جايتكم قريباً

أول شي السلام عليكم و رحمة الله و بركاته

يعني أدري هم حتكولون: خاتون يمعودة هاي وينج؟
هاي طبعاً إذا ظل بيكم أحد ليهسة يدخل للمدونة.. لأن مدونتي حالياً صايرة حديقة..
بس ما أدري يعني المشكلة إنه الكتابة يراد لها شوية مخ صافي و طقوس (كالتي يقوم بها حسومي كلما صار وقت الغداء) و آني أعترف بألم عميق بأنه حياتي مخربطة و يراد لها تنظيم، يعني لو آني أنظم وقتي من زمان جان هسة آني مستمرة وياكم من زمان، بس ما أدري ليش ما أنظم وكتي..تنظيم الوقت ضرووووري.
يعني باختصار بريستيجي هالفترة متخربط..
كاعد أدرس الآيلتس، و هذا بعيد عنكم مو بس صعب .. و مو بس كلش صعب
يشوي شوي!
امتحاني يوم السبت، آني وميتين واحد.. يا يابه!
أكولهم شنو يوم الحشر؟ إعدام جماعي؟

الله يعين كل واحد عنده مثل مشكلتي، و هسة إن شاء الله بالعطلة رح ترجع الخاتون و تذب رمانات..
و اللي يكول عني ناصبيه.. آني أكوله إنت ناصبي، زين؟
يلا كافي حجي لازم أروح أقرا

تقبلوا تحياتي الحارة

فضفضة (بيني و بينكم)

ها قد جاءت الخاتون ببوست جديد، بوست تحفة، بوست مو مثل أي بوست
بما إنّ الخاتون بدأت بتكريس سياسة التعريب فخلوني أستبدل عبارة (بوست) بعبارة (تدوينة)..

يمكن هواية منكم يتساءل بحيرة: شنو هالعنوان الفطير؟ و عن ماذا جاءت الخاتوون تتحدث؟
و جني أسمع أحد يكول: أهو هاي هم كاعد تتعزز علينا و تغيب و تخلينا نكول وينها و مرة تتحجج بالدراسة و مرة ما أدري بشنو
هو فعلاً آني أشو صايرة هواية أتعزز و هذي ظاهرة جديدة قد يكون لها تأثير سلبي مستقبلي فيدرالي على بريستيجي (ماء وجهي)
ماء وجهي!!
هو ظل بوجهي ماي؟ هو الواحد يوميا يشوف هالبلاوي يظل بوجهه ماي ؟ حتى كلاص الماء هم ما يظل..
آآخ لو بس تدرون خيتكم شكيد تعاني، الله شاهد أكتب و امسح دمووع... حتى ما عارفة شاكتب أريد بس أكتب أطلع هالــ ..... هالحصرة ، هالخنقكة اللي حاسة بيها، حاسة..... جبااااااااال على قلبي..
ما أدري....
هاي شصاير بالدنيا؟؟ ليش هيجي الدنيا ما حلوة و الناس مو حلوين؟
ليش ما حد راضي يعوف أحد بحاله؟
ليش حتى الناس اللي الواحد ما عنده شي وياهم مستعدين يعادوه بأول فرصة؟
ليش الناس تكول كلام و تسوي غير الكلام اللي تكوله؟
ليش الإنسان اللي ما بينك و بينه شي ينتهز أي موقف حتى يأذيك في سبيل يطلع هو عنده شخصية و فاهم؟؟
ليش أكو ناس يفهمون سكوتك عن تصرفاتهم و أذيتهم ضعف، و ما يتركوا لك خيار غير تنطيهم العين الحمرة؟؟ ليش بس اريد أفتهم ليييييييش؟
كل شي جنت شايفته حلو تغير، لا عمري عرفت أكره و لا أحقد، بالعكس جنت أحب كل الناس..
آني تعبت، أحس ما ظل بيَّ لا حيل و.... و لا شي

أدري ضوجتكم ويايه و كاتبه كلام بلا معنى، بس ما ادري هيجي جا على بالي أكتب و كتبت...

ها قد أقبل رمضان و خلص العيد
وي!
قصدي ها قد أقبل العيد و خلص رمضان
و زاد وزني بسبب ادائي لواجباتي الرمضانية المتمثلة بالحلويات و الأكلات الطيبة اللي تطبخها أمي (الله يسامحها) كالعادة..

