بكرمي الخاتوووووني الأسطوري ، سأسمح لكم بتصفح التي هي .. مدونتي
أرجو لكم وقتاً ممتعاً

الأربعاء، 30 يوليو، 2008

عبودي و إجازة السووق (مستوحاة من قصة حقيقية)

أخذ عبودي مؤخراً إجازة السوق و اشترى سيارة جديدة بالتقسيط، فجان متحلف إنه يضرب المدن طولاً و عرضاً و ارتفاعاً و يفر أصدقاءه مهدي و ميثو و كل الشلة الزعطوطية بالسيارة ليمارسوا هوايتهم المفضلة : معاكسة النسوان..
فمثل ما تدروون.. معاكسة النسوان هي سبيلهم الأسرع و الأوضح لسماع أسماء كل أنواع الحيوانات المفضلة لديهم. استمتعت شلة الزعاطيط و تونست، و استمر هذا حتى كسروا على إحدى الآنسات، و لا بدَّ إنَّ حظهم العاثر قادهم إليها، أو إنَّ سودة الحسودة حطت بيهم عينها.
فقد توحشت هذه الآنسة و لاحقتهم بسرعة جنونية (يعني مال مخابيل).. و همّ جانوا بالبداية متونسين، لكن بعد فترة زعلوا و بدت عليهم علامات القلق.
عبر عبودي ما لا يعبر و فعل ما لا يفعل، و لكن بعد أن طالت المطاردة أحسَّ عبودي و شلته إنَّ الموضوع صار جديات، و هم رغم قلة خبرتهم إلا انهم يستوعبون جيداً قول الحجية: "إذا تريد تهين رجال هد عليه مرة" و هذه (المرة) يبدو واضحاً إنها من النوع الذي لسانها أطول منها، حتفهمون هالفقرة لما تكملوون..

مثل ما كلت، ظل عبودي المسكين يفتر و يفتر إلى أن داخ و جاله انهيار عصبي (كلش عصبي) و بعدما يأس تماماً من أنها ممكن تتركه، أوقف سيارته في منطقة معزولة منعاً للفضيحة كدام الناس، و شجعه أصدقاءه على النزول :
يلا روينا شحتسوي بيها، نريدك تدوخها و تاخذ لنا رقمها
دي شوفني هسة شحسوي لك بيها، حاخذ لك رقمها و رقم صديقاتها!
و نزل عبودي من السيارة.
و الآنسة هم نزلت من السيارة
.
.
و ظلَّ عبودي يراقب شبحها الأسود و هو يشق الظلام حتى ظهرت شابة لابسة.. هدوم، طلع عبودي بنظره إلى فوووق، فلاحظ إنها حسنة الوجه، بلع ريقه:
هـ .. هلاو، با لحلو ، شلونج؟
.....
أشو هاي ما تجاوب؟
أكول ما دام لعبنا شويونه، شنو رأيج نتعرف؟؟ آني عبودي و أدرس إعلام
و مدَّ يده للمصافحة، و لكنها لم تفعل.. ظلت عيني الآنسة مثبتة على عينيه بتحدٍّ
ما تصافحين؟عادي.. مو لازم..
و ارجع يده بارتباك
إنتي شسمج؟
.......
ما عندج إسم؟ زين تدرسين؟ تشتغلين؟
.......
و لا شي؟ زين إنتي من وين؟
.......
ما تدرين من وين
.....
إنتي يمكن عراقية، لأن هيجي حلوة و بيج دم عراقي.
........
أشو.. ما تحجين؟ ما معلميكم تحجون ببلدكم لو شنو؟
......
زين عندج رقم؟ أكول حتى نتونس آني وياج شوية و نسولف..
......
ها؟ ما عندج رقم؟ زين رقم صديقة؟ ما عندج رقم صديقة؟
......
ما عندج رقم صديقة، زين رقم كرايبج؟؟
.....
زين أي رقم؟ ماكو رقم؟
......
ماكو إيميل؟
.......
لاحظ عبودي إنَّ شعر الآنسة شوية متخربط
أكولج تره شعرج شوية متخربط
و اشار إلى مكان الخربطة، فعافت الآنسة عبودي و التهت تعدل تسريحتها، و أخيراً نطقت بالعبارة التالية:
هيجي زين؟
أحسَّ عبودي بارتياح و برغبة في الضحك
كيف نسي القاعدة 432 و التي تنص على إن النسوان كله و لا بريستيجهم؟؟ (هاي تاليها عبودي مو يوميا أعلم بييك)
إي هيجي زين
و تردد قبل أن يضيف: يا زين.

