بكرمي الخاتوووووني الأسطوري ، سأسمح لكم بتصفح التي هي .. مدونتي
أرجو لكم وقتاً ممتعاً

الجمعة، 8 أغسطس 2008

جعلوني ناصبية (إهيء إهيء)

بينما كنت أمارس هوايتي في تقليب الإنترنت و البحث في كل أنواع النفاق و الفتن و القال و القيل مثل صيادين الذبان، أو مثل الذبان (حسب ما تشوف أم رسول)
و كانت سودة الحسودة تمارس هوايتها المفضلة أيضاً في مراقبة ما اقرأ و ما أكتب و تضحك عليَّ تلك الضحكة التي أخرع بها نوسة و حسومي:
لا تسوون وكاحة ترة أضحك مثل سودة الحسودة
فرأساً يكعدون عقال.
فإذا بي أجد أحدهم في أثناء السب و الشتم و اللعن يقول على أهل السنة (الناصبة)، ناصبة؟؟ أشو السب صاير موديلات هالأيام؟
لازم أكولها لسوسو على هالموديل الجديد باعتبارها تتبابع المودة.
بس عليش؟ آني أدري بيها حتكولي إنه السب صحيح ع المودة بس مو ع الأتكيت.. و مثل ما تدرون، سوسو عدها كله و لا الأتكيت.
أما بالنسبة لمسألة النصب فخلوني أسولف لكم عني شوية
آني يا عيني إنسانة بريئة و مسكييينة (إهيء إهيء) و ما عندي مسائل نصب و لا احتلال (قصدي احتيال)
يعني.. عدا مرة لما ضوجني حسومي فكلت له على خل التفاح :
هذا عصير تفاح حسومي ضوكه
صدوووك؟ آني ما ضايك عصير التفاح..
و ركض الولد بفرح على العصير و شرب شوية، و من يومها تجتاح حسومي رعدة جسدية كلما يسمع طاري عصير التفاح.. لكن الولد للأمانة تقبل الشقه مالي (مو أكولكم حسومي يتقبل الشقة مالي)
بس آني بعدني زعلانة
هذا شديحجي؟ شنو ناصبة؟
هم الشيعة يكولون عليكم الناصبة
ناصبة بعينهم ان شااااا الله، فوك ما متحمليهم يوميا يكتلون بينا
هم هيجي، و إنتي ده تشوفين خوب شديحجون عليكم
بس يحجون علينا؟؟ هم يكتلون بينا المجرمييييين
جتي ورا شوية أم رسول و قبل ما المرة حتى تكول السلام عليكم كبيت عليها:
هاي أم رسول صحيح تكولون علينا ناصبة، مو عيب؟ ما تستحون؟ وين العشرة؟ و يييييين الوطنية؟ وييين الديمقراطية؟
خطية يا عيني، أدري اخترعتي أم رسووول
لاحظت أثناء ذلك إنها تحاول تهدئتي هي و سودة الحسودة:
شنو قصدكم يعني إحنا نصابين؟ آني ليش شوكت جنت أنصب ع الناس؟ لا وصل حدها إنتي و جماعتج و المرجعية و البيت البطيخي، أشو ما تحجين؟؟ها عيني؟؟ليييييش ما تحجين؟ أريد افتهم.. ليش ليش ليش؟؟؟
خاتون عيني
بلا خاتون بلا مو خاتون، هسة حتفهميني البريستيج مالنا ليش جيتوا يمه، ليييش؟! شنو ناصبة ها؟ ناصبة بعينكم و بعين الجابوكم من هناك..
لج دي سكتي خيلني أحجي!!!
هاي شبيج أول ما دخلت انهديتي بي؟ إنتي أصلاً وحدة مخبلة و عقلها طاك و جاية تطلعين خبالج عليَّ

إي هي تره مخبلة صحيح
آني ادري؟ شفتيها شلون؟ ما تنطي مجال واحد يحجي
تعلميني بيها؟ إنتي الله يساعدج متحملتها
أي يمه الله يساعدني، المفروض هذي مو يسموها خاتون، يسموها مخبلة!

