بكرمي الخاتوووووني الأسطوري ، سأسمح لكم بتصفح التي هي .. مدونتي
أرجو لكم وقتاً ممتعاً

السبت، 9 مايو، 2009

مخلوقات خطيرة!

ياي، أول مرة أكتشف بأني مخلوق خطير!
فبعد الفيروسات، و أسامة بن لادن و أيمن الظواهري و أحمدي نجاد و كل من هم موجودون على قوائم الخطر، ظهرت الخاتووون
فقد ورد إسمي ضمن قائمة الخونة اللي قرر تصفيتهم بتهمة التهجم على آل البيت، و بتهمة إني ناصبية!
هذا ضمن التهديد اللي وصل لمنظمة كتاب من أجل الحرية.. طبعاً هم مسوين (قص و لصق) لأسماء الكتاب دون التفريق بين كاتب و آخر و دون تقديم الحجة، و يمكن ما منتبهين أصلاً على إسمي..

لالالا، آني هيجي زعلت عليكم، و إنتوا ما تدرون لما ازعل عليكم شيصير!
آني بس أريد أسأل هذوله اللي يهددون، جربتوا تتحاورون ويا اللي كاعد تهددوهم؟ ليش ما تحجون وياهم بدل ما تقتلون و تسفكون الدماء؟
بس كولولي إنتوا، صار لنا ست سنين نتكاتل بيناتنا شحصلنا؟ و إنتوا شحصلتوا؟ ليش ما أي واحد عنده أي اعتراض يصير رجال و يحجي هنا، على الطاولة المستديرة؟
و بما إنه ما عندي طاولة مستديرة، فتعالوا نحجي على المدونة المستديرة،و ليثبت بالحجة إنه الخاتون أو أي أحد من الكتاب تهجم على طائفة أو على شخصية؟
يعني قابل بس إنتوا تعرفون تشيلون سلاح و تكتلون بالعالم؟ ليش آني ما اعرف؟ طبعاً ما اعرف يمممه!

آني بالنسبة إليَّ أنتقد أي شي أشوفه غلط، ما عليَّ جان من شيعي لو سني لو كوردي .. أو عوربي، و آني مو مع طائفة ضد طائفة و لا (أناصب) أحداً العداء، فعدوي هو عدو وطني و أبناءه مهما كانت أعراقهم و مذاهبهم..

ما اكول غير الله يهديكم و يطيب خاطركم يا رب.

بما إننا نحجي عن المخلوقات الخطيرة... شفتوا بالله مرض انفلونزا الخنازير؟؟
هو صحيح لا يرى بالعين المجردة، بس آني قصدي سمعتوا شديصير و شكيد ديموتون ناس؟
اللهم لطفك يا رب
آني الصراحة خايفة يوصل المرض هنا خصوصاً إنه هنا مجتمع منفتح على كل الجنسيات..
طبعاً مو بس آني خايفة، الكل هنا عنده نفس المخاوف، و حتى سودة الحسودة هم خايفة، فهي تخشى على الخنازير من أن يساء لها بسبب الإنفلونزا، و ظلت تراقب بقلق عميق ردة فعلي تجاه أي خنزير قد يفكر إنه يمر بالشعبية..
و بدأت سودة الحسودة تناشد أبناء الشعبية بتسمية الفيروس بأتش ون أن ون (على الله يكون الإملاء صحيح) و إنتوا ما تعرفون شلون سودة الحسودة تناشد، من هاي المناشدات اللي تخلي الواحد ما ينام بالليل..

هاي سودة ما ادري.. بطرانة لو تتفلسف، لو خلصت المشاكل ببيتهم و جاية علينا إحنا.
ما ادري سودة الحسودة شوكت تعوفنا بحالنا و تلتهي بروحها
و طبعاً حسومي و نوساااا هم عدهم مخاوف
خاتون؟
ها
هو انفلونزا الخنازير سموها ع الخنازير؟ لو الخنازير سموها ع الانفلونزا..؟
.....
ها اكولج؟
....
ها اكولج؟
.....
خاتون أكولج..؟
أي حسومي سمعت سؤالك لا تظل تلح
زين لعد إذا سمعتي سؤالي ليش ما ده تجاوبين؟ يعني إنتي هسة ما تكدرين تجاوبين؟

أهووو ، شنو هالأسئلة المحرجة؟ يصير هالشكل؟
يعني إذا أكوله ما اكدر أجاوبك، هسة عباله آني من صدك... ما اكدر اجاوبه
و ستسقط صورتي اللميعة من نظر حسومي.. و آني عندي كله إلا تسقط صورتي اللميعة من نظر حسومي
فلازم أشغل مخي حتى ألكى له من هاي الأجوبة المبهرة، لمزيد من اللميع في صورتي الخاتونية بنظر حسومي

