بكرمي الخاتوووووني الأسطوري ، سأسمح لكم بتصفح التي هي .. مدونتي
أرجو لكم وقتاً ممتعاً

الجمعة، 5 سبتمبر، 2008

خصارة بيهم الكعك!!

جان المفروض أكتب هالموضوع من زمان، بس تدرون عاد متطلبات البزبز (البزنس) و البريستيج، خلت الموضوع يتأخر شويونة

وصلتنا أخبااار، علساااس بيت أم حسااام ربحوا رحلة إلى مصر.. إي عيني ليش ما يحصلون؟ مثلنا كاعدين بالضيم؟؟
المهم خلي أكولكم الحجية شصار بيها لما سمعت الخبر، الحجية قررت تعزمها لأم حسومي على فنجان كهوة علمود تعرف شلون و شوكت و لماذا
بس أم حسومي بطريقتها الخاصة ما انطتها نجدة
كان ذلك واضحاً بعدما خرجت أم حسام من البيت و سمعنا أصوات الصراخ و تكسير الأغراض من بيت الحجية ..

ثاني يوم، وكفت حجية سليمة يم باب الحوش متحملة الحر و الرطوبة منتظرةً مرور حسام حتى تسأله الأسئلة السابقة ذكرها
انتظرت مدة طويلة و لم تظهر إلا البزونة العرجة، حتى كادت الحجية أن تيأس
أخيرا، ظهر حسومي ً و هو يحمل كيس الزبالة (تكرمون) ليرميها في مكانها المخصص:
حسومي، حسومي!
......
لك حسومي تعال هنا.
تلفت حسومي حوله بعدما تهيأ له بأنَّ أحداً ما ينادي على شخصٍ شبيه بإسمه، و عندما صارت عينه بعين الحجية و لاحظ إنها تؤشر له ليأتي، تأكد حسومي بأنَّ المنادى فعلاً هو الشخص الشبيه بإسمه، فهزَّ كتفيه بلا اكتراث و مشى عائداً للبيت:
حسومي حسومي لك دي تعااال!
.......
لك زمال تعال هنا!
هنا انتبه حسومي، و باوع عالحجية، و قرر أن يذهب إليها (بلكي كاعدة الحجية تصيحه هو؟ كل شي جايز بهالدنيا)
تعال حسومي أدخل هنا
هلاو حسومي شلونك؟
.....ها؟
ده أكولك شلونك حسومي
ممم.. ليش؟
و صفن بوجه الحجية سليمة، و حجية سليمة بدورها هم صفنت بوجه حسومي تحاول أن تفهم هذا الولد شبيه بالضبط
حتى قال أخيراً:
ها، إي آني زين
أكول حسومي، آني عندي كعك عراقي يخبل البارحة جايبته من الشارجة، شنو رأيك أجيب لك منه؟
إي.. يعني بكيفج..
يلا انتظرني هناية و هسة داخلة أجيبلك اياه.
لما فاتت الحجية بدأ حسومي ينظر فيما حوله بذهول، للسما، للحوش، للباب، و هو يحاول أن يجد أجوبه لأسئلته الكثيرة حول سبب وجوده في هذا المكان مثلاً، و هل قادته رجلاه أم هو الذي قادهما؟
رجعت الحجية و انطته لحسومي قطعة الكعك، و هو أخذها دون حتى أن يقول شكراً، أو ربما قالها و لكن لاقطات الصوت المتطورة عند الحجية ما كدرت تلكطها، فحسومي له وجهة نظره الخاصة في مثل هذه الأمور (أم هزيبر كايلة له عيب يسلم ع النسوان)
ها عجبتك؟
إي، يعني.. زينة
بالعافية..
ثمَّ ترددت الحجية:
أكولك حسومي، إنتوا شوكت حتسافرون لمصر؟
ها؟ ما اعرف، قصدي ما أدري..
زين أكولك وين رح تروحون بمصر؟
قصدج يا مدينة؟ آني أريد أروح لشرم الشيخ لأن بيها هواية عراقيين.
شنو، إنت هم ده تدور عريس؟
ضحك حسومي، و الحجية هم ضحكت و استبشرت إنه هالولد يمكنه أن يفهم بعض الأمور..
يعني إنتوا حتروحون لشرم الشيخ؟
بس بابا يكول شرم الشيخ بيها هواية مصاليخ..
ها يعني ما حتروحوا لها؟ زين وين حتروحون؟
دريم لاند؟
ها حتروحون لدريم لاند؟
تحمس حسومي و قال: الشيخ زايد؟
هنا كبت الحجية على حسومي:
لك يا شيخ زايد!!
بس لما شافت حسومي اخترع، هزت رأسها باستهجان و حاولت تهدي من لهجتها:
يا حسومي شيخ زايد شجابه بالنص؟ مو إحنا ده نكول..
لكن حسومي قاطع الحجية بعدما اكتشف حقيقة مفاجاًة و استنتاج خطير من استنتاجاته:
مدينة الشيخ زايد هم بيها مصاليخ؟!! بس شلون هو ما يقبل يصير بالمدينة مالته مصاليخ.
ها حتروحون لمدينة الشيخ زايد؟
صدووك؟ بس عفية آني أريد أروح للجيزة لأن بيها إهرامات.
هنا ثارت ثائرة الحجية و شعرت برغبة جامحة في تقطيع ملابسها، و لكنها لزمت اعصابها، لأنه أكو موضوع مهم لازم تخلصه أول شي:
حسومي، إنطيني الكعك
انطاها حسومي الكعك عن طيب خاطر(يجوز الحجية جوعانة؟ كلشي جائز..)
حسومي.. روح من هنا، مااااا أريييد أشوف خلفتك هناية مرة لخ، افتهمت؟ ما أريد اشوفك
هناية؟ خلفتي؟
لك إمشي ولليييي!!!
و رمت بحسومي خارج المنزل..
و مثل ما شايفين، الظاهر حسومي هم ما انطاها نجدة!
.
.

