بكرمي الخاتوووووني الأسطوري ، سأسمح لكم بتصفح التي هي .. مدونتي
أرجو لكم وقتاً ممتعاً

الاثنين، 30 يونيو 2008

أوباما و حسوّمي.. تحليل للأحداث

أم حسام تصر على إرسال إبنها حسومي 11 عاماً إلينا بحجة إنَّ للولد قدرات هائلة يجب تطويرها، بس إحنا بذكاءنا نعرف إنه هذي حجة حتى تشمر ابنها العبقري علينا و تنفذ بجلدها أو بشعرها، فدارت بيني و بين المحلل السياسي حسومي عدة حوارات سياسية بقصد أو بحشرية من حسومي، و هذه إحداها
بس آني خايفة عليكم تنعسون لأنَّ لحسومي قدرة ممتازة على التنعيس كما له قدرة رهيبة على إثارة الأعصاب و حتفهون قصدي لما تكملوون..

في حفل تكريم للمرشح الديمقراطي أوباما، قام متطوعان في حملة أوباما الإنتخابية بإبعاد فتاتين محجبتين بحجة إنهما يجب أن لا يظهرا في الصور التي ستؤخذ لأوباما أثناء الحفل.. مما أثار حفيظتهما و اضطر أوباما للإعتذار لهما شخصياً..

خيتكم المثقفة جان ده تناقش هالموضوع و أضافت خيتكم :
"همَّ أصلاً ليش راحوا ينتخبوه؟؟ يستاهلون.. واحد مرتد و يأيد إسرائيل، ليش ينتخبوه؟؟"
آني أصلاً ده أحجي ويا أختي لكن حسام من يمه صافن بالسالفة

مرتد؟؟
أي
آني جان عبالي مسلم

بس آني بعدني متحمسة

"أصلاً لما هيلاري جانت تنافسه جانت تتهمه إنه من أصول إسلامية و هو متبري، لا! ما عاجبه عنده أصول إسلامية"

حسومي:
إي هسة لما يروح للنار رح يتمنى جان مسلم
آني:
.....
حسومي:
مو؟
إنت شمعرفك حيروح للنار؟
مو هوَّ مرتد..
إي حسومي حبيبي، ما يصير تكول على واحد حيروح للنار أو للجنة، زين؟
زين..
سكت حسومي و آني عبالي رح ارتاح

هوَّ حيروح للنار لو للجنة؟
مو هسة كلنا يا حسومي ما علينا حيروح للجنة لو للنار
ها؟ يعني هوَّ حيروح للجنة لو للنار؟
زين شلون يروح للجنة و هوَّ مرتد؟!
حبيبي مو كلنا إحنا ما علينا وين حيروح...
يعني ما ده أفتهم حيروح للجنة لو للنار؟؟

أحياناً أسأل نفسي: هذا الولد أمه شتوكله؟؟

حسومي يمكن رب العالمين يكوله فوت للجنة بس لما يفوت تطلع نار أو بالعكس يعني..
حسومي شهق:
صدوووك؟؟
أكول يمكن، مو هوَّ اوباما ذكي تقريباً مثلك هيجي..

"ذكي؟" تمتم حسومي مع نفسه ثمَّ أضاف:
زين هوَّ ليش بعّد هذولة المحجبات من وراه؟؟
إنت شتتصور أستاذ حسومي؟
يعني هوَّ مثلاً لأنه ما يحبِّ المسلمين؟ لو لأنه يغار على هذوله البنات إنه يطلعون بالتلفزيون؟

نظرت في وجه حسومي، أشو هذا ما ده يضحك!

إنت ده تتشاقه لو جديات؟
عفية خااتون كولي لي؟ شنو السبب ليش؟
أشو إنت إحزر..
بس ما ده اكدر أحزر، عفية خااتون... الله عليج كولي لي
يعني هو ما يغار على مرته رح يغار على اثنين محجبات؟؟
ها؟ أوباما ما يغار على مرته؟!
.....
عفية خاتون كولي لي ليش ما يريد محجبات يطلعون وراه؟
لأن هوَّ ما يريد محجبات يطلعون وراه

لكن القنبلة التي فجرها حسومي بعد قليل كانت تفاجأه بالإستنتاج الخطير الذي توصل إليه بعد كل هذه التحليلات و الدورات و اللفات و الفلافل

هاا؟؟ يعني هوَّ ما يحب المسلمين؟!

إنتوا خاف عبالكم حسومي ده يتشاقه، لا حسومي ده يحجي جديات و ده يحلل، و أصلاً لما يريد حسومي يتشاقه ويا أحد يكوله مسبقاً تره حتشاقه وياك..
نعم، لقد فعلها حسومي و أثار حفيظتي، و آني كل شي و لا واحد يثير حفيظتي!!
فبعد هذا الإستنتاج أحسست بدفعة من الإدريالين تنبض في عروقي، و بدأت أحس ببوادر من رغباتي و نزواتي المعتادة بارتكاب جريمة

حسومي، إمشي من يمي
زين هو كلتي لي يدعم إسرائيل؟
حسومي إمشي ولي من يمي!
قولي لي عفية عفية عفية عفية عفية...
ولي حسومي! لا أنعدي من المرض مالك..
عفية..

