بكرمي الخاتوووووني الأسطوري ، سأسمح لكم بتصفح التي هي .. مدونتي
أرجو لكم وقتاً ممتعاً

الخميس، 14 أغسطس 2008

هواية وفيات بهالجم يوم..


آني علساس اليوم أكتب موضوع غير هذا، بس شسوي موضوع الوفيات هذا كال لي اكتبيبني..
يعني وفاة الشاعر الفلسطيني الكبير محمود درويش و يوسف شاهين و الأهم، سوزان تميم..
دائماً في مثل هذه المواقف أستشير المحللة السياسيةالقديرة:أم هزيبر، فتحليلاتها من النوع الصاعق و المكهرب و هذا هو المطلوب..
من وجهة نظر أم هزيبر الكل مستاهل، أكولكم ليش..
محمود درويش اللي عاش للقضية الفلسطينية توفي في امريكا و هيَّ معروف شنو دورها من القضية الفلسطينية
و يوسف شاهين قابل شنو هذا؟ هو مخرج و أفلامه كلها على كولة حسومي ( بيها هواية أشياء عيب)
و سوزان تميم، هم انكتلت جزاء أعمالها اللي برأي أم هزيبر أعمال فاسقة..
"و بعدين هي قابل أم كلثوم لو كاظم الساهر"
آني من سمعت هالحجاية من أم هزيبر شهكت:
ها أم زهيبر، منين تعرفيهم لذولة؟؟
إش أسكتي إنتي..
لالالا، أشو آني ما ساكتة و حتكولي لي من وين تعرفين كاظم الساهر و الأهم أم كلثوووم
بان على أم هزيبر الإرتباك، و الواضح إنه حفيظتها ثارت و انتفضت:
ها، لعد إنتي من وين عرفتيهم
منج غير خخخخ
.....
يلا هسة ما اكوم من هنا إلا تكولي لي..
شحلوة، إذا ما تكومين آني أكومج و اشمرج هسة بالشارع
لا؟ و حتكدرين يعني؟
باوعت على أم هزيبر من فوك ليجوة (قصدي من جوه ليفوك)، و بلعت ريكي.
الصراحة.. رح تكدر!
فخلوني هسة أطلع و بريستيجي كامل، أحسن ما أطلع و بريستيجي متخربط..
نهضت بشموخ من القنفة، و بدل ما كولها سلام عليكم كلت لها بايباي و جاي (قصدي جاو) و طلعت.. (مو أكولكم آني هم كوية)
.
.
رغم كل حجي أم هزيبر أشو آني للأمانة بعدني مقهورة على اللي ماتوا.
هسة فوك ما آني مقهورة على اللي ماتوا بالعراق طلعوا لنا البقية من غير صفحة (إهيء إهيء)

هناك 17 تعليقًا:

غير معرف يقول...

منو أم هزيبر !

؛)

*الخاتــــIraqi Ladyـــووون* يقول...

يا لهوي، حذفت وحدة من التعليقات بالغلط.. يا ريت صاحب او صاحبة التعليق (إسم شوي صعب) يا ريت يعذرني او تعذرني..
إهيءإهيء

حبارير يقول...

ياست ولا يهمك
كنت أقول لحضرتك
نسيت كذلك وفاة
الدكتور عبد الوهاب المسيري
الأستاذ سامي خشبة
الدكتور شاكر الفحام
الدكتوررؤوف عباس
وقبل البارحة توفي في السنغال الأستاذ حسن سيسي
لكن أمة العرب ولادة
المهم
لا تبشي(لا تبكي)
أعاد الله العراق لأبنائه آمين

*الخاتــــIraqi Ladyـــووون* يقول...

شكراً يا ست .. حبارير على إعادة كتابة التعليق و آني آسفة تعبتش معايا..

تقبلي تحياتي

غير معرف يقول...

منو أم هزيبر !

عجيييييييييييييييب

*الخاتــــIraqi Ladyـــووون* يقول...

السؤال إنت منو؟؟

Princess يقول...

