بكرمي الخاتوووووني الأسطوري ، سأسمح لكم بتصفح التي هي .. مدونتي
أرجو لكم وقتاً ممتعاً

الأربعاء، 5 نوفمبر 2008

مودة!!


ها قد أتت الخاتون بعد طول الغياب
بعيد عنكم تسممت و ضعفت لي جم كيلو
أكيد أحد بيكم حط عيونه الخضر عليَّ و حسدني، و عموماً اشكره
هذا أحسن مرض ممكن يمر علي في المرحلة الراهنة
ما علينا نرجع لموضوعنا

كنت على وشك إني أروح للسوك آني و أختي علمود نشتري شغلة هدوم و هيجي، فإذا بنوسة تركض وراية:
خاتون خاتون خاتووون!
ها نوسة؟
إنتي حتروحين للسوك؟
إي
عفية أخذي نوساا، نوسة اليوم عاجبها تروح للسوك..
يلا كولي لها لماما و آني انتظرج بالسيارة
و بعد قليل عادت نوسة و صعدت بالسيارة:
نوسة حتروح للسوك
و مدت إيدها علمود تنطيني فلوس من أمها علمود خاف يعجبها شي، يالسخرية القدر، آني الخاتووون آخذ فلوس من نوسة؟ و مو من جيبي؟
اللي هو( يعني) من جيب أبوية؟
شنو هالخربطة المرعبة لبريستيجي؟
جان لازم ابوية يحوسم، جان لازم يحوسم!
أو جان يخليني آني أحوسم.
بس هو ما يسمع كلام و يصر على كوني زعطوطة و ما افتهم شي.


إي بس نوسة لازم تكعد عاقلة و ما تسوي وكاحة زين؟
نوسة حتكعد عاقلة و ما تسوي وكاحااا
ثم ابتسمت ابتسامتها العريضة التي تصر بأنَّ لها قدرات هائلة على حرق الأعداء و لا أدري ماذا تعني بذلك (مو مهم أعرف، آني رح أجنح للسلام و الله يستر)

و هكذا بدأت أتنقل في جنتي الدنيوية (محل الملابس) أختار و أرهم و تدرون عاد لما اختار و أرهم شلون يشتغل تركيزي العقلاني، و لكن نوسة كلساع عاجبها شي و تريد تجرب شي مما يؤدي لتشوش تركيزي، و آني كله و لا تركيزي..
فخطرت في بالي فكرة ممكن تفيد في هذه المواقف..
و حتى تفهمون فكرتها اسمعوا هالقصة
حدث مرة إني جنت نازلة من السطح بعد ما شريت الهدوم، جنت ضايجة و زهكانة و روحي واصلة لخشمي (تدرون الجو هنا شلون مزعج)، و حطيت الطاسة على راسي، فسودة الحسودة شافتني نازلة من الدرج جان تشيل الطاسة شوية عن وجهي و كالت في بهجة:
الله خاتون! شنو هالجمال؟! طالعة مثل الفنانة رشيقة أم خدود..
سودة.. تره روحي طالعة و مالي خلك الشقة مالج
و حطيت الطاسة مرة لخ على وجهي و اكملت طريقي نزولاً.
بكيفج، بس آني ده أكولج الطاسة على راسج هذي كلش لايكة لج.
إي إي، احجي لج وياهم .
لكن بعد لحظات فكرت بالحجي مالها
الله! يعني معقولة آني طالعة مثل الفنانة القديرة رشيقة أم خدود و هي شايلة طاسة الهدوم في أغنية آه و تلات ارباع؟!
رجعت على سودة:

جديات سودة؟ يعني آني صدك الطاسة.. لايكة لي؟؟
إي طبعاً، ما تصدكيني؟
و من يومها قررت إنه طاسة الهدوم هذي لازم أحطها على طووول.
و هكذا بدأت كل نسوان و بنات الشعبية بدءاً بسوسو و انتهاءً بأم حسومي يقلدون مودة الطاسة اللي على الراس و اللي ما تلبس الطاسة صارت مودة عتيكة..
المهم هسة ما أريد أحجي لكم قصص و ننسى الموضوع الأصلي اللي هو موضوع تشويش نوسة على تركيزي العقلاني.
آني لازم أستخدم نفس السووتراتيجية ويا نوسة:
نوسة عمري، شنو رأيج تكعدين عاقلة و آني عندي مفاجأة إلج
ابتهجت نوسة
خاتون حتسوي لنوسة مفاجآااااا؟؟
أي، خاتون حتسوي مفاجأة لنوسة..
و سكتت لفترة و هي تتبعني
يولي نوسة إنتي سكيد عاقلااا؟؟
حنبدي بالتلقين الممل
يولي نوسة شكيد إنتي عاقلااااا
يولي نوسةإنتي سكيد بوبااااا ؟؟
يولي نوسة إنتي سكيد بوباااا ..
بوبة هنا معناها (حبوبة)
للأمانة هي حجيها لو أكولكم اياه مثل ما هيَّ تلفظه جان كل شي ما افتهمتوا ( حتى إسمها الأصلي تره نوشة مو نوسااا)
يولي نوسة إنتي سكيد..
نوسة يمعودة، خلينا نعرف دربنا..
أوه، نوسة تكول عفو
و كالعادة، مع ابتسامة بريئة مرعبة

