بكرمي الخاتوووووني الأسطوري ، سأسمح لكم بتصفح التي هي .. مدونتي
أرجو لكم وقتاً ممتعاً

الاثنين، 28 يوليو 2008

تعزية من القلب لضحايا بغداد و كركوك..

أودُّ هنا أن أتوجه بأحر التعازي إلى أسر ضحايا التفجير الذي استهدف المدنيين في بغداد و كركوك، و الله يصبركم و يعوضكم.. بس إنتوا الله يهديكم ما تدرون الوضع الأمني اللي موجود هسة؟ يعني لو جان الإحتفال (بوفاة) الإمام الكاظم فريضة من الله تعالى جان سويتوها؟ يلا شكول.. اللي صار صار و آني كلش زعلت علمودكم.
و للأمانة أم هزيبر هم زعلت علمودكم و خابرتني اليوم تعرب عن أسفها الشديد للي صارقائلة:
كتلوا بس 25؟! هذولة الرافضة الـ .. ما يموتون مثل البزازين، جان المفروض يبيدوهم كلهم
ام هزيبر ، آني اولاً أقدر مشاعرج المرهفة.. بس اكو مشكلة صغيرونه هنا.. ماكو شي إسمه (يبيدوهم) هذولة طائفة كاملة تمثل نص العراقيين و مو بسهولة يجي ياهو الجان يبيد
شنو ده تدافعين عنهم؟ بابا هذولة كفار
كفار مو كفار، الله تعالى يعرف شنو بقلبهم و هو اللي يحاسبهم مو آني و لا إنتي
إي بس المسلمين جنود الله تعالى و لازم ينفذون كلمته
ها يعني الله تعالى كال نبيدهم؟
إنتي ما تعرفين آيات الجهاد؟؟ طبعاً لازم نجاهد و نقاتل الكفار
و انتي ما تعرفين آيات الدعوة؟
دعوة شنو؟ إنتي شايفتهم شلونهم؟ هم أولاد الـ.. و حاقدين على أهل السنة و الجماعة و الصحابة رضي الله عنهم، هم أصلهم حرام بحرام شيفيد بيهم دعوة؟
.......

الناس من أمثال أم زهيبر لا يفيد معهم التفاهم و الحوار، هم مقتنعين بفكرة و ما يقبلون أي أحد مختلف، رغم الإختلاف هي السنة التي سنَّ الله تعالى بها الكون.
و إلى كل من يفكر بأنه بإمكان طائفة أن (تبيد) طائفة، أو إنه بإمكان شعب أن يبيد آخر، إقرأ التاريخ جيداً و اعرف ما كان نهاية كل من اعتقد و نفذ هذا الإعتقاد، و ليس خبر اعتقال كارادزيتش عنا
ببعيد..

هناك 18 تعليقًا:

Ali Yaseen يقول...

والله شوفي هي ام هزيبر او ما اعرف شسمهة ترة تعبر عن الواقع والمصيبة انه الاغلبية ديفكرون بهل طريقة من كلا الطرفين وطبعا هاي مشكلة ما الهة حل الا بطريقة صلاح الدين الايوبي واذا تحبين اذكر شلون اتصرف صلاح الدين الله يرحمه حيال هذا الامر، لكن المصيبة انه هسة صار بالامر ثارات وهاي لا صلاح الدين ولا صلاح ذو الفقار هم يكدر يحلهة وخصوصا يم ناس روسهة كوية مثلنة


رجاءا لا تنشرين التعليق


ملاحظة: اني اعرف شلون ادز دعوة بس المشكلة انه ما عندي ايميل البنية ولازم ادزلهة رسالة واطلب منهة الايميل ووووواويلي شكد عجوزي اني بس الحقيقة مرات الواحد وبنهاية الاسبوع يستخدم المثل اللي يكول "ومنو اله خلك"هههههههه ودمتم

Ali Yaseen يقول...