مع هذا العدد من العفيات عطفت على حسومي:

إي إي إي.. يدعم إسرائييل!!
.
.
معناها إسرائيل هسة مسحوكة ها هاهاهاهاها

هي، هي ، هي!
عود من الله يشفيك من مرضك هذا و ينطيك شوية نباهة رح تنسحك إسرائيل! و هكذا عافني حسومي ليكلم نفسه و يحلل الأحداث و تركني أدردم عليه و على أمه..
الأهم من كل شي.. أختي هم عافتني!
حسومي من الشعب العربي، يبقى السؤال.. هل الشعب العربي استنتج الإستنتاج الخطير هذا مثل حسومي؟؟
إذا شفتوا صور زيارة بوش للإمارات حتفهمون قصدي

هناك 11 تعليقًا:

Cho©oliciou$ يقول...

برافو على حسومي
ما شاء الله عليه
تدرين يا خاتون
حسومي تراه مو ذكي، لأن هذا تفكير الانسان الطبيعي
ولكن للأسف
كثير ناس يحاولون يطمسون معالم التفكير الحسومي عندنا
و بدل ما نكون طبيعين .. لراحتهم يبونا نصير اقل من الطبيعيين
و مؤكد ان من لديه التفكير الحسومي و ينطق به بعالي الصوت .. يختفي من الوجود
لذلك .. يفضل لو نكتفي بحسومي الصغير ابن جارتكم الله يخليه لأهله و احبابه
كثري من الحوار معاه و اتحفينا بنقل الحوار بالكامل
لعلنا نقرأ بعض الافكار "الممنوعه" التي تحاصرنا يومياً

تحياتي
وبوسه لحسومي

*الخاتــــIraqi Ladyـــووون* يقول...

حاااضر يا وعد، عندي الكثير من قصص حسومي و من قصص شخصيات أخرى في المجتمع و أتمنى تعجبكم

izdehar يقول...

غاليتي الخاتون

كم انت جميلة وراقية في طرحك الساخر

لما يحيط بنا من اهوال .. اسلوب لطيف

وفكرة تستحق الاشادة

حاولت الرد عليك في مدونتي لم افلح فانا

جديدة على هذا العالم اعني النت وكثيرا

ما امر بوقفات لا اجد معها الا الاستسلام

سعيدة بمرورك وسعيدة بتواجدي بين حروفك

اسعد الله ايامك بالخير

دمت بود

سلام

ازدهار الانصاري

*الخاتــــIraqi Ladyـــووون* يقول...

تسلمين يا حبيبتي ازدهار على مرورج، و أنا يسعدني إنه كتاباتي (اقصد كتابتي) عجبتج..

Ali Yaseen يقول...

مستحيل اني اول مرة اقرة مدونة واضحك من كل قلبي بس المشكلة طلع الضحك وياية بالمكتب وبنص الناس والفضيحة صارت بكلاكل بس عل عموم يستاهل ابداعج والله يوفقج ولازم تستمرين لان احنة محتاجين هيج ابداعات مو بس ابطال بالشعر الحر و السوالف عن الحداثة والميتافيزيقية اللي بالحقيقة لا تشبع من جوع ولا تؤمن من خوف، اتأمل ان يصير حسومي شخصية مشهورة ودائما تناقش غبائيات الحياة مالتنة ههههه واني الممنون وشكرا على تعليقاتج واتمنى ان نكبر مجتمع مدوني العراق

*الخاتــــIraqi Ladyـــووون* يقول...

تسلم يا أبو الحسن و آني آسفة جداً لموضوع المكتب مالك.
مو مشكلة، آني اكول سوي بيهم مقلب دز المدونة علمود كل واحد يضحك إشمت بيه خخخ

تقبل تحياتي و ممنونة من مرورك.

غير معرف يقول...

مبدعه يا خاتووون
.
تحياتي الج على هل السان ((الطويل))
.
وانشالله نبقى على تواصل
.

*الخاتــــIraqi Ladyـــووون* يقول...

تواصل؟؟ من يتكلم؟

زهرة الراوي يقول...

هههههههههه الله يحفظه لحسوني ! ما شاء الله عليه .. حوله وحوليه .. فهيم وعليم !

بالفعل مثل ما قالت وعد: أكو ناس تعرف بس تخاف حتى تتكلم ليروحون لبيت خالتهم ( وهو كناية عن جوانتانامو ) ، لكن الحق يجيله يوم ويظهر ويبرز ويبز كل ما حوله ..
رجاء تابعي الابداع واتحفينا :)

*الخاتــــIraqi Ladyـــووون* يقول...

منو وعد؟؟

زهرة الراوي يقول...

وعد الإمارات - أول معلقة على هذا الموضوع :)
ميخالف صايمة خاتون D: