في اختيار الملابس الملائمة و الألوان الملائمة، و كل الجرائم الشنيعة في عالم الأناقة..
كل هذا أشعرني بوجود حرارة من النوع الحار في رأسي، اصطدمت بالبرودة الشديدة للمكان و التي تسببت في انطفاء الحرارة اللي كلت لكم عليها، لأحس بعدها إنه آني تقريباً ثلجت من البرد

و عندما شفت إنه ورقة الأسئلة ما تشبه قصص الأطفال.. هنا أيها السادة، أدركت إنه آني ما رح أتونس بالقاعة..

الإمتحان طوَّل حوالي 3 ساعات
إهيء إهيء ..3 ساعات و هذولة الشريرين اللي لابسين هدوم شتوية يجمدون بينا، لكن الحمد لله آني قهرتهم كلهم و جاوبت زين، أو أتصور هيجي
أما بعد الإمتحان، فقد انطلقنا خارج القاعة و أول ما فعلناه آني و صديقاتي إنه رحنا ع الشمس، مو أقصد سافرنا ع الشمس، فالحكومة مانعة السفر إلى هناك، بس قصدي طلعنا بره.. و تدفينا.. الحمد لله كلشي عدى على خير، و إن شاء الله النتيجة تطلع زينة يااا رب

و يا رب، النتيجة يوم القيامة هم تطلع زينة إلي و لكل من يقرا مدونتي و كل العراقيين و المسلمين ياااا رب

تقبلوا تحياتي

جايتكم قريباً

أول شي السلام عليكم و رحمة الله و بركاته

يعني أدري هم حتكولون: خاتون يمعودة هاي وينج؟
هاي طبعاً إذا ظل بيكم أحد ليهسة يدخل للمدونة.. لأن مدونتي حالياً صايرة حديقة..
بس ما أدري يعني المشكلة إنه الكتابة يراد لها شوية مخ صافي و طقوس (كالتي يقوم بها حسومي كلما صار وقت الغداء) و آني أعترف بألم عميق بأنه حياتي مخربطة و يراد لها تنظيم، يعني لو آني أنظم وقتي من زمان جان هسة آني مستمرة وياكم من زمان، بس ما أدري ليش ما أنظم وكتي..تنظيم الوقت ضرووووري.
يعني باختصار بريستيجي هالفترة متخربط..
كاعد أدرس الآيلتس، و هذا بعيد عنكم مو بس صعب .. و مو بس كلش صعب
يشوي شوي!
امتحاني يوم السبت، آني وميتين واحد.. يا يابه!
أكولهم شنو يوم الحشر؟ إعدام جماعي؟

الله يعين كل واحد عنده مثل مشكلتي، و هسة إن شاء الله بالعطلة رح ترجع الخاتون و تذب رمانات..
و اللي يكول عني ناصبيه.. آني أكوله إنت ناصبي، زين؟
يلا كافي حجي لازم أروح أقرا

تقبلوا تحياتي الحارة

مخلوقات خطيرة!

ياي، أول مرة أكتشف بأني مخلوق خطير!
فبعد الفيروسات، و أسامة بن لادن و أيمن الظواهري و أحمدي نجاد و كل من هم موجودون على قوائم الخطر، ظهرت الخاتووون
فقد ورد إسمي ضمن قائمة الخونة اللي قرر تصفيتهم بتهمة التهجم على آل البيت، و بتهمة إني ناصبية!
هذا ضمن التهديد اللي وصل لمنظمة كتاب من أجل الحرية.. طبعاً هم مسوين (قص و لصق) لأسماء الكتاب دون التفريق بين كاتب و آخر و دون تقديم الحجة، و يمكن ما منتبهين أصلاً على إسمي..

لالالا، آني هيجي زعلت عليكم، و إنتوا ما تدرون لما ازعل عليكم شيصير!
آني بس أريد أسأل هذوله اللي يهددون، جربتوا تتحاورون ويا اللي كاعد تهددوهم؟ ليش ما تحجون وياهم بدل ما تقتلون و تسفكون الدماء؟
بس كولولي إنتوا، صار لنا ست سنين نتكاتل بيناتنا شحصلنا؟ و إنتوا شحصلتوا؟ ليش ما أي واحد عنده أي اعتراض يصير رجال و يحجي هنا، على الطاولة المستديرة؟

و بما إنه ما عندي طاولة مستديرة، فتعالوا نحجي على المدونة المستديرة،و ليثبت بالحجة إنه الخاتون أو أي أحد من الكتاب تهجم على طائفة أو على شخصية؟
يعني قابل بس إنتوا تعرفون تشيلون سلاح و تكتلون بالعالم؟ ليش آني ما اعرف؟ طبعاً ما اعرف يمممه!

