بكرمي الخاتوووووني الأسطوري ، سأسمح لكم بتصفح التي هي .. مدونتي
أرجو لكم وقتاً ممتعاً

الأربعاء، 20 أغسطس 2008

مدونة بايخـــــــــــــة

بينما أنا جالسة أمام التلفزيون و الدمعة بعيوني أتابع لقطة رومانسية (ساعة ما الولد يربط حبيبته بصاروخ و يرسلها للفضاء الخارجي) إذا بي أسمع رنة الهاتف المحمول ( تلفوني) جريت الكلينكس و مسحت ما خرج من عيوني و من ... خشومي، و شلت التلفون:
ألو؟
إنتي خاتون؟
أي تقريباً
تقريباً شنو، الخاتون لو مو الخاتووون؟
أي آني الخاتوون
كان هذا صوت الحجية سليمة و شكلها عصبية و ضايجة من شغلة، هي للأمانة ما تعرف للموبايل، و لا تريد تعرف له بحجة المثل اللي يكول (كل صغيرو بيه بلا)
استنتجت بذكائي الذي يفاجأني دائماً بخطورته إنه ده تخابر من تلفون بنتها، و الأهم، إنه بنتها هي اللي خابرت لها عليَّ
خاتون، اليوم رح الم الجيران و جاية عليج
أشو آني اخترعت، و حتى الكعدة مالي تعدلت وحدها
شنو حجية يمعودة شصاير؟ عدكم ثار ويا أبوية؟ هو ناقص قهر؟ هو أبوية هذا يوميا طالعة له شغلة؟ يوميا مشكلة؟ دي عوفوا ابوية بحاله، كلكم على أبوية؟
لج دي سكتي؟ هاي شبالعة اليوم
آني شنو ويا أبوج؟؟ آني جاية و لامة لج الجيران علمود فد شغلة

ها
إي
إي ديالله هلا بيكم
.
.
جوي، الحجية و أم رسول و أم هزيبر و سوسو..
سلموا و كعدوا، جان الحجية جبيرة الكوم بدات تتململ و كأنه رح تكولي : يعني.. تره أكو عريس ده يدور على هالخلفة اللي هي إنتي..
خاتون، إحنا جايين بخصوص موضوع...
إييييي (مو أكولكم؟ كل شي جائز)
إنتي مو علساس مسوية هاي اللي .. شسمها بالله؟
مدونة؟
أي.. مدونة و خابصتنا بيها؟؟
أي علساس يعني..
آني جاية اكولج أشو ما لكيت بيها بس بيها قصص و حجي ما بيه معنى، أكول لو تسوين مدونة تكولين بيها حكم و أمثال أحسن
حجية.. إنتي قريتيها؟
لا، آني ما اعرف أقرا

لعد شلون تحجين على شي إنتي ما قاريته
أم رسول من يمها:
أي بس آني قريتها، هاي شلون فاضحتني و مشرشحتني كدام أمة محمد؟ ما تستحين و لج آني بكد أمج؟
يلا ام رسول لا تزعلين مني، مو آني حتى روحي شرشحتها بالمدونة...
هنا قاطعتني: أي، و عيني شنو على القصص مالج بيها رموز و ما أدري شنو تقشمرينا؟ شنو رموز؟ لعد كل هذولة الناس اللي ما عدها مشاكل و تكعد تخربط و تكول فد جلمتين تضحك لو تسولف سوالف ما بيها معنى هم تكولج آني حاطة بيهن رموز، شنو هالضحك على خلك الله اللي كاعدة تسويه؟؟
جان سوسو، الخائنة سوسو (إهيء إهيء) كالت بحماسة:
إي و ليش مسويتها هيجي دارك بربل ليش مو لايت أكثر؟
بعدين إنتي شنو بس تضحكين و تكتبين قصص، ليش ما تكتبين شعر.. الدنيا ما بيها ألم؟ ما بيها معاناة؟ ما بيها ... رومانسية و حب؟

أشو بهالجم كلمة الأخيرة مال سوسو حلكي انفتح و راح على صفحة، و خشمي تعقج
الواضح بأنَّ صلوحي ده يشتغل ع البنية خوش شغل.
زين إنتوا إهدوا..
هدينا
شربوا جايكم
شربنا
حطوا رجل على رجل
حطينا ..
جان الحجية تكول: آني ما اكدر، رجلي بيها سوفان
أدري حجية، مديها أي شي سوي، بس المهم تسمعوني و تخلون مخكم وياي..

حجية سليمة، سهل أجي أسوي مدونة أكتب بيها امثال و شعر، لكن المثل و الشعر و الحكمة تنسي بسرعة و ما ترسخ بالمخ، لما تصير قصة توصل الفكرة للناس أسرع، و بعدين إنتي امثالج وحدها مكفية و موفية..
أم رسول، آني لو جاية أتونس أتونس بشي ثاني.. هو صحيح آني متونسة ويا الناس الحلوة اللي كاعدة تزور مدونتي و تتواصل وياي.. لكن مو الهدف الأساسي الونسة، آني صحيح( ناصبية) و مو دائماً القصص مالي بيها قضية جبيرة، بس هي إجمالاً أعني بها أشياء معينة و جهات معينة و شخصيات معينة (أو مو معينة) و القصة الوحدة بيها أحياناً أكثر من محور واحد..
سوسو.. مثل ما تكول الحجية سليمة (اليدري يدري، و المايدري يكول جف عدس) آني لوما القهر و المعاناة و الرومانسية الشديدة اللي أشوفها كل يوم في حياتي ما جنت حسوي المدونة أساساً.. و شر البلية ما يضحك..
أما بالنسبة للشعر، آني أعرف نفسي مو زينة بالشعر و لا إلي واهس بيه.. و لو كنت مثل هذولة اللي (يصفطون أي حجي) و يسموه شعر لكنت أنا أشعر منهم.. و لكن للشعر رجاله و نساؤه.. و عموماً لو شفت من نفسي أي موهبة شعرية مكبوتة و حرام ما تطلع و تخترعون بيها، ممكن اتكرم عليكم و أحطها ..
و إذا مو عاجبج كولور البلوج مالتي و تريدين شي لايتر أو بيبير، تدللين آني هسة ده أشتغل على أشياء بالمدونة و بحيل الله حتعجبج

باوعت على أم هزيبر بس أشو ساكتة:
ها أم هزيبر إنتي شنو اعتراضج؟؟
يا ترى ليش جنت عارفة شنو حيكون اعتراضها؟؟؟

المدونة مالج بدعة شيطانية، و خضوع بالقول..
أيابة!!!
طبعاً، و عموماً السفهاء ما يفيد بيهم الحجي، بس كلت أكولج و عجبج عجبج، ما عجبج خلي نار جهنم تفيدج!

يعني هاي المرة أكيد أكيد تاكل سموم محرمة دولياً قبل ما تحجي ويا الناس .
جحظت عيوني و انتفخت أوداجي و كنت على وشك الإنقضاض على أم هزيبر، بس أم رسول كاعدة و خاف تشمت بينا مما سيؤدي لخربطة بريستيجي و آني كله و لا بريستيجي

إهييييي إهييي .. أول مرة بحياتي أكتشف إنه آني سفيهة
ماشي يا ام هزيبر، ماشي! تستغلين المثلث السني اللي يربط بيننا و نازلة كفخاً و تجريحاً بكرامتي و بريستيجي..

هسة كل واحد عنده نفس التساؤلات السابقة يا ريت يكون جوابي هذا مكفي و موفي..

آني جديات حسوي بعض الأشياءات و الفيكات على مدونتي وأكيد رح تتكهربون لما تشوفوها (و هو المطلوب)

هناك 12 تعليقًا:

Ali Yaseen يقول...

يعني منو هذا اللي بايع عمره هسة يجي يسأل نفس السؤال؟؟؟
بس على العموم خاتون خليج(مو خليج التي تعني المسطح المائي ولكن خليج تعني ابقي) على اسلوبج وابدا لا تغيري فقد قال احمد شوقي: قف عند رأيك في الحياة مجاهدا ان الحياة عقيدة وجهاد

طبعا العجر مال هذا بيت الشعر صار شعار مال جريدة الحياة اللندنية هههههههههههه شلون مفارقة.....


المهم لا اروح اشطح بغير موضوع وانسى شريد اكول...

المهم انتي اسوبج كلش حلو والمدونة هاي بالخصوص مو بايخة ابدا...

بس تعقيبا على انه انتي جاية تتونسين لو لا....المفروض حتى لو مدا تتونسين فلازم وانتي دتسوين هذا الابداع تتونسين حتى تصير حياتج كلهة ابداع بشي انت متونسة بي لكن اني اعرف انه انتي فعلا متونسة

"إي و ليش مسويتها هيجي دارك بربل ليش مو لايت أكثر؟"

هاي الجملة شكتة لحلكي علما افتهمتهة هههههه خصوصا البربل


وتعقيبا على موضوع الخضوع بالقول فهذي الامور باطته لافادي من زمان...البس جينز يعيبون عالم، البس غترة وعكال يعيبون غير عالم (جماعة ياي و واو و اوماي كاد)اي يعني شلبس هسة ما ادري...فصدك عجبتني هاي التدوينة لان طرحت قضايا لطيفة ولا تصدكين احد يقرالج اذا غيرتي اسلوبج الحلو هذا اللي محد مسوي كبلج واني مصر (مو الدولة) اني مصر على انه لازم تحطيهن بكتاب والله يوفقج

*الخاتــــIraqi Ladyـــووون* يقول...

أبو الحسن أشكرك على الكلمات الرقيقة و على تشجيعي.
فعلاً جتني هيجي انتقادات، و بعضها انتقادات أتوقع رح أسمعها بالمستقبل، و آني مو مقهورة أبداً و مو ناوية أغير إسلوبي أبداً لأنه آني استخرت رب العالمين قبل ما أسوي كل اللي إنت شايفه.
ههههههه تدري المشكلة مال الجينز و الدشداشة تذكرني بشيخ صديق أبوية أصدقاءه يكولون لإبنه (إبن الشيخ و لابس نعال أبو الأصبع؟؟)
برأيي إنت عبر عن شخصيتك، كوول لو هيجي كبار و هيبة؟؟ و ما عليك بالناس، يحجون بس ورا فترة يتعودون..

آني جنت مسوية قبل كم سنة مدونة على جيران و صار عندي عدد لا بأس به من المتابعين و لو مستمرة جان يجوز صارت من أكثر المدونات شعبية، بس لأنه استخدمت الأسلوب العادي بالكتابة (مثل اللي إنت شايفه بمتهجولون) فمليت لأنه حسيت كاعدة أجبر نفسي و أحطها بقالب معين أو لابسة قناع أو متكلفة (مثل ما تسميها سميها) فبطلت كتابة و نسيت شغلة المدونات هذي أساساً..
و بعدين خطر على بالي كلت ليش ما اسوي مدونة أكتب بيها بنفس إسلوبي العادي بلا تكلف و لا شي، و كامت تجيني أفكار و أكتبها على ورقة و هكذا ولدت مدونتي (خخخخخ).


تدري موضوع الكتاب هذا ما جنت مفكرة بيه بس أشو إنت كمت تفره لراسي، كلت خاف آني صحيح لازم أحط إبداعاتي التحشيشية بفد كتاب ممممممم
عموماً حتى لو سويت كتاب ممكن في المستقبل يعني مو هسة :)

تقبل تحياتي و شكراً على كل شي..

بـابـل يقول...