حسومي هو شنو جان سؤالك؟
ها سؤالي؟ يا سؤال؟ ها أي أي سؤالي؟ اممم ممم، هاي الانفلو..ونزا مال خنازير
أيييي؟؟
يعني هي ليش سموها على الخنازير؟ ما ادري سموا الخنازير عليها.. ليش ها؟

هو سؤاله للأمانة لو خله عيوني تنحول، لو عيوني خلت السؤال ينحول، واحد منهم، يلا نبدي تأليف:

شوف حسومي، هو الخنازير سموها على إسم الانفلونزا، و الانفلونزا طبعاً أصلها عربي جاية من (أنف) معناها خشم، و (لوا) معناها إنه هي تضوج الخشم فتلويه، و (نزا) يعني هيجي تنز، تضوج من نوع الصوت مال الواحد يتغير.. زين؟ فالخنزير لأنه هم هيجي صوته عبالك منشول، فيعني من هيجي ... سموه خنزير.
استطعت أن أرى نظرة الذهول على وجه حسومي، فتنفست الصعداء
هنا تدخلت نوساااا:
خاتون، بس هم كالوا بالتلفزيون إنه هي فيـ.. فيرس
فيروس؟
أي، فسلون هي فيرس و خنزير بنفس الوكت؟
شفتوا نوسااا و ذكاء نوسااااا؟
حيااااتي إنتي شنو هالذكاء، حلوة و بوبااا( يعني حبوباااا) و ذكياااا!
نوسة ضحكت بخجل و باوعنا اثنينا على حسومي، أشوف بلكي أي ردة فعل تطلع من عنده و آني كاعد أمدح نوسة، بس الولد كالعادة ما اعرف وجهه من كفاه، ما ادري نوسة قصدي نوسااااا راكضه وراه على شنو..

شوفي هو إذ ربما، الفيروس هذا من يباوعوه بالمجهر بيه شبه من الخنزير، يعني طبعاً لأنه طالع من الخنازير فلازم يكون بيه شبه..
زين خاتون هو ينتقل لما واحد ياكل لحم خنزير؟
هو يعني ناس تكول أي ينتقل و ناس تكول لا.. بس إنتي عموماً حاولي تبتعدين عن لحم الخنازير هالفترة!

ياي شفتوا شلون ده أستنتج معلومات خطيرة؟
أولاً الانفلونزا طلعت كلمة عربية، فاستنتجب بعدين إنه وسائل الإعلام الغربية تتقصد أن تسميها (فلو)
و ثانياً منظمة الصحة العالمية و بالتعاون مع سودة الحسودة يريدون تغيير تسمية الفيروس إلى التسمية العلمية إتش ون أن ون خشية الإساءة للخنازير
زين بس تساؤلات بريئة يعني..
شمعنى لما صارت انفلونزا الطيور ما غيروا الإسم خشية الإساءة للطيور
و لما صار جنون البقر ما غيروا الإسم خشية الإساءة للبقر
و لما صارت الجمرة الخبيثة ما غيروا الإسم خشية الإساءة للـ .. للجمر

رغم البقر مقدس عند الهنودس، و الجمر يحلو للبعض أن يمشي عليه في الهند و الله اعلم وين، شمعنى الخنازير لأنه محرمة عند المسلمين يعني؟
إذا جان هذا السبب فمعناها من صدك بعدنا مهمين و أكو ناس خايفة من عدنا و حاسبة حسابنه!
ياااي، ما أدري ليش اشعر بلسعة و كهربة لذيذة لما هيجي أفكر..

استنتجت بالنهاية إنه إحنا كلنا مخلوقات خطيرة!

هناك 9 تعليقات:

زهرة الراوي يقول...

عالخير عالخير ..
أزغرط يعني ؟؟
أخيراً نزل البوست الجديد اللي اشرأبت له الأعناق وخفقت له القلوب كالطبول (طمبا طمبا) على كولة الأغاني العراقية القديمة مالت الأطفال.

زيييييييييين ..
أولاً شنو هاية اللائحة مالت كتاب من أجل الحرية والتهم الموجهة إلج؟؟ مفتهمنا؟؟ يعني ناشرين اسمج ويكولون إنتي إرهابية لازم يصفوج وحاطين صورتج هاية أم شعر وتاج حلو بنص ورقة مالت لعب باعتبارج مطلوبة؟؟ لا صدك اشرحيلنا حتى نعرف شلون نوكف وياج ونجهز معداتنا الحربية والقتالية!

"آني بالنسبة إليَّ أنتقد أي شي أشوفه غلط، ما عليَّ جان من شيعي لو سني لو كوردي .. أو عوربي، و آني مو مع طائفة ضد طائفة و لا (أناصب) أحداً العداء، فعدوي هو عدو وطني و أبناءه مهما كانت أعراقهم و مذاهبهم.."
عاشت إيدج هااااااااااي شنو صدك تملخين ..