آني بالنسبة إليَّ أنتقد أي شي أشوفه غلط، ما عليَّ جان من شيعي لو سني لو كوردي .. أو عوربي، و آني مو مع طائفة ضد طائفة و لا (أناصب) أحداً العداء، فعدوي هو عدو وطني و أبناءه مهما كانت أعراقهم و مذاهبهم..

ما اكول غير الله يهديكم و يطيب خاطركم يا رب.

بما إننا نحجي عن المخلوقات الخطيرة... شفتوا بالله مرض انفلونزا الخنازير؟؟
هو صحيح لا يرى بالعين المجردة، بس آني قصدي سمعتوا شديصير و شكيد ديموتون ناس؟
اللهم لطفك يا رب
آني الصراحة خايفة يوصل المرض هنا خصوصاً إنه هنا مجتمع منفتح على كل الجنسيات..
طبعاً مو بس آني خايفة، الكل هنا عنده نفس المخاوف، و حتى سودة الحسودة هم خايفة، فهي تخشى على الخنازير من أن يساء لها بسبب الإنفلونزا، و ظلت تراقب بقلق عميق ردة فعلي تجاه أي خنزير قد يفكر إنه يمر بالشعبية..
و بدأت سودة الحسودة تناشد أبناء الشعبية بتسمية الفيروس بأتش ون أن ون (على الله يكون الإملاء صحيح) و إنتوا ما تعرفون شلون سودة الحسودة تناشد، من هاي المناشدات اللي تخلي الواحد ما ينام بالليل..

هاي سودة ما ادري.. بطرانة لو تتفلسف، لو خلصت المشاكل ببيتهم و جاية علينا إحنا.
ما ادري سودة الحسودة شوكت تعوفنا بحالنا و تلتهي بروحها
و طبعاً حسومي و نوساااا هم عدهم مخاوف
خاتون؟
ها
هو انفلونزا الخنازير سموها ع الخنازير؟ لو الخنازير سموها ع الانفلونزا..؟
.....
ها اكولج؟
....
ها اكولج؟
.....
خاتون أكولج..؟
أي حسومي سمعت سؤالك لا تظل تلح
زين لعد إذا سمعتي سؤالي ليش ما ده تجاوبين؟ يعني إنتي هسة ما تكدرين تجاوبين؟

أهووو ، شنو هالأسئلة المحرجة؟ يصير هالشكل؟
يعني إذا أكوله ما اكدر أجاوبك، هسة عباله آني من صدك... ما اكدر اجاوبه
و ستسقط صورتي اللميعة من نظر حسومي.. و آني عندي كله إلا تسقط صورتي اللميعة من نظر حسومي
فلازم أشغل مخي حتى ألكى له من هاي الأجوبة المبهرة، لمزيد من اللميع في صورتي الخاتونية بنظر حسومي

حسومي هو شنو جان سؤالك؟
ها سؤالي؟ يا سؤال؟ ها أي أي سؤالي؟ اممم ممم، هاي الانفلو..ونزا مال خنازير
أيييي؟؟
يعني هي ليش سموها على الخنازير؟ ما ادري سموا الخنازير عليها.. ليش ها؟

هو سؤاله للأمانة لو خله عيوني تنحول، لو عيوني خلت السؤال ينحول، واحد منهم، يلا نبدي تأليف:

شوف حسومي، هو الخنازير سموها على إسم الانفلونزا، و الانفلونزا طبعاً أصلها عربي جاية من (أنف) معناها خشم، و (لوا) معناها إنه هي تضوج الخشم فتلويه، و (نزا) يعني هيجي تنز، تضوج من نوع الصوت مال الواحد يتغير.. زين؟ فالخنزير لأنه هم هيجي صوته عبالك منشول، فيعني من هيجي ... سموه خنزير.
استطعت أن أرى نظرة الذهول على وجه حسومي، فتنفست الصعداء
هنا تدخلت نوساااا:
خاتون، بس هم كالوا بالتلفزيون إنه هي فيـ.. فيرس
فيروس؟
أي، فسلون هي فيرس و خنزير بنفس الوكت؟
شفتوا نوسااا و ذكاء نوسااااا؟
حيااااتي إنتي شنو هالذكاء، حلوة و بوبااا( يعني حبوباااا) و ذكياااا!
نوسة ضحكت بخجل و باوعنا اثنينا على حسومي، أشوف بلكي أي ردة فعل تطلع من عنده و آني كاعد أمدح نوسة، بس الولد كالعادة ما اعرف وجهه من كفاه، ما ادري نوسة قصدي نوسااااا راكضه وراه على شنو..

شوفي هو إذ ربما، الفيروس هذا من يباوعوه بالمجهر بيه شبه من الخنزير، يعني طبعاً لأنه طالع من الخنازير فلازم يكون بيه شبه..
زين خاتون هو ينتقل لما واحد ياكل لحم خنزير؟
هو يعني ناس تكول أي ينتقل و ناس تكول لا.. بس إنتي عموماً حاولي تبتعدين عن لحم الخنازير هالفترة!

ياي شفتوا شلون ده أستنتج معلومات خطيرة؟
أولاً الانفلونزا طلعت كلمة عربية، فاستنتجب بعدين إنه وسائل الإعلام الغربية تتقصد أن تسميها (فلو)
و ثانياً منظمة الصحة العالمية و بالتعاون مع سودة الحسودة يريدون تغيير تسمية الفيروس إلى التسمية العلمية إتش ون أن ون خشية الإساءة للخنازير
زين بس تساؤلات بريئة يعني..
شمعنى لما صارت انفلونزا الطيور ما غيروا الإسم خشية الإساءة للطيور
و لما صار جنون البقر ما غيروا الإسم خشية الإساءة للبقر
و لما صارت الجمرة الخبيثة ما غيروا الإسم خشية الإساءة للـ .. للجمر

رغم البقر مقدس عند الهنودس، و الجمر يحلو للبعض أن يمشي عليه في الهند و الله اعلم وين، شمعنى الخنازير لأنه محرمة عند المسلمين يعني؟
إذا جان هذا السبب فمعناها من صدك بعدنا مهمين و أكو ناس خايفة من عدنا و حاسبة حسابنه!
ياااي، ما أدري ليش اشعر بلسعة و كهربة لذيذة لما هيجي أفكر..

استنتجت بالنهاية إنه إحنا كلنا مخلوقات خطيرة!

مذكرة اعتقال بحق حسووون

آني حكتب هالبوست وادري ماحد حيعبرني، أدري الكل ملتهي بالأزمة العالمية مالته و التفنيش، الله يعيننا جميعاً يا رب..
بس ما ادري ليش عاجبني تقرون و لو حتى مجاملة، و يا رب أكدر و لو شوية أخليكم تبتسموون
ما ده أعرف هالشعبية هذي يوميا يطلع بيها مودة شكل..
هالأيام مثلاً، تقوم سودة الحسودة بحملة واسعة النطاق للدفاع عن البزازين ضد القهر و الدكتاتورية في هذه الشعبية و في كل الشعبيات الأخرى، و بدأت تفتر على البيوت و الدواوين تلقي المحاضرات في حقوق البزون و حريته في العيش و الخلفه و الأكل و النوم و التغوط.. كان ذلك عقب اهتمام مفاجيء و بلا مقدمات بقضية البزونة العرجة و ما سبب إنها عرجة، و هل انضربت بوري لو وكعت ببلوعة لو جتي لوري سايقها سكران سحك رجل المكرودة، لازم أكو سبب..

كان رد فعل نسوان الشعبية الغربية تفاعل واسع و نقاشات عديدة و اجتماعات لا تحصى، تمخضت عن تعليق لافتات من قبيل

(حرروا البزون)
(دعوا البزازين تعيش)
(من حق البزازين علينا أن تأكل الطعام)
(عش حياتك و لا تنسى البزون)
و غيرها..
أما رد فعل نسوان الشعبية الشرقية (اللي آني عايشة بيها) هو تفاعل أيضاً منقطم النظير، و صارت محاضرات البزون حديث كل دربونة و كل بيت و كل غرفة، أما آني كالعادة كاعدة مستمعة:
شفتي سودة الحسودة شلابسة بالمحاضرة؟ هدومها تجنن هيجي (دارك كولور) و (هاي ويست)
أي عفية، لو تسريحة شعرها، نص مشسور و نص محروك، من صدك حلو، حسويها بعرس بنت عمي"
يمعودين منيلها حلوة تلعب النفس، يعني شنو هدوم سودة عبالك رايحة تعدد
لا بالعكس هيجي شكلها مال سهرة تخبل، إنتي شفهمج بالمودة؟ إنتي أصلاً لما طلعت مودة الطاسة ما لبستيها
شنو عيوني؟؟ إسمعي عاد، آني بالمودة أفهم منج و من أمج افتهمتي لو لا؟؟
شنو شنو شنو؟ إنتي تفهميني؟
شنو شنو شنو (ده تعيب على هنيوة) أي يلا بالله ذبي لج فد جلمتين ثانية، مو إنتي ما ادري شمطول لسانج هاليومين، يراد له كص!!
هلو؟! د يلا عيوني كصي ده اشوف!

و لكم أن تتخيلوا منظر سوسو النازوكية و هي تفاكك بين سنيوة و هنيوة..

من صدك إحنا شعبية مخابيل، بالله نسوان الغربية لو يشوفونا هسة شحيكولون خخخخخخ

أما آني فكابلت البزونة العرجة أراقبها و هي تقلب الزبالة بحثاً عن بعض الطعام و حاطة إيدي على خدي، بالله كل هالبلاوي تسويها البزونة العرجة؟؟ الظاهر فعلاً جنا مباوعيلها بعين الصغيرة..
يعني هالبزونة هاي صار لها شكيد بالشعبية و طول النهار تفتر، بالحر و الرطوبة و المطر و البرد، لا احد جاب لها شوية أكل، وداها للبيطري، ما حد حتى يتعب نفسه يسألها شبيج (حسومي سألها مرة شبيج، جان تكوله: ميوو!)
و ما لاحظت هالإهتمام من سودة الحسودة طول هذيج المدة، بالعكس..
يعني آني شخصياً مرة شفت سودة الحسودة لما داست على المرحومين أم و أبو البزونة، و يومها للأمانة حيل انقهرت (إهيء إهيء) ، و قدمت سودة الحسودة بعد مدة اعتذار مقتضب للعرجة مصرحةً بأنَّ السبب هو (شقة ثكيل) من قبل أم البزونة أيدها فيه أبو البزونة المذكورة تجاه أحد خنافس أبنها المدلل أبو الليل..

طبعاً حالياً أدخلت سودة الحسودة طرف جديد في القصة، هذا الطرف هو ... حسون
حيث أصدرت بالتعاون مع نسوان الغربية مذكرة اعتقال بحق حسون، متهمة إياه بالمشاركة بقتل أم البزونة العرجة و أبوها!!
آني للأمانة جنت شايفة حسون المكرود و هو يلعب بباب الحوش أثناء عملية قتل أم و أبو البزونة، بس شنو تهمته؟ و شلون شارك بقتلهم؟ الظاهر أكو فد فصل من القصة لازم آني مضيعته

خاتون، عوفيها عليَّ!
يمعودة حجية شحتسوين؟
لازم أكو سر، ليش البزونة العرجة؟؟ و ليش يعتقلون حسون؟ أكيد اكو فد شي.. فد شي إحنا ما شايفيه!
زين و شحتسويين؟
مو ده أكول عوفيها عليَّ؟ أبو المثل يكول: إنطي الخبز للخباز

صفنا آني و حسومي ع المثل مال الحجية، و جنا تقريباً فاكين حلوكنا.
كنت أحاول في ذهني إيجاد أي رابط بين البزونة العرجة و الخبز اللي حننطيه للخباز، أما حسومي فقد قاطع تساؤلاتي قائلاً:
خاتون؟
ها
هو الخباز مو نفسه اللي يسوي الخبز؟
أي
زين إذا هو يعرف يسوي خبز، إحنا زين ليش ننطيه الخبز؟
لا مو هاي لما يكون مخلص الخبز، ماكو؟ يعني لما يخبز للعالم و ما يظل عنده فإحنا لازم ننطيه
هاااااا فمن هييييجيي، لعد آني من أكبر يوميا أنطيه
أي عفية عليك حسومي..