فنظرت إليه بحدة ثانية..
قصدي هيجي، زين حلو يعني.. احم
......
ها؟ هسة ما رح تنطيني الرقم ؟
.......
بكيفج، بس هذا رقمي إذا تحبين..

و بشعور باليأس و الإحباط، مدَّ عبودي إليها رقمه إلا إنها لم تمد يدها، و هذه الحركة كانت هي القشة التي كسرت ظهر البعير (قصدي كسرت ظهر عبودي):
إسمعي عاد، مو عبالج آني ميت عليج، آني هسة أي بنية بالشارع بس أسوي لها هيجي تركض عليَّ ركض
لا؟!
إي خاف عبالج يعني، و بعدين إنتي اللي جنتي تلحكيني و تتحارشين بي مو آني...

و قبل أن يكمل كلامه تلقى لكمةً على وجهه طرحته أرضاً ، و مرغته بالرمل، ثمَّ أطلقت الآنسة ضحكة قصيرة
يلا، باااي عبوتشي
و استدارت ذاهبةً للسيارة
هل يا ترى عبودي سمع إسمه يلفظ بطريقة أخرى؟ عبوتشي عنده كلشي و لا يلفظ إسمه بطريقة أخرى!
إذا ترك الموضوع و عاد ادراجه فسيسخر أصدقاؤه منه و من ادراجه، بعد يا مرة يا بطيخ؟ إنتوا غير ما تعرفوه لعبوتشي؟
.
.
غضبٌ عبوتشي لحد الهياج، فبدأ بشحذ قدراته المكنونة و قدراته الهائلة (اللي الله كدره عليه)، ثمَّ ركض عبوتشي كالثور الهائج باتجاه الآنسة، و هذا ما يذكرني بالأغنية الشهيرة (بوم بوحة بوم بوحة بوحة بوحة إييييه)
ما كاد يصل إليها حتى استدارت إليه و بدآ عراكاً ، ثار النقع بينهما و ارتفع، و الشلة الزعطوطية
تراقب الموقف بقلق، و لم يتجرأ أي أحد منهم أن يطلب من الطرفين التهدئة و ضبط النفس..
بعد أن انقشع الغبار، ظهرت الآنسة و هي حاطة رجلها على عبودي:
ها عبوتشي شلونك هسة؟
إمشي ولي من فوكاية!!
لوت الآنسة يد عبودي: عليمن ولي ها؟ عليمن ولي؟
أطلق عبوتشي صرخة ألم
عليمن ولي؟
مو عليج مو عليييج، بس وخري حتكسرين إيدي !
إي عبالي..
ثم تركته مرمياً على الأرض و عدلت نفسها و .. تسريحتها
باااي عبوتشي
و ركبت بالسيارة و راحت..
فنهض عبودي بصعوبة من الأرض و مشى مترنحاً إلى السيارة، و نظر بوجوه أصدقاءه و استطاع قراءة الوجوم فيها، صحيح هو انقهر لأنهم خذلوه بس هو تفهم موقفهم (مو أكولكم عبوتشي متفهم)، و أراد أن يزيل التوتر:
شحلاة البنية لما تكون كوية!
فضحك هو على تلك النكتة، ثم ضحك أصدقاؤه على تلك النكتة، و آني هم ضحكت على تلك النكتة (خخخخخ)

يلا لا تنقهر عبووتشي، إنت أصلاً يومها ما جنت مسلح.