ههههههههههههههههههههههههه أحلة شي خاتون مالت: "لوا" لأن تضوج الخشم وتلويه ههههههههههههه

أما: "فمعناها من صدك بعدنا مهمين و أكو ناس خايفة من عدنا و حاسبة حسابنه!" خوش ملاحظة وكلش في محلهة، بس يمكن خايفين من عدنه لأنه يعرفون أنه أكيد بالمستقبل راح نرجع مثل أجدادنا الأبطال .. مو ؟؟ إن شاء الله ..
عاشت إيدج خاتونة على البوست ولخاطر الله لطوليهة بعد ^_^

*الخاتــــIraqi Ladyـــووون* يقول...

ههههههههه حلو وصفج إلي خطييير
تخيلي بالله حاطين صورتي على ورق اللعب ههههه
هو الموضوع إنه واصل تهديد بالقصاص و القتل و هيجي أشياء لمنظمة كتاب عراقيون من أجل الحرية و اللي آني عضوة بيها، و كاتبين قائمة بأسماء (الخونة) اللي على حسب قولهم يتهجمون على آل البيت و يناصبوهم العداء، و كان ضمن الأسماء إسمي..
فهمتي هسة؟

شكراً حياتي زهورة على مرورج الكريم و تعليقج

تقبلي تحياتي

رابعة العدوية يقول...

امممممممم يعني خاتون طلعتي مخلوق خطيرة ؟؟

واني اقووووول لعد ليييش ...

اييي معناته هذا السبب اللي خلاّ ...

اهاااااا هيجي

خوش لعد

بس مرح اقول لأحد تره إنو ....

اي هاهية

زهرة الراوي يقول...

زين همه على يا أساس اتهموج؟
يعني علمود كتباتج اللي هنا على المدونة؟؟ لو بغير مكان؟
ثم شنو قابل يعرفون إنتي وين!!
عاد احنة اللي اناصب آل البيت العداء لو همه اللي يناصبون الصحابة والخلفاء الراشدين رضي الله عنهم العداء؟؟
بالله ينكتون على منو ذولي !!!

*الخاتــــIraqi Ladyـــووون* يقول...

زهورة حيااااتي ، كلساع أشرح لج؟

هم ذولة اللي مهددين المنظمة، جامعين أسماء كل الأعضاء بالمنظمة و مسوي لها كوبي و بيست، هي كومة أسامي و إسمي ضمنها.. يعني هم يمكن حتى ما منتبهين عليه، فهمتيني شلون؟

كولي لهم، أشو إحنا نسمي علي و عباس و حيدر و حسين و فاطمة، و ويانا نموذج (أبو الحسن)، هم أحد بيهم سمى عمر أو أبو بكر أو عثمان أو أو؟
الحقيقة واضحة مثل الشمس.. ما اكول غير الله يهديهم.

Abbas Hawazin عباس هوازن يقول...

خيتي ان...اقصد خاتون...

بالصدفة اليوم قرأت ردا لكعلى تعقيب من حضرتي في مدونة سابقة (جعلوني ناصبية يمكن اسمها), ما ادري انتي شمفتهمة عني و يا بيت شعر في مدونتي لم يعجبك بالضبط, بس للعلم و الإطلاع اني كنت سنيا و معظماويا في حياة سابقة.

دمتي سالمة, وارجوك الإبتعاد عن منظمات طائفية هزيلة مثل اللتي نوهتي عنها, الطائفية يصعب التخلص منها ما دمنا مخلصين لمذهبنا ؛ كما يدل عليه تعليق حضرتكم اللي فوق هذا مباشرة.

attawie يقول...

خاتون
اسعدني لقاءنا و ان شاء الله انكررها

بس هسه خطر على بالي.. خو مو اكو احد مراقبج و ياخذ صور و تالي اطلع اني هم من "الخونه"

بس حلوه هال مال الانف.. لوا.. نزا! كلش حبيتها

ارجو ان لا يكون لقاءنا خطيراً
:)

غير معرف يقول...

خاتونة تعجبني كل كلماتج المليانة دلال مال نسوان وانتي محبوبة من قبل العراقيين اللي يحبون العراق قبل ميفكرون بطوائفهم وقومياتياهم واحقادهم اللي وصلتهم ان ناس تكتل ناس على اساس الهوية والعشيرة ...

نتشرف بيج وبمدونتج الحلوة وبكل تعليقاتج النازوكية المليانة غنج.

البرجوازي العراقي
http://www.birjwazi.blogspot.com

*الخاتــــIraqi Ladyـــووون* يقول...

عتاااوي ، آني هم أسعدني اللقاء..
يلا شكو بيها؟ ما تحبين نموت شهداء في سبيل الوطن؟

البرجوازي، آني محبوبة من العراقيين؟ يعني صاير لي شهرة ههههه
شرفني مرورك، و آني رح أمر على مدونتك و اشوفها بس أخلص امتحاني


تقبلوا تحياتي