شلونكم و شلون أحوالكم؟ أكيد إنتوا هم سمنتوا ، اللي ما سمن خل يعترف و آني تره نونو و بريئة و ما أضرب
يعني.. بس لما اصير عصبية.
بالنسبة إلي، عدا عن الصدمة النفسانية اللي سببتها زيادة الوزن، آني زينة الحمد لله..
غير إنَّني اعيش صدمة نفسانية أخرى ناتجة عن اكتشافي إنَّ الكلمة المعربة للـ (البريستيج) هي (ماء الوجه) أو كما أعادت (انكلزته) سوسووو إلى (ووتر اوف ماي فيس)
يعني إذا أردت أن أعبر عن مدى خربطة بريستيجي في هذه الأيام بسبب الصدمات المتكررة فلازم أكول : (ماء الوجه) مالي كلما اعدله من صفحة يتخربط من صفحة، شسوي آني (إهيء إهيء)
هسة لطشت ورقة على مرايتي، كتبت عليها: أريد أضعف .... كيلوات (ماكو داعي تعرفون جم كيلو)
خاطر كلما يراودني الشيطان و يصور لي بأنَّ شكلي ما يخرع، أذكر نفسي بالورقة الملطوشة أعلاه (خخخخخ)

شوف آني صار ساعة أحجي و ما كلت لكم أيامكم سعيدة..
أيامكم سعيدة ، و إن شاء الله ينعاد عليكم بالصحة و السلامة و العافية ياااا رب

مبروك عليكم الشهر

بمناسبة إقبال شهر رمضان الكريم أهنئكم جميعاً..

مثل ما تدرون شهر رمضان هو شهر الطاعات، شهر البركات، شهر الحسنات، شهر الأكلات و المسلسلات..
لذلك أدعو وياية و بلكي ربكم يباوع على حالنا إحنا العراقيين المساكين و ينفخ بصورتنا حتى شوية أوضاعنا تكوم على حيلها..
طبعاً قبل ما أدعي لازم أنقل لكم إحدى أدعية حبيبة قلبي أم هزيبر، بمناسبة شهر الرحمة و الغفران، و انتوا تدرون كلش زين شنو نوع الأدعية اللي تجيبها هالمخلوقة..
اللهم عليك بهم، عليك بهم
اللهم اجعلهم سبايا، ثكل امهاتهم، رمل نساءهم، يتم أولادهم، إصرع أولاد عمومتهم، إجعل أولاد خالاتهم من المخبولين فريسة لجنودك يا أرحم الراحمين
اللهم لا تدعهم يفروا من عذابك و سخطك، اللهم لا تنجهم من عذابك و سخطك.. اللهم دعهم في ظلالهم يعمهون..
اللهم عليك بكل من يريد إفساد أخلاق المسلمين و قيمهم، اللهم أرنا بهم جبروتك و قدرتك
اللهم انصر المجاهدين في بلاد المسلمين، اللهم انصر اسامة بن لادين، و هزيبر إبني، و كل الشلة اللي وياهم
آمين آمين، و صلي اللهم على سيدنا محمد و على آله و صحبه و سلم..

آني كالعادة فاكة حلكي و كأنني أتساءل: ما هذا؟
بس هيجي؟
شنو ما عاجبج الدعاء؟؟
لا بس.. بلا زحمة ما دعيتي شي لا لروحج و لا للمسلمين
هو أكو أحسن من إنه الله يروينا بيهم لذولة يوم؟؟
زين و روانا بيهم يوم، إحنا شيصير بينا؟؟
هاي إنتي كل شي ما يعجبج!
زين خليني أسمعج آني هذا الدعاء