ها خلصتوا بشبشة؟؟
أي عيني خلصنا..
هسة حتفهموني، ليش إحنا صايرين ناصبة ..
زين كعدي إنتي و ام رسول تفهمج
طبعاً سودة الحسودة مثل ما تدرون لها قابلية عجيبة على التهدئة، يعني أي اثنين يتعاركون بالمنطقة هيَّ رأساً تجيب خارطة الطريق (يعني خارطة الشارع) و ما ادري شتحجي فالناس يهدون.. فآني يا سبحان الله رأساً هديت..
هسة خاتون شربي هذا العصير مالي
أخذت العصير، و شربت.. أحسست بحرقة غريبة في بلعومي، و هذا بالتالي كان سبب الـ.....

عااااااااااااااااااااااااااااااااا

فقد كان نفس العصير اللي شربته لحسومي!!
.
.
و هكذا أيها السادة المحترمون، جلست سودة الحسودة و أم رسول يضحكان عليَّ و يشمتان بيَّ، و تركوا فتاة بريئة و مسكييينة مثلي تبكي من الحسرة (أو من الحرقة) !!

هناك 23 تعليقًا:

poor iraqi يقول...
أزال المؤلف هذا التعليق.
Heart Rose يقول...

ههههههههههههههههههههههههههههههه

خاتون قصتج دليل على انو الانسان يحصد اللي زرعه

عجبتني .. خصوصا مقطع المرجعيه
حلوه حميتج و عصبيتج

اشو مكملينا .. هسه ليش سموج ناصبه .. خوما ناصبه على احد

ترا سؤال لا اكثر و لا اقل ... لول(;

ادام الله ابداعكِ الغزير

Princess يقول...

اختي خاتون فعلا قلب المرآة رقيق جدا ولكن ليس ضعيف. القلب الصافي الطيب قلب قوي جدا. انا امرآه قوية ذو قلب رقيق ولكن قوي في نفس الوقت. لقد وهبنا اللة نعمة الذكاء والأحساس. اذا استخدمي هذه المواهب لكي تخدمي هذا القلب الرقيق القوي وامنحي هذا القلب الجميل لمن يحافظ عليه

عندج خوش مدونه واسلوبج بالكتابة كلش كلش عجبني
heroine here

الدكتور حيدر نعمة بخيت يقول...

في الحقيقة لااعرف ماذا اقول ومن اين ابد تعليقي على المدونة انها تعبر عن واقع حزين ومؤلم مر به معظم العراقيين..اتمنى ان يزول باسرع وقت ممكن ليعود العراق والعراقيين على سابق عهدهم اخوة واحبة يجمعهم العراق فقط لاتجمعهم الطائفة او المذهب.

د. حيدر نعمة بخيت
heider_nima@hotmail.com

*الخاتــــIraqi Ladyـــووون* يقول...

بوور عراقي، آني شرحت لك ليش آني سويت إنه أوافق ع التعليق قبل نشره، و طبعاً مثل ما شايف ما نشرت تعليقاتك، و أحب أكولك إذا آني ما عاجبتك أو اللي دا أكوله مو عاجبك.. مو ظروري تتهجم على شيخ على محشش و مو محشش.
و لا تتهجم على اعتقاداتي مثل ما آني ما كاعد أتهجم عليك، و كلمات مثل (إيع و ويع) يعني مالها داعي.
إذا إنتوا تضحكون علينا لأنه متخلفين أو نسب بعضنا أو غيرها، صيروا لعد أحسن من عدنا و استخدموا أسلوب أكثر حضارة، و اللي حجته كوية يستخدمها مو يجيب هالكلمات المبالغ بيها (ويع و إيع و بوم).