صباح الورد عزيزتي خاتون

الصدفة البحته والغريبة وصلتني

لهالمدونة الحلوة بكل شي باللهجة بالطرح

بالشقاوة وبخفة الدم العراقية

ومن خلال قراءتي لمواضيع المدونة

طلعت بشعور واحساس حلو ومتعة كبيرة

من خلال كتاباتك ولاتديرين بال لكلام أي شخص يريد يعطل مسيرة قلمك وقافلة افكارك


وعد منى راح أكون ضيف دايم على هالمودونة الراقية


وأصفقلك برموشي مو بأيديني



وياريت تشرفيني بزيارة لمدونتي المتواضعة




وبس



بابل

ابو حسوني يقول...

تحيلتي


مدونة جميلة واهم ما فيها هو الاسلوب العراقي السهل الممتنع

*الخاتــــIraqi Ladyـــووون* يقول...

شكراً يا أستاذ بابا و أبو حسوني على مروركما و كلماتكما الرقيقة

و يا أستاذ بابا زرت مدونتك الجميلة و علقت عليها..

تقبلوا تحياتي

Ali Yaseen يقول...

هااااااااااي وين؟ اشو كلتي راح تسوين فد تصميم خرافي !!!اشو كلشي ماكو؟


ننتظر(او بالاحرى انتظر) الجديد

*الخاتــــIraqi Ladyـــووون* يقول...

هذي تقنية يسموها أتعب أعصابكم خخخخخخ
شفت شكيد خبيثة آني؟

أكولك تره دزيت لك رسالة يا ريت تقراها

حبارير يقول...

السلام عليكم

أخي أبو الحسن وقفت في حلقه جملة إلى أن أدرك معناها !!
وهو عراقي
ماذا أفعل أنا؟(شو سوى آني)وأنا مصري

تسلمي خاتون وكل العراقيين الشرفاء

سأظل أقرأ لكم حتى أتعلم اللهجة العراقية بإذن الله

أود أن أقرأ لك شعرا,بعد هذه التدوينة الظريفة
ختاما جو المدونة رشيق

غير معرف يقول...

يممممممممممعووووود أبو الحسن كتاب شنو ؟

تره هاي أختي شريرة ذاك اليوم دتكولي إذا سويت كتاب عود أفكر أخليج ويايه بالغرفة لو لا

إهئ إهئ إهئ << على قولتها


يمعودة حباابة خليج كتاب شنو تره يفشل إنتي بعدج نونو و أخاف بريستيجج يتخربط كإنسانة نونو

وبعدين متخافين من دعوات رابعة العدوية تره اصعدلج بالسطح ودعواتي رأسا لباب السما p :

وأخلي مو بس بريستيجج يتخربط بريستيج المدونة كلها يصير ممرتب





امممممممم لا جذب لا تصدقون أصلا خاتون قلبها طيب وآني متأكدة إنو أول ما ينجح الكتاب إن شاء الله رح تطلع هي من الغرفة وتكعد بغرفة أحسن حتى آني أبربع بغرفتي ، مو بالله خاتون ؟ ;)


وصدك عاشت إيدج على الحوار الحلو والهادف وتره أتحفتينا بحكم أم هزيبر وحجيها الي يودي لنار جهنم

وفعلا أكو ناس للأسف يسمون نفسهم متدينين وهمه بالحقيقة ما فاهمين من الدين غير ظاهره وممتشبعين بروحه وأخلاقه ، وأصلا ذوله أكثر ناس ضروا بالدين لأن دينفرون الناس من الإسلام وينطوهم صوره مشوهة و ( مخيفة ) عنه وهمه نفسهم أصلا صورة ممشرفة للدين

بس شكيد حلو والله اكو متدينين صدك يزداد حبج لدينج من تسمعين كلامهم وتشوفين معاملتهم وذوله الي أحنه نعتز بيهم ويشرفونا



وامممممممم تره على فكرة يعني للناس الي فاهمة غلط آني ممسمية نفسي رابعة العدوية لأن متدينة كلش أو فد شي آني إنسانة عادية ، بس آني أحبها لرابعة العدوية وأحب إسمها لأن من ريحتها


أطيب تحية



رابعة العدوية

Ali Yaseen يقول...