اللهم يا ذا الجلال و الإكرام يا حنان يا منان، يا مجيب الدعاء و يا كاشف الكرب، يا مجري السحاب و منزل المياه و يا منبت الزرع من التراب.
انصرنا على القوم الظالمين، اللهم انصرنا على القوم الظالمين
اللهم انصرنا على القوم الظالمين..
اللهم نحن عبيدك بنو عبيدك بنو أماءك المستضعفين في أوطاننا و خارجها، اللهم لا حول و لا قوة لنا إلا بك، فلا تتركنا للظلمة و اللصوص يعملون بنا ما يعملون، اللهم لا تدع مظلوماً إلا نصرته، و لا مهجراً إلى أعدته لداره و لا مريضاً إلا شفيته، و لا جريحاً إلا اندمل جرحه برحمتك..
اللهم آنس كل من دفع ثمن حبه لوطنه سجناً في دهاليز الظلام و اعزه بعزك
اللهم آنس كل أرملةٍ و كل ثكلى و كل يتيم و كل وحيد لم يجد إلا إياك منجىً و ملجا
اللهم أخرج الكفار و الخونة من أرضنا، الله طهر أرضنا من أنجاس هؤلاء
اللهم أخرج الأعاجم ذوي الألسنة الغريبة من بلادنا و دعنا نعيش بسلام على أرضنا..
اللهم اهدِ كلًَّ من سولت له نفسه بغض أخيه و جاره، اللهم طيب خاطر كل من فقد عزيزاً و اجعل نار الثأر برداً و سلاماً في القلوب..
اللهم نسألك في هذا الشهر الفضيل هدايةً رحمة و عتقاً من النار و فضلاً و أجراً لا ينبغي إلا منك يا ذا الجلال و الإكرام
اللهم اعتقنا من نار جهنم، اللهم لا يقرأ دعائي هذا أحدٌ إلا كان من المعتقين من نار جهنم في شهر رمضان.
اللهم اهد من ظل من المسلمين بنورك يا نور السماوات و الأرض
و صلِّ اللهم على سيدنا محمد و على آله و صحبه و سلم..

استطعت أن أرى بعض التأثر ، و كأنني أيضاً رأيت تلك العينين الصلبتين تترقرق منها دمعة، لكنها ادعت إنَّ الموضوع هو مجرد تسرب قطرة ماء غير مقصودة..
إنتي إنسانة يا أم هزيبر، إنتي تحاولين في كل يومٍ و في كل لحظة وضع إنسانيتك في جدارٍ إسمنتي من الجهل و الحقد و حمية الجاهلية يمنع عنك الرؤية و التنفس، و هذا ما يوهمك بالقوة و العزة، و لكنه في الحقيقة لا يجعلك أكثر من مثار للشفقة.
لك أن تكسري ذلك الجدار، و لك أن تموتي مختنقة داخله..
أتمنى أن تكسريه و تجعلي الإنسان الذي بداخلك يتنفس و يرى الأشياء على حقيقتها..

السلام عليكم يا شبااب و صباياااا
كيفكووون اليوووم، إن شاء الله منااااح
متل ما شايفييين، صار وقت تشوفوني باللوك الجديد، يعني الصورة اللي بالبروفايل، و بالهيدر تبع المدونييي

ها شفتوا آني شلون أملخ؟؟ بهذا الشعر اللي شكله على كولة أخوية أبو الحسن (مسوي مشاكل)و البدلة الوردي و التاج الفسفوري الذهبي المخصص للخاتونات أمثالي، و شايلة العصاية السحرية مالتي لكي اسحركم بخرابيطي التحشيشية، و مثل ما شايفين ده تطلع نجوم خاطر كلما تدوسون موضوع يطلع لكم نجوم حتى تتونسون..
يا رب تكونون تكهربتوا لما شفتوها..
لاء؟ ما تكهربتوا؟؟ يلا مو لازم إهيء إهيء
المهم..
آني يؤسفني و يؤلمني و يحز في نفسيتي إخباركم إنه بدا الدوام مالي، وداعاً يا أيام التنبلة وداعاً يا أيها البيت و أهلا بالتعب و القرف المتمثل بالدوام مالي..
يا جماعة تعودت على الذي هو كعدة البيت، عبالك مربوطة بهذا اللي يسموه البيت.. بس إذا كعدت بيه رح يضيع مستقبلي مما سيؤدي لخربطة بريستيجي...
آني بس حبيت أكولكم خاف يصيبكم الولهان و سهران الليل، أو تهددون وسائل الإعلام المحلية و الدولية بشمر روحكم بالبحر إذا ما شفتوا إحدى خرابيطي التحشيشية بعد فترة و قدرها
و من ثم سأحاكم بالتسبب بموضة شمر الناس انفسهم بالمياه المالحة أو العذبة و سأظهر بمظهر الإرهابيين، مما سيؤدي لخربطة بريستيجي ، و آني كله و لا بريستيجي..
لذلك قررت أكولكم من هسة إنه الدراسة قد تاخذني منكم لبعض الوقت، يعني قد يبتعد الزمن بين مقالة و الأخرى إلى أن يتوفر عندي المجال الكافي..
ها قد أخبرتكم و برأت ذمتي من كل البلاوي المذكورة أعلاه..