المهم، و بعيداً عن أمثال الحجية اللي تبط الكلب و تتعب الأعصاب، أعدت الحجية عدتها، و استعدت للتجسس على مختبر سودة الحسودة، أخذت على عاتقها تحمل المشاق و المخاطر، و لكنها عادت بعد مدة و عبايتها مشككه، و فوطتها متخربطة، و نعالها الله أعلم وين (هي بالعادة تنساه بعد ممارسة مهامها)

و الصراحة، جان مما لا شك فيه إنه شكلها تعبان:
ها حجية، شصاير؟ شنو الأخبار؟
ها؟
أكول شنو الأخبار ما طلع وياج شي؟
باوعت بوجهي شوية و عوجت حلكها:
إمشي إمشي إمشي، يلا عاد!!
هاي شنو ليش هيجي تحاجيني؟
إمشي إمشي، يلا عوفوني بحالي ما يجي منكم غير القهر و البهذلة..
و مضت إلى غرفتها و هي تدردم بزعل

مو جني ترزلت؟؟ (إهيء إهيء)
بس للحق أقول يا جماعة، الحجية من صدك خطية، يوميا تمارس مهامها بدقة و احترافية عالية، و تحاول جهدها أن تقدم لنا الشائعات اللي توها طالعة من التنور، و لكن علاوةً على إنها لا تلقى أي شكر من الجوارين فهي تلقى أحياناً بعض المتاعب التي لا يستهان بها، الله يعينج حجية..
يعني هسة باختصار، راحت علينا..
لكن آني يا عيني الخاتووون ،لا أعرف اليأس، منو اليأس؟
قررت أتبع طرق حسومي في استنباط المعلومة، شلت الورقة و القلم و قررت إجراء تحقيق صحفي مع شخصية مهمة:
لماذا الإهتمام الكبير في هذه الأيام بقضية البزونة العرجة؟؟
...........
هممم، و لماذا تعتقل سودة الحسودة حسون تحديداً في هذه القضية؟؟
............ ميووو!!

فضفضة (بيني و بينكم)

ها قد جاءت الخاتون ببوست جديد، بوست تحفة، بوست مو مثل أي بوست
بما إنّ الخاتون بدأت بتكريس سياسة التعريب فخلوني أستبدل عبارة (بوست) بعبارة (تدوينة)..

يمكن هواية منكم يتساءل بحيرة: شنو هالعنوان الفطير؟ و عن ماذا جاءت الخاتوون تتحدث؟
و جني أسمع أحد يكول: أهو هاي هم كاعد تتعزز علينا و تغيب و تخلينا نكول وينها و مرة تتحجج بالدراسة و مرة ما أدري بشنو
هو فعلاً آني أشو صايرة هواية أتعزز و هذي ظاهرة جديدة قد يكون لها تأثير سلبي مستقبلي فيدرالي على بريستيجي (ماء وجهي)
ماء وجهي!!
هو ظل بوجهي ماي؟ هو الواحد يوميا يشوف هالبلاوي يظل بوجهه ماي ؟ حتى كلاص الماء هم ما يظل..
آآخ لو بس تدرون خيتكم شكيد تعاني، الله شاهد أكتب و امسح دمووع... حتى ما عارفة شاكتب أريد بس أكتب أطلع هالــ ..... هالحصرة ، هالخنقكة اللي حاسة بيها، حاسة..... جبااااااااال على قلبي..
ما أدري....
هاي شصاير بالدنيا؟؟ ليش هيجي الدنيا ما حلوة و الناس مو حلوين؟
ليش ما حد راضي يعوف أحد بحاله؟
ليش حتى الناس اللي الواحد ما عنده شي وياهم مستعدين يعادوه بأول فرصة؟
ليش الناس تكول كلام و تسوي غير الكلام اللي تكوله؟
ليش الإنسان اللي ما بينك و بينه شي ينتهز أي موقف حتى يأذيك في سبيل يطلع هو عنده شخصية و فاهم؟؟
ليش أكو ناس يفهمون سكوتك عن تصرفاتهم و أذيتهم ضعف، و ما يتركوا لك خيار غير تنطيهم العين الحمرة؟؟ ليش بس اريد أفتهم ليييييييش؟
كل شي جنت شايفته حلو تغير، لا عمري عرفت أكره و لا أحقد، بالعكس جنت أحب كل الناس..
آني تعبت، أحس ما ظل بيَّ لا حيل و.... و لا شي

أدري ضوجتكم ويايه و كاتبه كلام بلا معنى، بس ما ادري هيجي جا على بالي أكتب و كتبت...