كلت لك أي موضوع عاجبك تناقشه وياية خليها بمدونتك، رجاءاً أحترم هالشي و لا تخليني أكول أكثر من هيجي لأن إنت مو طفل.
إنت رجال أكبر مني تقريباً بـ 12 سنة يعني، و متزوج و عندك جهال فالمفروض تفهم على كلامي، صح لو مو صحيح؟

تقبل تحياتي و لا تزعلني عليك أكثر..

*الخاتــــIraqi Ladyـــووون* يقول...

بالنسبة لتعريف سودة الحسودة و أم رسول، مممم ما أدري ليش شامة ريحة سخرية و و عنفصة و (مو عاجبك كلامي)..
عموماً آني عندي تعريف ببالي، بس ما رح أكوله و رح أخلي لخيال قرائي المجال لتعريفهم..

*الخاتــــIraqi Ladyـــووون* يقول...

ههههههههههههه هارت روز، هم الناصبية عدهم علساس السنة (يناصبون) آل البيت العداء، لكن آني بالنسبة إلي ما أناصب أحد و آل البيت كلهم على راسي، و الصراحة يا ريتني أكون أظفرهم..

و بالمناسبة (بوور عراقي)، أي آني الحمد لله مسلمة سنية و عاجبتني روحي و ما خايفة لا منك و لا من غيرك.
مو العيب إنه الواحد ينتمي لطائفة و لكن العيب إنه يعتقد نفسه أحسن و أفهم من غيره..

Heart Rose يقول...

ههههههههههههههههههه اي اعرف بس قاعد اتشاقه

كلامج حيل حلو

Ali Yaseen يقول...

متتصورون شكد اتونس من احس نفسي اطرش بالزفة، على العموم الظاهر انه تعريف الناصبة متعارف جدا لدرجة انه كل اللي هنا يعرفوه وايضا طلعت اني مثل الاطرش بالزفة لان ما جنت اعرف شنو معناه.الشي الوحيد اللي اعرفة انه اكو من يتهمونة انه عدنة ذيل دورت دورت ما لكيت فعرفت انه نص الحجي كلاوات.

على العموم كلش حلو خاتون وما اكو داعي بعد نمدح لان من اول تدوينة بين الشغل الصحيح...فاشكرك

ملاحظة: شنو قصة بور عراقي اشو حيل حامي حمامج عليه وكل شوية ناتفته بحجاية؟؟؟ يمعودة ديري بالج على صحتج ترة احنة كلشي ولا صحتج ههههه

ودمتم للنضال

*الخاتــــIraqi Ladyـــووون* يقول...

ههههههه تسلم يا بو الحسن و سألت عليك العافية..

و أشكرك على مرورك.

Princess يقول...

مرحبا عزيزتي خاتون سوالف كلش حلوة واسلوبج بالتابة اكثر من رائع ومضحك بنفس الوقت اني احب الكتابات الساخرة
اني ضفت مدونتج يمي بالمونه
اتمنى هم انتي اتضيفين مدونتي
تقبلي تحياتي واتمنالج الموفقية والنجاح ابحياتج اكيد العيشة بالغربة صعبة بس شنسوي
مع السلامه خاتون

Ali Yaseen يقول...

خاتون يمعودة شبيهة مدونتج اشو لونهة باهت خطية وصاير وجهة اصفر، اخاف بيهة فقر دم لو شي او احتمال سودة الحسودة طكتهة بعين؟؟؟
سلامتهة الف سلامة
استمري بالكتابة لخاطر الله ترة والله ضجت كلما افوت الكة جعلوني ناصبية

*الخاتــــIraqi Ladyـــووون* يقول...

بو الحسن الظاهر جنت داخل و آني ده أحرر مدونتي، شنو رأيك بشكلها الجديد :))

Heart Rose يقول...

ما وصلني منكم رد ؟؟

عموما اسفه عالازعاج

هو بس ردت اطور المدونه

مو مشكله

ahmed يقول...