مو يابة؟ ما جان مسلح!

هناك 25 تعليقًا:

poor iraqi يقول...

هههههههه
حلوه خاتون حلوه
عندج موهبة بكتابة سيناريو موقف محدد
وعجبني الموقف عبالك دا اشوف فلم اكشن كوميدي
ههههههههه

بس عندي سؤال انتي كاتبه اللوكيشن مالتج بغداد , وتكوللين انو موقع اللادينيين العرب محظور يمكم بالامارات
اشلون اريد افتهم ؟؟؟؟؟

عبوتشي ههههه

*الخاتــــIraqi Ladyـــووون* يقول...

يا هلا بالبووور عراقي، و أضحك الله سنك (ادري تضوج من هالعبارة بس آني مرات خبيثة خخخخ)
إنت لو قريت ملفي و آني دا أوصف نفسي، تلاحظ إنه آني كايلة إنه إقامتي بالإمارات .. بس حطيت اللوكيشن مالي بالعراق لأنه آني أريد الزوار مالي بالدرجة الأولى يكونون عراقيين..

عموماً أكو مواقع و مدونات مال اللادينيين هم محظورة بس آني اطلع الصفحات المخبئة، يطلع بس صفحة وحدة و ما اكدر افتح الصفحات البقية..

عموماً يا بوور عراقي، تكدر تكولي شنو الموضوع اللي تريدني أشوفه تحديداً و آني أدور بيه ان شاء الله (قصدي إن شاء.. أي واحد يعني)

تقبل تحياتي

poor iraqi يقول...
أزال المؤلف هذا التعليق.
*الخاتــــIraqi Ladyـــووون* يقول...

هااا هسة افتهمت، مو بصراحة حتى العلمانيين و الليبراليين صاروا مختلف الأفكار و الموديلات و الواحد عاد لازم يفتهم، فاعذر تفكيري المتواضع..
بصراحة آني من حجيت هسة أشو آني هم دخت..

و ما دام تحب الكتابة يا هلا بيك بأي وقت يا بوور عراقي و يا ريت تزورني دائماً.

poor iraqi يقول...
أزال أحد مشرفي المدونة هذا التعليق.
*الخاتــــIraqi Ladyـــووون* يقول...

شوف بوور عراقي، آني عاد اسمح لي اصير دكتاتورية و أحذف تعليقك، آسفة بس آني ما اعرف منو زوار مدونتي و أخاف عليهم يتأثرون بأفكارك..
و رح أرد عليك بمدونتك ماشي؟؟

تقبل تحياتي.

*الخاتــــIraqi Ladyـــووون* يقول...

و آني اعتذر منج يا هارت روز، آني ما جنت أريد مدونتي تصير مكان للتحدث في مثل هذي الأمور، بس يلا لا تزعلين حياتي و علقي على موضووووعي..

طائر الحب الحزين يقول...
أزال أحد مشرفي المدونة هذا التعليق.
طائر الحب الحزين يقول...

طبعا اول مرة اقرأ موضوع باللهجة العراقية ويعجبني ..
اهنيك يا خاتون ..فعلا عندك قدرة على كتابة سيناريوهات مثيرة ..
وما شاءالله كتابتك ملغومة مو بريئة ..وهاي يجعلها على قدر الهزل فيها فهي مدهشة بالنقد اللاذع..
اتمنى نقرأ المزيد ..وكنت اريد اطلب منك مساعده بخصوص مدونتي البسيطة بس ما لقيت بريدك حتى ارسل رسالة بطلبي عموما شكرا لمرورك الجميل بمدونتي واتمنى التواصل لو امكن مع تقديري واعتزازي بك..
طائر الحب الحزين
romance333@gmail.com

Abu Al-Hasan يقول...

خاتون انياول ما فتحت الكومبيوتر اليوم اتفاجات بان عندك تدوينة جديدة واللي فاجاني اكثر انه عندج سبع تعليقات ومو اني اول واحد وعلى كولتج اهئ اهئ

بس اللي خربني من الضحك انه تسعين بالمية من التعليقات انت كاتبتهة ههههههههههههههههههههههه

هسة راح اروح اقراها للتدوينة وارجع اعلق مرة ثانية

Abu Al-Hasan يقول...

المشكلة هو انه اني مثل الاطرش بالزفة هنا وما عرفت شنو موضوع النقاش مال اللا دينيين العرب، هههههههههه بس عرفت انه هارت روز حست بللي دا احس بي هسة لانه هيجي تقريبا دا اخمن شنو الموضوع اللي تناقشتو بي هنا ولو اني موجود جان ظليت اثرم بصل بروسكم الى يوم يبعثون بس مع الاسف ما جنت موجود

Abu Al-Hasan يقول...

واني هم ضحكت على هاي النكتة، بس هاي انتو (البنات) تعرفون هاي السوالف مالتنة (الولد) من جنة مراهقين؟؟؟اويلي على الفضيحة اللي بجلاجل هههههههههههههههههه
بس ترة هاي صدك مال: بشرفك روح انطيهة الرقم بلكت اننسق وية صديقاتها... ههههههههه يعني شلون زوج علساس...ولو بالنهاية شبع كتل ولكنه اثبت انه صاحب مبدأ وثابت عليه


بس اني عجبي الى الان على الاستبسال الاستعداد لتلقي الضربات الترجيحية في سبيل التنسيق...يعني جان نادي الصيد شاهد على الاف الراشديات والجلاليق التي دارت حول هذا الموضوع...


وبعدني دي دك كلبي على بور ايراكي وشنو هو الموضوع اللي طرحة همممممممممم ضغطي صار زليار هسة (زليار اكبر من المليار بالف قاط)، يعني صدك مديشوف البشر اللي زاير المدونة هاي؟؟؟ يعني المطرة فشت فشت وساعة الفسق وتؤللي بحب امي وخواتي؟؟؟

لا والله صدك مو اني دا احس شنو الموشوع اللي ناقشة هنا عندما قاطعت المعلومات ما بين الموقع مالته ومال ربعة وبين الردود اللي سقتيها انت بالمدونة مالتج

*الخاتــــIraqi Ladyـــووون* يقول...

اليوم كلها مفاجآت عيني، أول شي إنه طلعت أعرف سوالفكم و ثاني شي مال اللادينيين و الثالثة و الأهم إنه آني حاطة تدوينة جديدة.. إلزم كلبك يامعود.
بالنسبة للبور عراقي آني طلبت منه إنه أي نقاش حول الموضوع ماله لازم يتم بمدونته و آني انتظر منه أن يحترم طلبي

تقبل تحياتي

Heart Rose يقول...

خاتون .. اسفه تأخرت بالرد .. بس لوتدرين يابه شكد انشغلنا ناس اجونا من العراق و كل يوم معزومين عرس .. ما ادري هو شنو موسم اعراس ؟؟

طبعا من ورا المناقشات التي تمت اعلاه اني نسيت ارد

و نسيت اشيد بطريقة كتابتج و اشكرج عالتدوينه اللطيفه

هههههههههههههههههههههههههههههههههه
والله مثل ما وصفتي هيج همه صدق صدق
مثل عبوتشي

والله يا خاتون بس خوش بوكسات انضرب اخر شي

و احلى شي مال و عندما انقشع الغبار
هههههههههههههه تخيلت المشهد

و اشكرج على ذوقج و مراعاتنا بالتعليقات و استجابتج لطلبي

باختصار انتي انسانه ذوق

^_^

أبو ذر يقول...

مع اني من غير المختصين في آداب الكتابة أو في علوم نقدها ..، الا انني كقارىء احسست بسلاسة ماتكتبين - طبعا هذا بغض النظر عن مدى اتفاقي معك بالرأي حول مضمون ماتكتبين من عدمه - .. اتمنى لك دوام التوفيق .. واشكر لك سبق مبادرتك بالتعقيب على بعض ما نشرت . وتقبلي خالص تقديري واحترامي

Abu Al-Hasan يقول...