و قف حسومي يراقب منزل الحجية من الخارج و هو يسمع الصراخ و صوت تكسير الأغراض، لا يدري حسومي لماذا شعر بشيء، و لماذا جعل ذلك الشيء أذناه تحمران و يده تمتد إلى رقبته لتحكها، نعم، فقد شعر حسومي بالرثاء للحجية
فمن المؤلم أن لا يكون في بيت الإنسان منا الأغراض الكافية لتكسيرها!
ماذا يملك لها؟؟ لا شيء
تركها و عاد أدراجه للمنزل و لم يبقى أمام المنزل إلا البزونة العرجة

هناك 33 تعليقًا:

Her0iNe يقول...

خطيه حسومي ابد مايستاهل
وخطية الحجية هم ماتستاهل بس ميصير تكسر ابخاطر الولد وتاخذ الكعك منه مو خطية بله يعني هو اذا ما يعرف التفاصيل شيسوي ينطي تقرير من عنده

عاشت ايدج ختونه
heroine here

حبارير - السعادة - انطلاقة يقول...

رائعة

وماتعة

أنت رهيبة يا خاتون

سلمت يداك

وربنا يهدينا بمصر,ويطهرها من المعاصي ومن يحبون أن تشيع الفاحشة في الذين آمنوا

والله نريدها(مصر) طاهرة نظيفة ونحاول لكن لا مكان للطهر هنا

كما قال أسلافهم

أخرجوهم من قريتكم إنهم أناس يتطهرون

كتاباتك صدكي ممتازة

*الخاتــــIraqi Ladyـــووون* يقول...

هههههه هيروين ما يضره شي إذا كال ما ادري، حسومي هذا عالم وحده..

حبارير.. وينك من زمان؟ أنا قلقت عليك قوي..
آمين يا حبارير، و الله يطهر كل بلاد المسلمين و يهدي كل شباب المسلمين يا رب..
بس خليني أستفسر، إنت عجبتك الحدوتة بجد و عشان بس فيها رحلة لمصر؟؟؟هههه

تقبل تحياتي

زهرة الراوي يقول...

خاتون يا خاتون !
أضحك الله سنك .. الصدق يعني حسومي هذا تحفة الزمان ..
والله انقهرت عليه لمن أخذت منه الكعك !

اليوم جنت أدرّس أخوتي وإذا واحد بيهم كان يتكلم مثل حسومي ! وآني أقول يشبه منو أو يحجي مثل منو ؟؟ ههههههههههههههههه طبعاً صاير يشبه حسومي بأثر رجعي من المدرسة وعدم الرغبة في الدراسة .. بس باللعب أينيشتاين!

