بكرمي الخاتوووووني الأسطوري ، سأسمح لكم بتصفح التي هي .. مدونتي
أرجو لكم وقتاً ممتعاً

الجمعة، 27 يونيو، 2008

ترحيب



لكل العراقيين من الشمال إلى الجنوب و من الشرق إلى الغرب .. من الشمال الشرقي إلى الجنوب الغربي (و العكس صحيح)
و لكل الأخوة العرب (حتى لا يزعلون علينا أكثر ما هم زعلانين)

أكول
يا مية هلا بيكم بمدونتي و يا رب تتونسون بيها، و خلونا عاد آني وياكم نسولف شوية و نسوي (شاشينج) على قولة الناس المثقفة، شنو رأيكم؟ منو قال آني مهتمة برأيكم ؟؟؟ آني رح أسولف وياكم غصباً عنكم، و اللي ما يسولف ويايه المفخخة تقول كلمتها..
شحب أسولف لكم أول شي؟؟ أسولف لكم عني شوية علمود تعرفون منو آني.. آني فد وحدة..


فد وحدة عمرها صغير بس شافت أشياء هواية ناس بنفس عمرها ما شافوها، أو يمكن شافوها بس مو بالطريقة اللي هي شافتها و تعاملت وياها، يمكن أخذوها بشكل سلبي.. يمكن يأسوا، يمكن ضعفوا، يمكن حقدوا، لكن خيتكم بحيل الله متفائلة بالمستقبل مثل هواية عراقيين و عندها هدف جبيييير أهداف و أهداف و أحلاااام ما تخلص، مو بس لنفسها.. لبلدها و لعالمها و تتمنى بلدها الجريح يتعافى و تتمنى يرجع على الأقل الأمان حتى ترجع من الغربة تبني و تعمر و إيدها بإيد أبناء بلدها، منو بيكم عنده حلم للعراق؟ منو بيكم يتمنى العراق يصير أحسن بلد بالدنيا و أغنى بلد بالدنيا و ترجع بغداد أم العلوم و المساجد، و ترجع بساتين البصرة (رحت قبل كم سنة للبصرة عبالي رح ألقى بساتين و نخل، و دينكم بس صبخة و جم نخلة قرعة)؟ منو ما يريد يرجع العراق أحسن حضارة بالعالم، و تزدهر السياحة بكل أرجاء العراق الحبيب و إحنا عندنا المعطيات كلها، جيبوا لي بلد بيه هم ثلوج و هم صحاري و هم غابات و جبال و هم أنهار (نهرين طوال اسم الله عليهم) و بحر و أهوار و بحيرات، لا أكو كوارث طبيعية و لا خط زلازل و لا شي ، جيبوا لي بلد مدفون بيه هالعدد من الأولياء و الصحابة و غيرهم.. ما جنا نكدر نصير أحسن من كل اللي هسة شافوا روحهم علينا ورا ما لفطوا من خيرنا و قلبوا علينا؟؟
يبووو ....
هاي الخاتونة شدحتجي؟ إحنا على سره البنزين نطبخ باميا و نسكف سمج، و بين جتي الكهرباء و راحت الكهرباء و جتي الوطنية و راحت المولدة راسنا افتر، و بعز الحر مقلين وحش الطاوة و قاعدين ناكل من القهر، و مغاوير الداخلية من صفحة و الإرهابيين من صفحة و جيش المهدي من صفحة و غير العلس و القتل و الرشوة و الوسخ و و و .. و تقول ماكو كوارث طبيعية، لعد ماكو كوارث قاعدية و صفوية و أمريكانية و صدرية و بطنية و بيشمركية و مغاوير داخلية. هذي من صدك خاتون و بطرانة و عبالها بكلمتين الدنيا رح تنقلب..

إهيء إهيء جرحتوا مشاعري الركيكة ..
.
.
باكوا الفرحة من أطفالنا و لكوا نفسهم بالمدرسة (اللي مداوم منهم) بدوامة العنصرية هذا كردي و هذا عربي و هذا شيعي و هذا سني، سرقوا منا الأمن، سرقوا منا الحرية (عبارة تحتاج لمراجعة) سرقوا منا كل شي، لكن هل سرقوا الأحلام أيضاً؟ إذا جنتوا صحيح شايفيني بطرانة و ممنوع علي أحلم فلأقرأ على شعبي السلام..

إهيء إهيء إهيء إنتوا حرين عاد

هناك تعليقان (2):

همسة يقول...

وأنا بعد أحجي

روووووووعة ما شاء الله عليك

...فيه ألاف من حسوووووومي ....

فيه منهم اللي يحكي بينه وبين حالةويسأل ويجيب ويغلق على قلبه لا يسمعوه بالخارج

وفيه اللي تكلم وظن أن صوته ما وصل ...لكن في الواقع ان الكثير سمعوه

ومات وهو يظن أنه ما عمل شيئ ...لكن عمله يكبر يوم بعد يوم

ومثل سواليفك رايحة توصل والكل رايح يسمعها

ممكن تكون البداية ... والأكيد ما رايحة تضيع .صحيح حروف وكلمات وسوالف لكن المعنى أصدق

ربنا يحفظك ويرضى عليك

الخاتون يقول...

أنا أتكلم و إنتوا حللوا على مزاجكم..
الله يجازيج خير على إبداء الرأي و يبارك بيج..