خاتون اشو مالج حس ولا قبلتي الدعوة مال متهجولون على ايميلج؟؟؟
ترة ينرادلنة شغل من شغل حتى نسوي فد شي براسة حظ

يللة حجية جهودج نريد

وهل جم يوم راح تشوفين فد سلسلة مقالات اني دا اشتغل عليهة هسة ان شاء الله تعجبكم

*الخاتــــIraqi Ladyـــووون* يقول...

أبو الحسن ني آسفة جان الكيبورد هالجم يوم عطلان فما كدرت أستعمل الكومبيوتر، إن شاء الله أفكر بجم مقال و أدزها، بس يا ريت إنت تشرح لي شلون أضيف المدونة ويا مدوناتي اللي بصفحة معلوماتي الشخصية مثلك إنت و هارت روز..

أبو ذر.. منور أخويا، آني أشكرك على مرورك على مدونتي المتواضعة و أؤكد لك إنك (تتفق) معي في مضمون ما أكتب و لكن قد تختلف معي في (طريقة) عرض الفكرة..

تقبلوا تحياتي..

Abu Al-Hasan يقول...

حجية انت بس فوتي على ايميلج مال هوت ميل وانت راح تلكين دعوة اني دازلج ياها بس اقبليهة وانت راسا تنضافين بس هذا في حالة انو الايميل مال هوت ميل هو المستخدم عندك بالمدونة مالتج واذا ما جان هو فدزيلي الايميل مالتج المستخدمتة بالمدونة حتى ادزلج الدعوة عليه

ممنون وان شاء الله نشوف منج شغلات جديدة

Abu Al-Hasan يقول...

هلا بحجية خاتون بمدونة متهجولون واللهم يجعلها هجولة خير علينا وعلى كل امة محمد امين.
وعلى طاري امة محمد راح ادز فد نكتة معبرة ممكن ان تستخدميهة على لسان سودة الحسودة او وحدة من ربعها

اهلا وسهلا مرة ثانية

*الخاتــــIraqi Ladyـــووون* يقول...

آمين يا بو الحسن، أنتظر منك النكتة

Quest in iraq يقول...

احلى مافي المدونة هو اللهجة العامية
عاشت ايدج خاتون كلش حلوة وتعكس واقع الحال، وشي كان سابقا موجود ابلدنا ، كان الشباب ايعاكسون البنات بس هسة ،،، تعذريني حيييييييييل
واحلى ما بيها
لوت الآنسة يد عبودي: عليمن ولي ها؟ عليمن ولي؟
أطلق عبوتشي صرخة ألم
عليمن ولي؟
مو عليج مو عليييج، بس وخري حتكسرين إيدي !
تحياتي لعبودي وبالعافية

*الخاتــــIraqi Ladyـــووون* يقول...

على كولك هسة البنات هم يعاكسن ما شاء الله، مو أكولك حرية و ديموقراطية..
عموماً آني ده أتخيل هذي القصة ممكن تصير هنا بالإمارات لأنه بالوضع الأمني هسة ماكو أحد يطلع و هاي هم من محاسن الحورية و الديموقراطية.

زهرة الراوي يقول...

آآآآآآآآآخ يا بطني ..
متت من الضحك ههههههههههه
أضحك الله سنك ولا فض فوك ..
من صدق رائع .. أحلى شي ما حجت ما حجت وجان يفلت لسانها علمود التسريحة ههههههههه بس ما افتهمنا طلعت من وين ؟؟
راح أصير أسوق على 60 حتى لحد يحجي وياية خخخخخخخخخ

*الخاتــــIraqi Ladyـــووون* يقول...

آني يسرني إنه عجبتج يا زهرة .. تقبلي تحياتي

لطفي فنون يقول...

هلو اسلوبك في حديث وجميل وأتمنى لك المواصلة في الكتابة والى المزيد الأبداع والروعة_تحياتي فنون العراق