هههههههههههههههه شنو كبر راسي؟ كلش كبر مننوع مدا اكدر افوت من الباب الا افوت صفح، لان نص التعليقات على ابو الحسن وهنا ندرك جميعا اهميةابو الحسن التاريخية ووجوده الضروري في كل مكان الا مدونته(لان الزيارات كلش قليلة هناك) وطبعا كلنا لاحظنا انه اني (ابو الحسن )دا اكتب عن ابو الحسن بصبغة الغائب وهذا اكبر دليل على انه راسي كلش كبر...

الاخ حبارير السعادة الانطلاقة حياك الله ابن عمي في مدونة الاخت خاتون واللي اني كلبتهة ديوانية مال حضرتي وارجو ان تكون على يقين انك ستتعلم كلمات عراقية خالصة من الاخت خاتون لانها عراقية اصيلة وافكارها اوريجينال خالص كما تقولون في مصر وافكارها ينبغي ان تدرك المعاني المختيئة ورائها لاستخلاص الفكرة الحقيقية، شكرا لزيارتك لمدونة خاتون

خاتون اعذريني على عملي دور السكرتير في المدونة


رابعة العدوية انتي وحدج ينرادلج مدونة خاصة بيج واكتفي بقول انه اني مدا اكدر اقدر عمرج الحقيقي بس الشي اللي متاكد منه انه انت اكبر من العمر بكثير واني فخور بيج وبخاتون ولا تخليهة تصيح هواية ليروح شعرهة ينكفش فوك ما هو صاير (كزبانة)هههههههههه

شكرا خاتون على الابداع اللي خلانة كلنة نصفن بكتاباتج

*الخاتــــIraqi Ladyـــووون* يقول...

ييييي كلكم عليَّ ييييي (دا أبشي)

أبو الحسن يمعود دير بال لراسك لا ينطخ يصير بيه شي و يذبوها براسي (مما سيؤدي لخربطة بريستيجي) و قد اعذر من أنذر.. و آني قبلت بيك سكرتيراً في مدونتي، سكرتيراً شنو؟ لا إنت الأصل هنا و انت -إذا شئت- صاحب المدونة ..

حبارير إنت تستحق تحية خاصة مني إذا عرفت تفهم اللهجة العراقية..

غير معرف يقول...

اممممممممممم
مممممممممممممممممممممممممم

والله أبو الحسن آني جنت ناوية أقولك إنت ليش مصر إنو آني عندي موهبة ؟ لأن ما اعتقد انو اني أنفع أكتب خرابيط مثل أختي العزيزة ، ومعلوماتي السياسية على قدي يعني مو مال أنفع الناس بشي ، فما أعرف يعني شتريدني أكتب بالموقع مالتكم ؟

بس والله هسه صفنت شوية وفكرت وبحبشت باهتماماتي واكتشفت انو اني فعلا ممكن أسوي مدونة بس هم محتفيدك بشي وما اظن انت حتكون مهتم بموضوعها لأن عاجبني أسوي مدونة عن الفقر والمجاعه والمرض الي بالعالم ، مو أكيد يعني حدور الموضوع براسي وأشوف إمكانياتي

عموما شكرا على الاقتراح ،،

وبالنسبة لعمري ههههههه حسب اعتقادي آني عقلي على قد عمري فلا تقول هالحجي أخاف آني هم راسي يكبر

وصدك تره آني ناوية من زماااااان ادخل مدونتك وأعلق عليها حتى مرة دخلت وبعدين نسيت بشنو التهيت ومقدرت أعلق ، بس ان شاء الله أدخل اليوم وأشوف إبداعات حضرتك ، بس مو يكبر راسك أكثر !



أطيب تحية


رابعة العدوية