سلمت يداك خاتونة :)

Ahmed Moghazy يقول...

بصراحة مش قاهم قوى لانى مش بتقن اللهجة العراقية . ياريت تكنبى بلغة عربية فصحى شوية عشان كل العرب يفهمو بسهولة

نحياتى

رابعة العدوية يقول...

ههههههههههههه


زهرة خطية شايلة هم حسومي


هههههههههههههههههه


عاشت إيدج خاتون وان شاء الله نشوف منج المزيد


وأقول أشو أبو الحسن مختفي ؟ أخاف هالمرة راسة كبر بحيث حتى من يندار هم ميطب بالباب

*الخاتــــIraqi Ladyـــووون* يقول...

زهرة كلهم هيجي، بالدراسة أغبياء و باللعب أنيشتاين، الله يساعدج على أخوج هههههههه

رابعة، أي أبو الحسن مزاعلنا هالأيام، بس لا خطية مشغول يا عيني يقهر..

*الخاتــــIraqi Ladyـــووون* يقول...

أحمد مغازي، ما أقدرش اساعدك في دي تحديداً، يعني عايزني أترجم كل الكلام العراقي ده للهجة الفسيحة؟
عموماً إنت لازم تاخد دورات باللهجة العراقية لأنه عمرك خسارة لو ما فهمتش الكلام و البلاوي اللي فوق(خخخخخخخخ)

تقبلوا تحياتي جميعاً

مووو ...ياسر يقول...

جميل ماتكتبيه ياخاتون
ففي كلماتك تلتقي جديه السرد مع (فطاره) الشخصيات....
فيبــــ.... اوووي كافي فصحه
.
يعني عبالك شفت فلم مصور مو قريت قصه
.
واتمنالله الحسومي سفره سعيده وانشالله يتونس ويتسلب ابمصر ويكون جوازه جي ويدخلوه ويشوووف الاخوان الصعايده اجدع ناس......
.
.
هههههههه وبلنسبه لسؤالج الي بلتعليق
فاعتقد انه الدجاجه اجتي كبل البيضه
لان كلشي انخلق بشكل كائن حي والبيضه منكدر نعتبرها حيه.
.
.
ومثل مكال احد الزعاطيط المتواجدين حاليا بقربي...

...اذا جانت البيضه كبل الدجاجه
منو الي كعد على البيضه حتى اتفكس
.
.
موووووبله
.
.
ههع
.
مع تحياتي وعاشت الايادي
.
.
فااااااااااااعل خير... مرفوع بلظمه

غير معرف يقول...

ههههههه
اسف خاتوون
صارلي ساعه اعيد واكتب ومادري
لازم الا ختم من الخاتون الى تمشي معاملتي
.
خوش فيكه
هسه اني هم اسويها

*الخاتــــIraqi Ladyـــووون* يقول...

لاء لاء لاء ، هذي الحركات مو عليَّ، شنو مو ياسر؟ إنت أكيد المدعو ياسر عووماد بس متنكر.. أو ياسر عووماد ما بعد مرحلة العلس..
عموماً إذا شفته لياسر سلم لنا عليه و كوله: هاي وينك من زمان يمعود؟ و السؤال المطروح في مدونتك لازم تجاوبه و لا تتعب اعصابي و ياك.
كح كح، شفت شلون تعبتها لأعصابي؟ و آني كله و لا اعصابي..
لازم تجاوب و إلا ستدخل في مرحلة علس جديدة (حكول لأعمامنا إنت المدعو شلش العراقي خخخخخ)..

المهم خل أسولف لك شنو ردود فعلي ع التعليقات..
بينما آني داخلة و إذا بخمس تعليقات.. و ارتسمت على وجهي البسمة بعد تعب الدوام، و عندما اكتشفت كونها كلها نفس التعليق، ارتسمت على وجهي خيبة الأمل، و لكن هم مرة لخ ارتسمت على وجهي البسمة بعد ما عرفت إنه آني بهذه الطريقة تمكنت من تتعيبك (خخخخ)

*الخاتــــIraqi Ladyـــووون* يقول...

حسومي ما كدر يسافر لا هو و لا أهله، طبعاً لأنه فيزا لمصر ماكو، و جواز جي توهم طلعوه.. و الحجية حالياً فرحانة..