النواصب تاريخيا: هم من نصب العداء لآل البيت. و يشمل هذا التحديد على وجه التأكيد شخوصا تاريخية كمعاوية بن أبي سفيان و يزيد أبنه و بالأخص جعفر المتوكل الخليفة العباسي الذي هدم قبر الحسين, اما بالنسبة للشيعة فالحلقة تشتمل معظم الشخصيات التاريخية الإسلامية السنية تقريبا. و قد إتسع هذا التعريف المطاطي أكثر لكي يشمل كل من ناصب العداء لشيعة آل البيت, كالوهابية مثلا او على السنة جميعها حسب من تسألين.

لفظة النواصب تقابل لفظة الروافض عند السنة, الا انها اقل حضورا بنفس المعنى العام ما بين الشيعة, و أكثر ما تظهر على وجه السطح في الحوادث الشنيعة, فمثلا قال الرادود ملا باسم الكربلائي مخاطبا الإمام المهدي إبن الحسن ناعيا حادثة تفجير مرقد العسكريين في سامراء:

يا وسفة جدك يندفن بين النواصب
عندك عدو, عندك محب, إلمن تحاسب؟

اما بالنسبة لما ذكره السيد أبو الحسن في شأن اعتقاد بعض الشيعة ان للسنة ذيولا فهذا الإعتقاد سائر في بعض المناطق التي تكون شيعية بالكامل فهم لم يروا سنيا في حياتهم فبامكنهم اطلاق العنان في تصور هذا الكائن الغريب الذي يسمونه (ابو ذويل) - يمكنك ان تقرأ شيئا يؤكد ما اقوله في موسوعة بيضيبيديا - في موضوع السنة او الشيعة لست أذكر, و ستجد مصدر هذه المعلومة في ذيل الصفحة.

تحياتي خاتون و استمري

*الخاتــــIraqi Ladyـــووون* يقول...

هارت روز، آني ضفتج عندي بس للأسف اللنكات ما كدرت أنسخهن، يا ريت تديزي لي اياهن بالإيميل..

الأخ عباس هوازن يا هلا بيك منور مدونتي، و شكراًُ على المعلومات الغزيرة..

Ali Yaseen يقول...

شبيهةى هارت روز زعلانة؟
ترة والله عن نفسي فانيي كلش عجوزي وما رديت عليج لان اولا الانترنت بعده ما منصوب بالبيت وثانيا لان هم اني عجوزي

وترة هاي السوالف مال رافضة اني مثلا بحياتي ما سامعهة بالعراق وبالخارج وورة الاحتلال يللة سمعناهة بس ترة مال ابو ذويل يعني ما ادري شاكول عليهة، والشي اللي اريد اكوله هذا الكربلائي اللي يحجي على المدفون بين النواصب، فالنواصب او الاصح السنة(فاللي يعتقد انه احنة ما نحب ال البيت هذا انسان مع احترامي اله بلهجة اهلي نكول عليه كر بضم الكاف) كانوا قائمين عليه على احسن وجه والناس صدك قائمين بحق هيج مرقد(مع رفضي التام لاقامة مرقد لاي كان) واتصور المراقد كلهن انطلن بالذهب وصارن (إشي مش طبيعي وبيعئد) على ايد السنة فهاي السوالف لو من موسوعة بريتانكا هم ما بيهة لا منطق ولا اصل فارجو التنويه شكرا


انشري للتعليق(رجاءا) خاتون ترة اني نفر يسوي جنجال واسف علىالاطاله بس نوبات ينبط افادي من هل مسائل

نجوان علي يقول...