كله إلا هاي!!

بعد ضغوط إقليمية و دولية و تهديدات مغرضة و هدفها لئيم.. قررت أتصدق عليكم بهاي المقالة
هوهوهوه

طبعاً كلنا شايفين شديصير بغزة، و يمكن أكثر ناس تكدر تحس بشعورهم هم إحنا العراقيين، باعتبار مرينا بنفس الظروف
و هذا ربما يفسر سلوكي (يعني بصفتي عراقية) و آني لازكة بالتلفزيون أنظر نظرة حالمة إلى صور الضحايا، و أتذكر أيام القصف الأمريكي على العراق، و أقول بنبرة حالمة (أيضاً):
أخيراً اقترب أشقاءنا الفلسطينيين أن ينالوا الحوورية و الديمووقراطية مثلنا!
و ابتسمت بعدها تلك الإبتسامة التي لا يمكن أن أوصفها إلكم، بس هي تشبه الإبتسامة التي تظهر على وجوه (البعض) بعدما يتفوهوا بكلام مشابه..
لكن حسومي طول عمره واكف لي مثل الغراب، و لازم يفسد علي أحلام اليقظة:
ها؟ شنو؟
باوعت بوجهه و هو فاك حلكه ببراءة:
ها؟
إنتي مو هسة كلتي فد شي؟ لو إنتي هسة ما كلتي فد شي؟
و إنت شنو؟ أكول فد شي لو ما أكول شعليك إنت؟
لا الله عليج كولي ليييي
لا هيج ماكو شي..
لعد ليش جنتي ده تكولين فد شي؟
آني؟ شكلت زين؟
ما ادري.. يمكن.. جنتي لو كاعد تحجين ويا التلفزيون، لو يمكن كاعد تحجين ويا روحج..
زين و شجنت أكول؟
ده تكولين الفلسطينيين.. رح يصير عدهم حرية و ديمقراطية مثلنا
زين مو هياتك طلعت تعرف آني شجنت أكول، على شنو السؤال؟!
هياتني؟؟
ثم تحمس حسومي و هو يتوصل لبعض الحقائق الخطيرة:
هااااا هياتني، يعني قصدج آني جيت، يعني آني موجود بس إنتي ما جنتي تعرفين؟ بس بعدين إنتي عرفتي؟.. يعني بعدين إنتي..
لك حسومي خلص شتريد مني هسة؟؟
آني؟ شريد؟ نسيت شريد أكولج يا ربي شنو أريد أكولج؟
همممم أي بالله؟ إذا ماعدك شي خليني أخلص الأخبار
ها أي، تذكرت.. يمكن يعني..
أي؟
ليش هم الإسرائيليين يريدون ينطون لفلسطين حرية و ديمقراطية؟
شوف هم ما كالوا صراحة، بس هم أكيد رح ينطوهم حورية و ديموقراطية..
ليش ينطوهم؟
بكيفهم
هنا تعصب حسومي: لالالا ما يصير هيجي!
شنو المايصير؟
يعني ده يقصفوهم يوميا، و هم جمالة ينطوهم حرية و ديموقراطية؟!
هنا بدأت اخاف على حسومي من النزعات الإرهابية التي ممكن أن تظهر على أي شخص فيه دم عربي، فبدأت في عملية تهدئة و ضبط النفس (مو خريطة طريق لأنه هاي شغل سودة الحسودة مو شغلي)
حسومي حبيبي هم ما كالوا هيجي، بس آني ده أكولك يمكن
شنو يمكن؟ مو بكيفهم!
لعد بكيف منو؟
ها؟ صدك بكيف منو؟ ما ادري .. بس المهم مو بكيفهم، عننننن (حسومي يزمجر غيظاً)
ده تشوفون حسومي شون معصب؟ بدا يكول كلام جبير لا افهم معانية، و آني صافنة على حلكة، ففي هذه اللحظات أيها السادة أكتشف إن حلكه.. جبير، جبير، كلللش جبير!
وسعت عيناي و أنا أراقب حلك حسومي، عموماً هو الموضوع طول و حسومي حجى هواية، مما يؤدي لإقلاق راحتي الخاتونية و آني كله و لا راحتي الخاتونية.