اوكي هسة راح اكتبلج سؤال؟
انت منين تعرفين عبدالرحمن السميط؟
يعني هو يا إما انت مو عراقية او انه انت غريبة الاطوار "اعذريني من المصطلح" زين يا ابو الحسن ليش هيجي تكول؟

هاااااااااا لانه الحقيقة انه قليييييييييييييييييييل تشوفين عراقي او عراقية (خصوصا) هيج تفكر، يعني اني الى حد الان بس اعرف ولد واحد ملتزم من كل عقلة بالدين(اقصد يصلي وبوقتها وما يبصبص وما يجذب وهكذا) بس اشو الباقين ماخذيهة سفلئة للحياة

فلهذا صدك اني متونس انه اكو عراقية تفكر مو بس حديقة وشكرا للتعليقات الجميلة وارجو ان لا تنشرين تعليقي لانه يكسر نفسية العراقيين والعراقيات

Ali Yaseen يقول...

الح علي فد ويب سايت لازم تشوفي http://www.akhlad.com
هم ماكو داعي تنشرين هذا التعليق

Heart Rose يقول...

خاتون
اشفق على ام هزيبر .. ببساطه هي شافت شلون "همه" يبيدون الطائفه الاخرى ..

و اذا مدتشوفون ترا صارت هوايه عمليات اباده للسنه و مو بس السنه .. العلماء و الدكاتره و الاساتذه و الاعلاميين و و .. الخ

صحيح هي مو اباده كامله .. لالا طبعا .. بس هم اعداد كبيره

كفايه اللي هاجروا ,, و اني و انتو اكبر مثال

اني مو مع ام هزيبر بس مع ذلك .. مو يقتلوني و يقتلون عائلتي و يذبحوناو اظل اصيح و اقول: ( لا للطائفيه .. و خلي نحها بدبلماسيه .. و خلي نكون احنا الاحسن )
اعتقد انو من الغباء انو نبقى ننادي بهالاشياء و محد يسمعنا .. و كأننا ننفخ في قربه مثقوبه

ما اقول نترك الحلول الدبلوماسيه بس ايضا ما نعرض نفسنا للقتل .. و نكون مستعدين.. حتى للطعنات بالظهر

و تعليقا على جزئية موضوعج الاخيره : كانت هنالك ابادات في التاريخ .. اقربها اباده الهنود الحمر على ايدي اصدقائنا الامريكان

و بالاخير اريد اقولج .. شعورج الانساني راقي جدا .. صدقيني اني هم احزن لما اشوف الموتى و الجثث شو ما جانت و بغض النظر عن الدين او الطائفه .. نبقى بالاخير بشر .. و اكره القتل العشوائي
بس شنسوي .. هذا الوضع و هذا قدرنا ..
و على قولتج .. قابل ميدرون بالوضع الامني
لفته لطيفه من عندج .. و الله يصبرهم

الله لا يحرمنا منج و من مواضيعج الانسانيه .. و يزيد من اللي مثلج .. و اللي مثلج ترا قليل ^_^

عذرا عالاطاله

تحياتي

Heart Rose يقول...

ههههههههههههههه ابو الحسن

عموما اذا اني مقصوده من الكلام اعلاه .. رح ادزلك ايميلي

تحياتي

Ali Yaseen يقول...

هههههههههههههه هااا حلو من نوع خاتون ناشرتة للتعليق شلون فضيحة يا ربي


يللة على العموم اي هو انتي المقصودة

Ali Yaseen يقول...

طبعا اني اتفق وية هارت روز بكل كلمة كالتهة وعلى عناد ام هزيبر وسودة الحسودة وحسومي هم وياهم

*الخاتــــIraqi Ladyـــووون* يقول...