السلام عليكي يا خاتون
عندما قرات موضوعكي اعجبني كيفيه طرحك
للموضوع اما الموضوع بحد ذاته لم يعجبني
انا لا احاول ان انقص من اسمك او من شخصيتك انا احترمك
لكن انا شيعيه وانتي اختي سنيه
وشعرت بان الموضوع يمسني بشي
وانا عن نفسي مثلك الان اسمع بهذه الكلمات لاول مره فارجو منكي ان تعرفي
ليس كل شيعي هو عنصري وليس كل سني عنصري

وشكرا لكي

ارجو اني تنشري هذا الكلام
مع العلم اني اقدر كتابتك
لكي مني الحب والسلام

*الخاتــــIraqi Ladyـــووون* يقول...

أهلاً بيج يا نجوان، أختي إنتي على عيني و راسي.. آني لو ما كان رأيي من رأيج ما كنت حكتب الموضوع هذا أساساً..

آني أعالج هنا الشخصية المتطرفة سواء كانت سنية و شيعية، و الدليل لو تشوفين اللي كاتبته عن أم هزيبر (و هي تمثل الشخصيةا لسنية المتطرفة) حتعرفين إنه آني ضد التطرف مهما كان لونه و جنسه..

تقبلي تحياتي

غير معرف يقول...
أزال أحد مشرفي المدونة هذا التعليق.
*الخاتــــIraqi Ladyـــووون* يقول...

أخي العزيز (طرزان) أشكرك كثيراً على المعلومات القيمة، و لكن إسمح لي آني مسحت تعليقك ليس لأنني أعارض أو لا أتفق معك، و لكن ليس الهدف من المدونة هنا أن أفتح مواضيع الشبهات و المذاهب و معرفة أصولها.. هدفي هنا انتقاد كل ظاهرة غير صحيحة في المجتمع بأسلوبي الخاص و اتوقع أن يتفق معي الكثيرين بأنها غير صحيحة و يجب أن تتغير..

أقترح عليك أن تكتب أي موضوع يختلف عن ذلك الهدف عن طريق النموذج البريدي، و كان يمكنك عن طريق ذلك أن تضمن عدم ظهور بريدك الإلكتروني :)

تقبل تحياتي

*الخاتــــIraqi Ladyـــووون* يقول...

الأخ عباس هوازن، رغم إنه المعلومات اللي جايبها حول معنى (النواصب) توهم القاريء للوهلة الأولى بانك حيادي.. و لكن عندما راجعت تعليقك مرةً أخرى إنت قلت بأنَّه يطلق على (كل من يناصب العداء لأهل البيت كالوهابية مثلاً) إسمح لي اكولك حتى الوهابية، و حتى اللي إنتوا تعتبروهم وهابية (أسامة بن لادن و تنظيم القاعدة مثلاً) لم يعلن أحد منهم العداء لآل البيت، هذا مفهوم أوهم بعض الشيعة به أنفسهم..

على فكرة إنت حاط بيت شعر أبد مو حلو على موقعك، عن عمر بن الخطاب (رضي الله عنه) فهل نسميك و كل من يكتب مثلك بانكم (نواصب) لصحابة رسول الله (صلى الله عليه و سلم)؟
إسمح لي هذي هي الحقيقة..

نسآيمـ يقول...

خــآتونة ..

مآ شآلله عليج مدونة رهيبة

و حلو أسلوب منآقشتج للقضية ..

آني ترى شوية متطرفة بس قلبي طيب ..

يعني مبدأي إحترم عقيدتي أحترمك ..
و مآ أوجه أي إتهــآم أو إهــآنه للأخر لأنه حر بإعتقآدة بس أرد عليه بقوة إذآ مس عقيدتي ..

مــآ آدري ليش آلبعض فــآهم " الوهــآبية " بهالطريقة ..

أعتقد لو دورنــآ بالكتب نلقى إن " الشيخ محمد بن عبد الوهـآب رحمه آلله " كــآن يدعوآ للتوحيد و يحذر من الشرك لأنه إثمه عظيمـ ,,

بس حآلياً إلتصق هذآ المصلح بالمتدينين السنة ..

آني مسلمة موحدة " وهــآبية " همي العقيدة الصحيحة و مــآلي خص بالباقين ..