في هذه الأثناء، أتقدم بتوجيه دعوة للناس من كل الجنسيات (أي أحد يتكلم عربي سواءً يفهم اللغة العراقية أو لا يفهم) أن ترسلوا لي أي قصة أو موقف حصل معكم مهما كان عن طريق النموذج البريدي الموجود في موقعي،ولا تقلقوا من كونه غير ذا اهمية أو تافهاً فأقصى ما قد أقوم به هو تجاهله (يرجى عدم إرسال أي مادة مخلة بالحياء).
و كذلك أرسلوا أي اقترحات و مواضيع حول أي قضية تودون مني مناقشتها و طرحها هنا بأسلوبي، و لا تكبتون أي سالوفة بداخلكم لأنه الكتمان و الكبت مو زين عليكم، و آني يا عيني خايفة عليكم، أنا بالنهاية منكم و اكتب لكم، و يسعدني كثيراً سماعكم..
و لمن يريد أن يتابع آخر مستجدات المدونة من مقالات و سوالف (دعوة خاصة لكل واحد كاتل روحه على خرابيطي) آني سويت مجموعة بريدية مبينة في الموقع، أيضاً يمكنكم الإنضمام لها و مية هلا بيكم..

تقبلوا تحياتي

مدونة بايخـــــــــــــة

بينما أنا جالسة أمام التلفزيون و الدمعة بعيوني أتابع لقطة رومانسية (ساعة ما الولد يربط حبيبته بصاروخ و يرسلها للفضاء الخارجي) إذا بي أسمع رنة الهاتف المحمول ( تلفوني) جريت الكلينكس و مسحت ما خرج من عيوني و من ... خشومي، و شلت التلفون:
ألو؟
إنتي خاتون؟
أي تقريباً
تقريباً شنو، الخاتون لو مو الخاتووون؟
أي آني الخاتوون
كان هذا صوت الحجية سليمة و شكلها عصبية و ضايجة من شغلة، هي للأمانة ما تعرف للموبايل، و لا تريد تعرف له بحجة المثل اللي يكول (كل صغيرو بيه بلا)
استنتجت بذكائي الذي يفاجأني دائماً بخطورته إنه ده تخابر من تلفون بنتها، و الأهم، إنه بنتها هي اللي خابرت لها عليَّ
خاتون، اليوم رح الم الجيران و جاية عليج
أشو آني اخترعت، و حتى الكعدة مالي تعدلت وحدها
شنو حجية يمعودة شصاير؟ عدكم ثار ويا أبوية؟ هو ناقص قهر؟ هو أبوية هذا يوميا طالعة له شغلة؟ يوميا مشكلة؟ دي عوفوا ابوية بحاله، كلكم على أبوية؟
لج دي سكتي؟ هاي شبالعة اليوم
آني شنو ويا أبوج؟؟ آني جاية و لامة لج الجيران علمود فد شغلة
ها
إي
إي ديالله هلا بيكم
.
.
جوي، الحجية و أم رسول و أم هزيبر و سوسو..
سلموا و كعدوا، جان الحجية جبيرة الكوم بدات تتململ و كأنه رح تكولي : يعني.. تره أكو عريس ده يدور على هالخلفة اللي هي إنتي..
خاتون، إحنا جايين بخصوص موضوع...
إييييي (مو أكولكم؟ كل شي جائز)
إنتي مو علساس مسوية هاي اللي .. شسمها بالله؟
مدونة؟
أي.. مدونة و خابصتنا بيها؟؟
أي علساس يعني..
آني جاية اكولج أشو ما لكيت بيها بس بيها قصص و حجي ما بيه معنى، أكول لو تسوين مدونة تكولين بيها حكم و أمثال أحسن
حجية.. إنتي قريتيها؟
لا، آني ما اعرف أقرا
لعد شلون تحجين على شي إنتي ما قاريته
أم رسول من يمها:

أي بس آني قريتها، هاي شلون فاضحتني و مشرشحتني كدام أمة محمد؟ ما تستحين و لج آني بكد أمج؟
يلا ام رسول لا تزعلين مني، مو آني حتى روحي شرشحتها بالمدونة...
هنا قاطعتني: أي، و عيني شنو على القصص مالج بيها رموز و ما أدري شنو تقشمرينا؟ شنو رموز؟ لعد كل هذولة الناس اللي ما عدها مشاكل و تكعد تخربط و تكول فد جلمتين تضحك لو تسولف سوالف ما بيها معنى هم تكولج آني حاطة بيهن رموز، شنو هالضحك على خلك الله اللي كاعدة تسويه؟؟
جان سوسو، الخائنة سوسو (إهيء إهيء) كالت بحماسة:

إي و ليش مسويتها هيجي دارك بربل ليش مو لايت أكثر؟
بعدين إنتي شنو بس تضحكين و تكتبين قصص، ليش ما تكتبين شعر.. الدنيا ما بيها ألم؟ ما بيها معاناة؟ ما بيها ... رومانسية و حب؟
أشو بهالجم كلمة الأخيرة مال سوسو حلكي انفتح و راح على صفحة، و خشمي تعقج
الواضح بأنَّ صلوحي ده يشتغل ع البنية خوش شغل.
زين إنتوا إهدوا..
هدينا
شربوا جايكم
شربنا
حطوا رجل على رجل
حطينا ..

جان الحجية تكول: آني ما اكدر، رجلي بيها سوفان
أدري حجية، مديها أي شي سوي، بس المهم تسمعوني و تخلون مخكم وياي..

حجية سليمة، سهل أجي أسوي مدونة أكتب بيها امثال و شعر، لكن المثل و الشعر و الحكمة تنسي بسرعة و ما ترسخ بالمخ، لما تصير قصة توصل الفكرة للناس أسرع، و بعدين إنتي امثالج وحدها مكفية و موفية..
أم رسول، آني لو جاية أتونس أتونس بشي ثاني.. هو صحيح آني متونسة ويا الناس الحلوة اللي كاعدة تزور مدونتي و تتواصل وياي.. لكن مو الهدف الأساسي الونسة، آني صحيح( ناصبية) و مو دائماً القصص مالي بيها قضية جبيرة، بس هي إجمالاً أعني بها أشياء معينة و جهات معينة و شخصيات معينة (أو مو معينة) و القصة الوحدة بيها أحياناً أكثر من محور واحد..
سوسو.. مثل ما تكول الحجية سليمة (اليدري يدري، و المايدري يكول جف عدس) آني لوما القهر و المعاناة و الرومانسية الشديدة اللي أشوفها كل يوم في حياتي ما جنت حسوي المدونة أساساً.. و شر البلية ما يضحك..
أما بالنسبة للشعر، آني أعرف نفسي مو زينة بالشعر و لا إلي واهس بيه.. و لو كنت مثل هذولة اللي (يصفطون أي حجي) و يسموه شعر لكنت أنا أشعر منهم.. و لكن للشعر رجاله و نساؤه.. و عموماً لو شفت من نفسي أي موهبة شعرية مكبوتة و حرام ما تطلع و تخترعون بيها، ممكن اتكرم عليكم و أحطها ..
و إذا مو عاجبج كولور البلوج مالتي و تريدين شي لايتر أو بيبير، تدللين آني هسة ده أشتغل على أشياء بالمدونة و بحيل الله حتعجبج

باوعت على أم هزيبر بس أشو ساكتة:

ها أم هزيبر إنتي شنو اعتراضج؟؟
يا ترى ليش جنت عارفة شنو حيكون اعتراضها؟؟؟
المدونة مالج بدعة شيطانية، و خضوع بالقول..
أيابة!!!
طبعاً، و عموماً السفهاء ما يفيد بيهم الحجي، بس كلت أكولج و عجبج عجبج، ما عجبج خلي نار جهنم تفيدج!

يعني هاي المرة أكيد أكيد تاكل سموم محرمة دولياً قبل ما تحجي ويا الناس .
جحظت عيوني و انتفخت أوداجي و كنت على وشك الإنقضاض على أم هزيبر، بس أم رسول كاعدة و خاف تشمت بينا مما سيؤدي لخربطة بريستيجي و آني كله و لا بريستيجي

إهييييي إهييي .. أول مرة بحياتي أكتشف إنه آني سفيهة
ماشي يا ام هزيبر، ماشي! تستغلين المثلث السني اللي يربط بيننا و نازلة كفخاً و تجريحاً بكرامتي و بريستيجي..

هسة كل واحد عنده نفس التساؤلات السابقة يا ريت يكون جوابي هذا مكفي و موفي..