أبو الحسن آني اتفق وياك، الموضوع محتاج منا الحكمة و ضبط النفس (و لو صايرة اتنرفز من هالكلمة ما ادري ليش).
و رداً على سؤالك بالله، إنت منين تعرف عبد الرحمن السميط؟؟ إنت يا إما مو عراقي أو غريب الأطوار (خخخخ).
آني أدري يا بو الحسن أكو قليل مع الأسف عراقيين ملتزمين و اكو ناس (خليني أكول بصراحة) فاضحينا بهالبلد، بس صدكني آني اعرف بنات عراقيات مثل الدرة، و اعرف (بعض) شباب من قرايبنا و معارفنا هم ما عدهم سوالف مكسرة (بس شوية مو ناضجين بعدهم)
يلا الله يصلح الحال..
هارت روز.. آني اتفق وياج، لكن هم خليني أتفق على شي إنه إحنا نريد نبني بلدنا و نعيش بسلام (و هذا شي مو مستحيل لأنه أتذكر كلش زين قبل كم سنة جنه عايشين بلا هالمشاكل الطائفية)
آني أشوف إنه عمليات الإنتقام هذي من الطرفين لازم تتوقف و لما تهدا الوضعية الأمنية و تنزع سلاح المليشيات تكون هناك جلسة مصالحة و إرضاء للطرفين.. هذا الحل، بس ما ادري شلون يتحقق..

*الخاتــــIraqi Ladyـــووون* يقول...

أبو الحسن هذا مال المغني اللي إسمه أخلد مو؟ فايتة له من زمان و أسمع الأغاني مالته، بس صار لي هواية ما داخلة.. هسة لخاطرك حدخل و أشوف الجديد :)

poor iraqi يقول...

العراقيين مساكين صايرين مثل البعير ايشيلون ذهب و ياكلون العاكول , واثناء تبول السيد البعير نرجع ليوره,
شكراً يا خاتون على مرورك الكريم على مدونتي المتواضعة , بس احب اكول لجنابك الكريم , انو اني مثل ما ذكرت ابمدونتي اني نص كردي نص عربي بالاحرى عرااااااااااقي , وماعندي أي عنصرية لأي فئة , بس هي مجرد افكار احب اشارك الاخرين بيهه.

poor iraqi يقول...

ماطول افكارج هيج متحررة هذا الموقع يمكن يفيد !!!
http://www.ladeenyon.net/forum/viewtopic.php?f=13&t=20630&p=250403#p250403

Ali Yaseen يقول...

اجذب عليك اذا اكلك اني افتهم شي من توجهك (Poor Iraqi) شنو اللادينيين وشنو احنة هنا عالكيهة صلاح الدين وعبد الرحمن السميط وكالبيهة جامع؟

خاتون هذا اخلد هسة مسوي فرقةيكولون ويطلع على راديو سوا (منبر الوطنيين والاحرار هههههه) اني عرفت لانه هو يصير كرايب صديقي

وخاتون ترة الموضوع مال المصالحة (ولو اني هم اتنرفز من يجي طاري كلمة مصالحة وهم ما اعرف ليش)
ترة هذا الموضوع كلش صعب ومثل ما كتلج ينرادله صلاح الدين الايوبي واكرر عرضي اذا اردتي ان اكتب عن صلاح الدين وكيفية الاصلاح الذي مارسه فأنا على استعداد ان اكتب ولكن سأضعه في مدونة متهجولون في الغربة حتى
تصير مدونة متهجولون كلهة عن العراق وتبقى مدوناتنا الشخصية على حالها (يعني نكتب هنا وهناك) اجا هيه؟(يعني اوكي بالهندي كما ذكرت سابقا)

*الخاتــــIraqi Ladyـــووون* يقول...

يااا هلا بالبور عراقي، إنت هم نورت مدونتي المتواضعة، هاي وينك يمعود؟
إسمع أخويا، آني صحيح ألبس ذهب، بس آني مو (بعير) و لا عمري ماكله عاكول، آني آكل حشرات و بس.. و إسأل جمهووري (مو هيجي ابو الحسن؟)

يا بوور عراقي، الإنسان ما يزكي نفسه، الإنسان الناس هي اللي تزكيه و هي اللي تكوله إنت عنصري او مو عنصري، و إنت مثل ما تدري : آني كلت لك كلامك (يدل) على عنصرية و ما قلت إنت عنصري.
إنتوا تتهمون نبينا (عليه الصلاة و السلام) إنه هو بربري و مجرم و قلت ع العرب اغبياء و كعدت ما أدري شتحجي على الأفارقة على هم همج و هم القوم الوحيدين اللي ما صار عدهم حضارة (و حتى خطية واحد من اللادينيين السود زعل) هاي لعد مو عنصرية؟
ما دام تعتبر كل اقوالك هذي حرية و ديمقراطية، آني هم عندي حرية و ديمقراطية و أكول اللي أشوفه.

راجع نفسك أحسن..


أكو ملاحظة هم صغيرونة، الموقع مالك محظور عدنا بالإمارات.

*الخاتــــIraqi Ladyـــووون* يقول...

أبو الحسن هوَّ موضوع معقد فعلاً، بس يلا حضر لنا الموضوع لأن عاجبني أعرف شلون سواها صلاح الدين الأيوبي :)

و بالنسبة لأخلد، البارحة سمعت له هاي الأغنية مال ساسوكي تخرب ضحك، هذا ما ادري منين يجيب هالحجي، لازم ننتظره على سوا و نشوف شمحضر لنا..

تقبل تحياتي

Ali Yaseen يقول...

ماشي عا راسي معلم هلا باحضر موضوع...زين وهسة راح ارجع عراقي: سؤال حجية خاتون: شنو راح تبقين مجلبة بأم هزيبر؟ يعني ما ناوية تكتبين موضوع جديد؟ ادري مو اني اتعودت افتح الانترنت الصبح وكبل ما اشتغل بأي شي ادخل على مدونتج بلكت الكة شي...شوفي!!!منوراج اليوم صار مللللللللل مو طبيعي

وخلي رابعة العدوية تفضهة وتفتح مدونة عاد خوما راح تبقين كاتمة على نفسهة؟ اني ادري انت اللي ما تخليهة تفتح مدونة بس ترة هاي مو ديمقراطية وخصوصا احنة بعهد الانفتاح والحرية فلا تضيعون المنجزات مال التجربة الديمقراطية بالعراق اللي هو نموذج مال شرق الاوسط كما قال الفدائي سعد الحريري

هسةاني في حالة "التنبلة وعدم الرغبة بالعمل" لانه باجر عطلة والاحساس بيهة عظيم الى درجة انه دا اتخيل المخدة تسولف وياية هسة من النعاس


الله يعين الجميع

*الخاتــــIraqi Ladyـــووون* يقول...

أبو الحسن رابعة العدوية ما ناوية تشترك ويانا، تكول هي ما تحب الكتابة و ما عدها شي تكوله، مو كله تذبه براسي أصلاً آني لحيت عليها لحد ما ضاجت مني..

يلا تونس بالإجازة مالك و طكها نومة..

Ali Yaseen يقول...

شنو نومة مو طبيعية هسة يللة فتحتن الكومبيوتر لاول مرة منذ ذلك اليوم، واكيد تعرفين شنو شعور البني ادم بأول يوم دوام يعني تكدرين تكولين مضروب مية ........ على وجهة، يعني هسة ينرادلي اضرب وجهي اوتي يللة يستعدل شوية

وتحياتي للجميع

وصلوا على الرسول الاعظم صلى الله عليه وسلم

ولا تنسون التهيؤ لشهر الخير منذ الان

وما اريد بعد اكتب شي بخصوص اي شي لانه اخاف تحذفين التعليق هههههههههههه

الدكتور حيدر نعمة بخيت يقول...

اجمل مافي الموضوع هو التاكيد على مسالة التعايش السلمي لانه لايمكن لاي فئة ان تبيد فئة ثانية وان كانت الثانية اقل عدة وعدد وكما هو الحال مع شواهد التاريخ..لذا فانه يجب القول هنا بان مها كانت خلافاتنا مع الاخرين وحتى ان كانو كفارا او اولاد حرام فان من يحكم بيننا وبينهم هو الله سبحانه وتعالى...فلهم دينهم ولنا ديننا..وكما يقول المثل الشعبي في العراق.... موسى بدينه وعيس بدينه....

د.حيدر