و ختاماً اشكر لك إجابتك على أسئلتي المحيرة و على الحكمة التي نقلت لنا اياها على لسان أحد الزعاطيط و مثل ما يقول أحد الزعاطيط أيضاً(خذوا الحكمة من افواه الزعاطيط)


شرفني مرورك كثيراً و تقبل تحياتي

Abu Al-Hasan يقول...

ابو الحسن دائما موجود ومتألق بس المشكلة انه اللابتوب ابدا مو متألق وشوية شايل عليه ما اعرف ليش

المهم صاحبي يفتهم بالكومبيوترات سوالياه وهسة صافي يا لبن حليب يا اشطة

رابعة انتو شنو سالفتج؟؟؟اشو مثل مقتدى(حيشاج) كل غطة ولا الاخرى وعلى غفلة تطلعيلنة(ما اريد اكول مثل القضا المستعجل على كولة المصريين) بس والله تريدين الصدك اني المشكلة كمت مدا افتهم منو الديعلقون هنا اشو صارت سوك هرج (لتضوجين خاتون بس اني ما احب الغرباء) فشوية انطويت على نفسي ومن كثر ما انطويت صرت عبالك دودة قز...

بداعتي لحد يزعل بس اني احب ابرط اللي بقلبي والظاهر والله اعلم انه اني الى حد ما عكرة فلهذا ما احب بعض الامور التي تبدو للباقين عادية او ما ادري شنو السبب...

طبعا خاتون راح تزعل وتدز عليه سودة الحسودة تكومني بعين ما تكع بكاع بس ممكن نتناقش خوما راسا الا تكلب مكافش مو لو مو مو ؟

*الخاتــــIraqi Ladyـــووون* يقول...

أخيييييراً إجا أبو الحسن (إهيء إهيء)
سلامة اللابتوب مالك عيوني، و سلامتك إنت همينه..
آني أكول ابرط اللي بكلبك، و بعدين لما يصير لك مجال، إقرا اللي برطته قلوب المعلقين ..

تقبل تحياتي و مية هلا بيك

رابعة العدوية يقول...

أبو الحسن .. لاتعليق

Abu Al-Hasan يقول...

هو اني لو باقي لا تعليق على هل مدونة جان هواية احسن بس مثل ما ذكرت اني احب اكون صريح وهاي وجهة نظري...اما مسالة لا تعليق مال رابعة فما افتهمت ليش(او بالاحرى افتهمت بس مغلس)...اني احب واحد يتعارك وياية حتى نكدر نوصل لفد حل اما انو انتي وخاتون تسوون علية عصابة ومتتعاركون وياية فهاي الماجنت منتظرهة منكم.

خاتون ابدا ما تنزلين عن مستواج الراقي بالكتابة واظل ازن براسج حاولي تشوفين شلون تنزليهة بكتاب واذا تريدين اني جاضر للمساعدة

*الخاتــــIraqi Ladyـــووون* يقول...

شكراً عيني أبو الحسن ما تقصر، عموماً هي رابعة تره من يوم ما كلت لها أبو الحسن هدد إنه يشمر روحه من السطح وافقت ع الموضوع، و هذا الـ (لا تعليق) كان بعد الموافقة..

بس ما ادري شكولك، يعني إنت ما شاء الله مو لاكي وكت و ولا أحد لاكي وكت، حتى هارت روز تقريباً مقفلة مدونتها..

رابعة العدوية يقول...

مفتهمت وجهة نظرك بشنو ؟

وصراحتك علمود شنو يعني ؟ علمود ديدخلون غرباء ؟!

فذولة مو غرباء أي واحد يدخل المدونة يا هلا بيه بيته و ( مطرحه ) على قولة إخواننا العرب ، ما لم يتعدى حدود الأدب بالكلام ...