آني جديات حسوي بعض الأشياءات و الفيكات على مدونتي وأكيد رح تتكهربون لما تشوفوها (و هو المطلوب)

ترحيب

لكل العراقيين من الشمال إلى الجنوب و من الشرق إلى الغرب .. من الشمال الشرقي إلى الجنوب الغربي (و العكس صحيح)
و لكل الأخوة العرب (حتى لا يزعلون علينا أكثر ما هم زعلانين)
أكول
يا مية هلا بيكم بمدونتي و يا رب تتونسون بيها، و خلونا عاد آني وياكم نسولف شوية و نسوي (شاشينج) على قولة الناس المثقفة، شنو رأيكم؟ منو قال آني مهتمة برأيكم ؟؟؟ آني رح أسولف وياكم غصباً عنكم، و اللي ما يسولف ويايه المفخخة تقول كلمتها..
شحب أسولف لكم أول شي؟؟ أسولف لكم عني شوية علمود تعرفون منو آني.. آني فد وحدة..

فد وحدة عمرها صغير بس شافت أشياء هواية ناس بنفس عمرها ما شافوها، أو يمكن شافوها بس مو بالطريقة اللي هي شافتها و تعاملت وياها، يمكن أخذوها بشكل سلبي.. يمكن يأسوا، يمكن ضعفوا، يمكن حقدوا، لكن خيتكم بحيل الله متفائلة بالمستقبل مثل هواية عراقيين و عندها هدف جبيييير أهداف و أهداف و أحلاااام ما تخلص، مو بس لنفسها.. لبلدها و لعالمها و تتمنى بلدها الجريح يتعافى و تتمنى يرجع على الأقل الأمان حتى ترجع من الغربة تبني و تعمر و إيدها بإيد أبناء بلدها، منو بيكم عنده حلم للعراق؟ منو بيكم يتمنى العراق يصير أحسن بلد بالدنيا و أغنى بلد بالدنيا و ترجع بغداد أم العلوم و المساجد، و ترجع بساتين البصرة (رحت قبل كم سنة للبصرة عبالي رح ألقى بساتين و نخل، و دينكم بس صبخة و جم نخلة قرعة)؟ منو ما يريد يرجع العراق أحسن حضارة بالعالم، و تزدهر السياحة بكل أرجاء العراق الحبيب و إحنا عندنا المعطيات كلها، جيبوا لي بلد بيه هم ثلوج و هم صحاري و هم غابات و جبال و هم أنهار (نهرين طوال اسم الله عليهم) و بحر و أهوار و بحيرات، لا أكو كوارث طبيعية و لا خط زلازل و لا شي ، جيبوا لي بلد مدفون بيه هالعدد من الأولياء و الصحابة و غيرهم.. ما جنا نكدر نصير أحسن من كل اللي هسة شافوا روحهم علينا ورا ما لفطوا من خيرنا و قلبوا علينا؟؟
يبووو ....

هاي الخاتونة شدحتجي؟ إحنا على سره البنزين نطبخ باميا و نسكف سمج، و بين جتي الكهرباء و راحت الكهرباء و جتي الوطنية و راحت المولدة راسنا افتر، و بعز الحر مقلين وحش الطاوة و قاعدين ناكل من القهر، و مغاوير الداخلية من صفحة و الإرهابيين من صفحة و جيش المهدي من صفحة و غير العلس و القتل و الرشوة و الوسخ و و و .. و تقول ماكو كوارث طبيعية، لعد ماكو كوارث قاعدية و صفوية و أمريكانية و صدرية و بطنية و بيشمركية و مغاوير داخلية. هذي من صدك خاتون و بطرانة و عبالها بكلمتين الدنيا رح تنقلب..

إهيء إهيء جرحتوا مشاعري الركيكة ..
.
.
باكوا الفرحة من أطفالنا و لكوا نفسهم بالمدرسة (اللي مداوم منهم) بدوامة العنصرية هذا كردي و هذا عربي و هذا شيعي و هذا سني، سرقوا منا الأمن، سرقوا منا الحرية (عبارة تحتاج لمراجعة) سرقوا منا كل شي، لكن هل سرقوا الأحلام أيضاً؟ إذا جنتوا صحيح شايفيني بطرانة و ممنوع علي أحلم فلأقرأ على شعبي السلام..

إهيء إهيء إهيء إنتوا حرين عاد