اي صدك انته منو

امبين هاي ام هزيبر كلش تفتهم هاي مكانها امجلس النواب هذا احسن مكان

الله يرحم حسن سيسي والجماعة الي ويا

*الخاتــــIraqi Ladyـــووون* يقول...

ههههههههه أي يا أميرة..
بس أم هزيبر تكول مجلس النواب متعاونين مع الكفار فهي ما تريد تدخل هناك..

تقبلي تحياتي عزيزتي و شكراص على مرورج..

*الخاتــــIraqi Ladyـــووون* يقول...

أميرة.. حاولت أعلق على البوست الجديد مالج بس دائماً أواجه مشكلة بالتعليق..

Heart Rose يقول...

هلو خاتون

شلونج

الحمد لله العائله بخير و شكرا جزيلا على سؤالج
بس جان كلش مو خوش وضع .. و بهيج مواقف تبين الغربه و صدك الواحد يضوج

المهم خلينا نعلق
اني بديت اعجب بام هزيبير و نظرتها الفذه و العميقه للامور
خخخخ

لا الصدك الصدك .. اني جنت احب محمود درويش
اما سوزان تميم فمو كلش صداقه وياها
و اما يوسف شاهين .. فاني هم مو صداقه ويه الافلام العربيه

يعني اللي ممكن اترحم عليه هو محمود درويش .. لانه وطن في قصيده بكل ما للكلمه من معنى
لكن يقولون شيوعي و ما اعرف اذا يصح الترحم عليه
بكل الحالات كان شخصيه رائعه و كتاباته و مواقفه الوطنيه يشيد بها الجميع

حاطه يتوقيعي بالايميل هذا :



أتحبها

أحببت قبلك

و ارتجفت على جدائلها الظليلة

كانت جميله

لكنها رقصت على قبري و أيامي القليلة

و تحاصرت و الآخرين بحلبة الرقص الطويلة

و أنا و أنت نعاتب التاريخ

و العلم الذي فقد الرجوله

من نحن

دع نزق الشوارع

يرتوي من ذل رايتنا القتيلة

فعلام لا تغضب





محمود درويش

*الخاتــــIraqi Ladyـــووون* يقول...

رائع هذا الشعر..

آني مثلج هم مو صداقة ويا سوزان تميم و يوسف شاهين.. بس هم خلص ماتوا و هم و ربهم..

أم هزيبر بدل ما تكعد تصلح نفسها تكعد تحجي ع الأوادم و تحكم هذا زين لو مو زين..

تقبلي تحياتي و ألف سلامات يا هارت روز.

Heart Rose يقول...

بس صدك تحسيها هوايه صارت

عموما سلميلنا على ام هزبير و اهنئج على تميزج بالطرح

صدك اسلوب راقي و متميز

عاشت ايدج

تحياتي

Heart Rose يقول...

الله يسلمج

^_^

و صدك كل واحد راح بحال سبيله

الله يرحم الجميع

*الخاتــــIraqi Ladyـــووون* يقول...

الله يسلمج عمري و إنتي الراقية يا هارت روز، و يشرفني أتعرف عليج

تقبلي تحياتي

حبارير يقول...

سيدة العراق

السلام عليكم

أشكر حضرتك والأميرة الحزينة على زيارتكم لمدونتي الفقيرة

ممكن أسأل ما معنى(أمبين جان)(أمبين )

صدج أبغي أعرف

وأنا كذلك حاولت أعلق عند أميرة فلم أستطع ,لكن كلامها كله رومانسي وأنا لا أميل للأسف لهذا اللون فأعتذر لها مقدما لو لم أعلق

*الخاتــــIraqi Ladyـــووون* يقول...

سيدة العراق؟؟؟؟
الله، الناس هالأيام يشوفوني أكبر من حجمي مما يرفع من روحي المعنوية و يساهم في تعديل بريستيجي!
معناها يا سيد حبارير (كان باين)

Miss Qatar يقول...

كثار اللي ماتوا هالفترة

ويوسف شاهين احس السينما بترتاح منه .. كل افلامه محد يفهمها اضافة الى انه يحارب الحجاب

اما سوزان تميم فالصراحة موتتها تخوف حالها حال ذكرى