وكل الي ديردن أصلا جانوا غريبين وانت منهم وبعدين صاروا أصدقاء تكاد لا تخلو أي تدوينة من تدوينات خاتون من وجودهم وتشريفهم

وصح خاتون مثل ما قالت آني وافقت على المشاركة وياكم ومن زمان حتى قتلها من عيوني بس كتلها لا يلح عليه بالنسبة للوقت يعني أي شي يطلبه آني حاضره بس ميستعجل عليه لأن آني ثانوية عامة ، واني جان عبالي انو هي قالتلك بس الظاهر هسه يللا قلتلك

وعالعموم آني حتى من رفضت ما جان بسبب تكبر لا سامح الله أو شي ، بس لأ نأعرف قدراتي متواضعة متناسبكم ، ووقتي هم متواضع

أما بالنسبة لمبدأ العراك مال حضرتك فسوري ميناسبني

وعموما أشكرك على إسلوبك اللطيف بالرد

ومدا أشوف أي احد مسوي عصابات هنا

وإن شاء الله أكون متواجدة دائما وما اصير مثل ( مقتدى الصدر )


أطيب تحية ،،،

بـابـل يقول...

شلونك حبابة

لك وحشة والله ولسوالفك الحلوة

اللي تحرك الضكة غصب فوق شفايفى


وموبس


بابل

*الخاتــــIraqi Ladyـــووون* يقول...

بابل عيني هو آني اللي ماكو لو إنت ماكو؟؟ أشو آني أدخل و أسلم عليك و اتفكدك و إنت ما ترد..
عموماً هلا بيك، و ثل ما تدري هناك مؤامرة لجعلك تضحك غصباً عنك.. حتضحك يعني حتضحك..

رابعة العدوية.. أتفق وياج، و يا ريت إذا أبو الحسن مزعوج من شي يكول بلا ما يذب بسامير، لأنه الجو صافي و ما بيه أي غيمة يعني، إلا إذا أبو الحسن شايف فد غيمة..

تقبلوا تحياتي

Abu Al-Hasan يقول...
أزال أحد مشرفي المدونة هذا التعليق.
*الخاتــــIraqi Ladyـــووون* يقول...

أبو الحسن، أبو الحسن..
آني مو فاتحة المدونة هنا حتى أربي الناس و أحاسبهم على اللي يسووه و المايسووه..

إذا هو مو عاجبني لسبب معين، نتناقش آني وياه بمدونته..
يعني شلون أسوي جرس على المدونة اللي يعلق يستأذن لو شنو؟؟
الواحد بيهم إذا يكول كلام خادش للحياء أو يمس بالإسلام و بشخصية الرسول (عليه الصلاة و السلام) فأكدر بكل سهولة أحذفه، ماكو أسهل منها..


هذي مدونة.. مو مراية أرد أشوف بيها نفسي و اللي يشبهوني و بس.. آني هدفي الصالح و الطالح، بل قل الطالح قبل الصالح.

إحنا بزمن بيه هواية متناقضات، هواية أفكار.. فلازم و غصباً عنا نشوف شي ما يعجبنا لكن إحنا اللي لازم نغيره..

أبو الحسن، إنت تدري كلش زين إنت أول واحد زار مدونتي و أول واحد علق عليها، و هذا شي يخليك مختلف عن كل الناس الموجودة هنا.. إنت سيد المدونة..

تقبل تحياتي و خليك مفرفش ;)

Abu Al-Hasan يقول...

هههههههههههههههه شكرا على الرد اللطيف

وخير ان شاء الله ولا يظل بخاطرج الا الطيب

ولي عودات اخرى في اوقات لاحقة بإذن الله تعالى

ممنون على كل شي وسلام على الجميع والى الجميع

Michomeme يقول...

هلو خاتون
شلونج؟ هاي اول مرة ازور بيها مدونتج
دمها خفيف وحلوة وان شاء الله بالموفقية دائما

بس خطية الحجية شكد حاولت تجر لسانه لحسومي وهو ولا كأنو ..خارج نطاق التغطية


ههههه

الله يعين

ميشو من العراق

ابتسامة الموناليزا يقول...

مساء الخير على احلى خاتون
اولا رمضان كريم عليج وعلى اهل صيام مقبول واجر ثابت ان شالله
ترى اني متابعه للسوالفج الحلوة
وضحكيني دائما بقصص الي مكتوبة بنكهة عراقية مية بلمية
اتمنالج كل التوفيق والنجاح يارب
وعاشت ايدج على المدونة

ابتسامة الموناليزا يقول...

صدك خاتون قريت احد التعليقات من اخوانه العرب يريد ترجمة سوي قاموس للهجه العراقية مترجم لعربية الفصحى
اقلاها يفهمون شوي مصايبنا
وعلى كولة المثل/شر البلية مايضحك

*الخاتــــIraqi Ladyـــووون* يقول...