فسحبت الريموت كونترول و قلبت على قناة سبيس توون
و ربتت على ذراع حسومي لأواسيه:
يلا حسومي ميخالف، هي الدنيا هيجي شنسوي
حسومي في محاولة لمقاومة منظر الكارتون
أي بس.. آني يعني تره بعدني متعصب
صدك، زين يلا حبيبي ما تسوه تعصب، أعصابك أهم شي!
زين..
و هدأ حسومي رأساً!

و هكذا ترك حسومي مراجعة امتحاناته و دروسه المهمة و فك حلكه كدام الكارتون، و يبقى إنتوا لازم تدعوا له ينجح،
مو بالله؟
هذا شغلكم إنتوا تدعوا له ينجح!!

مودة!!

ها قد أتت الخاتون بعد طول الغياب

بعيد عنكم تسممت و ضعفت لي جم كيلو

أكيد أحد بيكم حط عيونه الخضر عليَّ و حسدني، و عموماً اشكره

هذا أحسن مرض ممكن يمر علي في المرحلة الراهنة

ما علينا نرجع لموضوعنا

كنت على وشك إني أروح للسوك آني و أختي علمود نشتري شغلة هدوم و هيجي، فإذا بنوسة تركض وراية:

خاتون خاتون خاتووون!
ها نوسة؟
إنتي حتروحين للسوك؟
إي
عفية أخذي نوساا، نوسة اليوم عاجبها تروح للسوك..
يلا كولي لها لماما و آني انتظرج بالسيارة
و بعد قليل عادت نوسة و صعدت بالسيارة:
نوسة حتروح للسوك
و مدت إيدها علمود تنطيني فلوس من أمها علمود خاف يعجبها شي، يالسخرية القدر، آني الخاتووون آخذ فلوس من نوسة؟ و مو من جيبي؟

اللي هو( يعني) من جيب أبوية؟

شنو هالخربطة المرعبة لبريستيجي؟

جان لازم ابوية يحوسم، جان لازم يحوسم!

أو جان يخليني آني أحوسم.
بس هو ما يسمع كلام و يصر على كوني زعطوطة و ما افتهم شي.

إي بس نوسة لازم تكعد عاقلة و ما تسوي وكاحة زين؟
نوسة حتكعد عاقلة و ما تسوي وكاحااا
ثم ابتسمت ابتسامتها العريضة التي تصر بأنَّ لها قدرات هائلة على حرق الأعداء و لا أدري ماذا تعني بذلك (مو مهم أعرف، آني رح أجنح للسلام و الله يستر)

و هكذا بدأت أتنقل في جنتي الدنيوية (محل الملابس) أختار و أرهم و تدرون عاد لما اختار و أرهم شلون يشتغل تركيزي العقلاني، و لكن نوسة كلساع عاجبها شي و تريد تجرب شي مما يؤدي لتشوش تركيزي، و آني كله و لا تركيزي..
فخطرت في بالي فكرة ممكن تفيد في هذه المواقف..

و حتى تفهمون فكرتها اسمعوا هالقصة
حدث مرة إني جنت نازلة من السطح بعد ما شريت الهدوم، جنت ضايجة و زهكانة و روحي واصلة لخشمي (تدرون الجو هنا شلون مزعج)، و حطيت الطاسة على راسي، فسودة الحسودة شافتني نازلة من الدرج جان تشيل الطاسة شوية عن وجهي و كالت في بهجة:

الله خاتون! شنو هالجمال؟! طالعة مثل الفنانة رشيقة أم خدود..
سودة.. تره روحي طالعة و مالي خلك الشقة مالج
و حطيت الطاسة مرة لخ على وجهي و اكملت طريقي نزولاً.
بكيفج، بس آني ده أكولج الطاسة على راسج هذي كلش لايكة لج.
إي إي، احجي لج وياهم .
لكن بعد لحظات فكرت بالحجي مالها
الله! يعني معقولة آني طالعة مثل الفنانة القديرة رشيقة أم خدود و هي شايلة طاسة الهدوم في أغنية آه و تلات ارباع؟!
رجعت على سودة:
جديات سودة؟ يعني آني صدك الطاسة.. لايكة لي؟؟
إي طبعاً، ما تصدكيني؟
و من يومها قررت إنه طاسة الهدوم هذي لازم أحطها على طووول.
و هكذا بدأت كل نسوان و بنات الشعبية بدءاً بسوسو و انتهاءً بأم حسومي يقلدون مودة الطاسة اللي على الراس و اللي ما تلبس الطاسة صارت مودة عتيكة..
المهم هسة ما أريد أحجي لكم قصص و ننسى الموضوع الأصلي اللي هو موضوع تشويش نوسة على تركيزي العقلاني.
آني لازم أستخدم نفس السووتراتيجية ويا نوسة:
نوسة عمري، شنو رأيج تكعدين عاقلة و آني عندي مفاجأة إلج
ابتهجت نوسة
خاتون حتسوي لنوسة مفاجآااااا؟؟
أي، خاتون حتسوي مفاجأة لنوسة..
و سكتت لفترة و هي تتبعني
يولي نوسة إنتي سكيد عاقلااا؟؟
حنبدي بالتلقين الممل
يولي نوسة شكيد إنتي عاقلااااا
يولي نوسةإنتي سكيد بوبااااا ؟؟
يولي نوسة إنتي سكيد بوباااا ..
بوبة هنا معناها (حبوبة)

للأمانة هي حجيها لو أكولكم اياه مثل ما هيَّ تلفظه جان كل شي ما افتهمتوا ( حتى إسمها الأصلي تره نوشة مو نوسااا)
يولي نوسة إنتي سكيد..
نوسة يمعودة، خلينا نعرف دربنا..
أوه، نوسة تكول عفو
و كالعادة، مع ابتسامة بريئة مرعبة

بديت أدور و ابحبش بالهدوم و بعدما يئست كالعادة من إيجاد شيء ملائم، قررت أن أنفذ المفاجأة اللي آني محضرتها لنوسااا.
أخذت بعض الأغراض لها و دخلتها لغرفة القياس، كانت تلبس تنورة قصيرة حمرة و تي شيرت كات أحمر، و حذاء أحمر، فآني أخذت لها سترة خضرة و جواريب طويلة زركة، و بحبشت بجنطتي بلكي اكو مكياج منا منا، حطيت لنوسة حمرة زركا علمود بلون الجواريب و آي شادو أحمر بلون الهدوم، و شادو مال خدود أخضر بلون السترة (قصدي الستراا):
ها نوسة؟ شنو رأيج؟؟
باوعت نوسة صورتها بالمراية و ابتهجت:
الله! نوسة طلعت حلوة كلس!
طبعاً عمري، نوسة أحلى من سندريلا
يولي نوسة إنتي أحلى من سندريلاااا؟؟
يولي نوسة إنتي أحلى من سندريلا..
خاتون، بس مو هو سوية مخربت؟
لا حياتي، إنتي لازم هيجي تطلعين ما تشبهين أحد..
حسومي يحب نوسة و هيَّ حاتة مكياج؟
طبعاً ، أكيد يحب نوسة و هي حاتة مكياج..

طلعت من غرفة القياس، و لكيت جم وحدة واكفة فمن شافوا نوسة انفتحت حلوكهم و عيونهم (جانت وحدة بيهم فلبينية، يعني عيونها كانت على وشك تنشك)
و الكل جان يحدق بنوسة و مكياج نوسة، بدا على نوسة القلق:
خاتون، أسو الناس كلهم ده يباعون عليااا
طبعاً عمري غير معجبين بيج؟؟
و سمعنا أحدى الغيورات تقول بغيرة:
لك هاي شو عاملة بإختاااا؟؟
نوسة دغتني: سوفي خاتون، حجوا عليااااا، أوووووه (الطريقة المبتكرة بالبكاء)
لا حبيبتي لا تديرين بال، هسة إنتي أختي؟
لا
شفتي؟ معناها ما حد حجا عليج..
.
.
عبالكم حشيل هم شلون أقنع أمها، قصدي.. أمهاااا

هنيوة؟؟

المرة بالبداية عبالها قشمرت على بنتها، و لكن بعد إقناعها بدأت هي الآخرى باتباع مودة نوساااا

..

هسة منو بيكم مقتنع بمودة نوسة و منو بيكم يريد أقنعه؟