رمضان كريم حبيبتي، شفتي البنر مالي؟؟ يملخ مو بالله، هاي آني راسمته بالبينت.. خوما بس إنتوا ترسمون.
طبعاً ده أفكر أسوي قاموس عربي-عراقي للأخوة العرب خخخخ منو يشترك ويايه؟

أهلين ميشو هلا بيج بمدونتي، و ان شاء الله ما تكون الزيارة الأخيرة، آني هسة هم أشوف مدونتج..

تقبلي تحياتي

Abbas Hawazin يقول...

خاتون انشالله كل عام و انتي بخير بس عندي فد كلمتين اكولها, بالصدفة قرأت لك تعليقا أظنه كان على مدونة المكاميع...مع الأسف خاتون طلعتي انتي تاليتها تميلين الى تحليل الأمور بسطحية لا يستهان بها...ولو ما ألومج لان يعني الثقافة الي احنا تربينا عليها اكيد تزرع بالفرد نزعة انه يذب الصوج على غيره العدو الأزلي الماتصير له جارله, بس تره كافي, يعني ورا كل هالخراب اللي صار و بعدكم مصدكين المشكلة مو بينا احنا...هم يكولولي يهود...هاي نظرية المؤامرة خلي يولن, والله كل ما اشوف واحد يسولف بيه اكول هذا مرتاح يسولف من موقعه و هوه السبب في عجزه...شنو اليهود تره مو آلهة كل شي يتحكمون بيه, و اذا فد شي فأقلها يستحقون الإعجاب في انه كدروا يتلاعبون بقوى عظمى في تحقيق مصالحهم الشخصية, بينما إحنا كاضيها مرتاحين كلش بس بينا نصدر إتهامات ((على كولة عبدالله القصيمي : العرب ظاهرة صوتية)) ما ادري شلون تحجون الحجاية و تصدكوها.
تحياتي و ما عدا هالكلمتين اتمنالج الموفقية.

CAIROCOMPUTER يقول...

الأحت صاحبة المدونه
تحيه طيبه وكل عام وانت بخير وصحه وسعاده انت والأسره
نحن اول برنامج أذاعى فى الشرق الأوسط عن النت والمدونات ويذاع من أذاعة مصر الرئيسيه يوميا صباحا عدا الجمعه ويعود بعد العيد ان شاء الله
مررنا بمدونتك بالصدفه ووجدناها الحقيقه جديره بالأهتمام...وتستحق ان نشير اليها فى برنامجنا الأذاعى ..لأن بها فقرات يمكن ان تكون موضوعا لحلقات فى البرنامج ...نرجو الا يكون لديك مانع...ثانيا يسعدنا ان تشاركى انت وزوار مدونتك بالراى فى الأسئله التى نطرخها فى مدونة البرنامج وتكون هذه الآراء موضوعا لحلقات فى برنامجنا
المدونه
http://netonradio.blogspot.com
وموقعنا وبه كافة التفاصيل
http://dear.to/cairo

*الخاتــــIraqi Ladyـــووون* يقول...

أخويا صاحب الراديو أهلاً و سهلاً بيك، و إن شاء الله حسوي كل اللي إنت قلت عليه..

أخوية عباس هوازن، آني أتفق معك تماماً في وجهة نظرك، و لكني كنت أحلل الموضوع من منظور سياسي بحت و كل ما أقوله هو حقائق..

تقبلوا تحياتي

amr يقول...

عذرا لم يكتمل تعليقى

اتمنى ان لا تكون هذه أسأه لمصر

أفتكر كل بلد فيه الطيب والخبيث

ولكننا نتمنى كثره الطيب

أرى انك تمتلكين الموهبه أتمنى ان تستخدميها فى الدعوه الى كل ماهو طيب

وليس ذم الناس ودولهم

خالص تحياتى

اكاديمية ابوعاذرة التطويرية يقول...

ما شاء الله مدونه رائعه


يعطيك العافيه

غير معرف يقول...

ليش العراق أصبح ملطشة إيران تضرب الحدود العراقية وتركيا تضرب الحدود كذلك و الحكومة نايمة في العسل .....
رحم الله صدام فارس العراق 0