بديت أدور و ابحبش بالهدوم و بعدما يئست كالعادة من إيجاد شيء ملائم، قررت أن أنفذ المفاجأة اللي آني محضرتها لنوسااا.
أخذت بعض الأغراض لها و دخلتها لغرفة القياس، كانت تلبس تنورة قصيرة حمرة و تي شيرت كات أحمر، و حذاء أحمر، فآني أخذت لها سترة خضرة و جواريب طويلة زركة، و بحبشت بجنطتي بلكي اكو مكياج منا منا، حطيت لنوسة حمرة زركا علمود بلون الجواريب و آي شادو أحمر بلون الهدوم، و شادو مال خدود أخضر بلون السترة (قصدي الستراا):

ها نوسة؟ شنو رأيج؟؟
باوعت نوسة صورتها بالمراية و ابتهجت:
الله! نوسة طلعت حلوة كلس!
طبعاً عمري، نوسة أحلى من سندريلا
يولي نوسة إنتي أحلى من سندريلاااا؟؟
يولي نوسة إنتي أحلى من سندريلا..
خاتون، بس مو هو سوية مخربت؟
لا حياتي، إنتي لازم هيجي تطلعين ما تشبهين أحد..
حسومي يحب نوسة و هيَّ حاتة مكياج؟
طبعاً ، أكيد يحب نوسة و هي حاتة مكياج..

طلعت من غرفة القياس، و لكيت جم وحدة واكفة فمن شافوا نوسة انفتحت حلوكهم و عيونهم (جانت وحدة بيهم فلبينية، يعني عيونها كانت على وشك تنشك)
و الكل جان يحدق بنوسة و مكياج نوسة، بدا على نوسة القلق:

خاتون، أسو الناس كلهم ده يباعون عليااا
طبعاً عمري غير معجبين بيج؟؟
و سمعنا أحدى الغيورات تقول بغيرة:
لك هاي شو عاملة بإختاااا؟؟
نوسة دغتني: سوفي خاتون، حجوا عليااااا، أوووووه (الطريقة المبتكرة بالبكاء)
لا حبيبتي لا تديرين بال، هسة إنتي أختي؟
لا
شفتي؟ معناها ما حد حجا عليج..
.
.
عبالكم حشيل هم شلون أقنع أمها، قصدي.. أمهاااا
هنيوة؟؟
المرة بالبداية عبالها قشمرت على بنتها، و لكن بعد إقناعها بدأت هي الآخرى باتباع مودة نوساااا
..
هسة منو بيكم مقتنع بمودة نوسة و منو بيكم يريد أقنعه؟

هناك 11 تعليقًا:

ahmed يقول...

خاتون,

اسمج يوحي انه انتي من معجبي التراث القديم, من جانت الزفة ركض, بس اشو حجيج مال وحدة هستوها متخرجة بالعشرينات. مفتهمنا؟

عموما اني جنت ناوي اقره الموضوع بس الألوان سوت عندي خفقان.

مودتي

سراج يقول...

مودة نوسه كانت من صنعي، والقناع صنع بعيداً عني، كلاهما يغيران او بالأحرى يمسخان حقيقتي - ولا اقصد بذلك حرام أو حلال - مشكلتنا أننا تعودنا على التلون ففي كل محفل لنا وجه يتناسب مع مصلحتنا وأننيتنا، وبالتأكيد هو يختلف عن التعامل بحسن نية مع الآخرين لأنك لا يمكنك أن تكوني كبيرة مع نوسا فكان تعاملك هو عين العقل، بس مو الحمرة والشدو هههه.. تحياتي

Ali Yaseen يقول...

اكلج اول شي حمدلله على السلامة وان شاء الله اخر التسممات بس ما اعرف انتي ليش اتسممتي يعني شاكلتي بالضبط؟؟؟
المهم خاتون اريد اسال سؤال.....اشو اني جيت متاخر وهم بقيت اول واحد علق؟
ما اعرف اشو مدوناتنة وصلت للقمة وعلى غفلة ضربت دقلة وقليل يدخلولهة؟؟؟
يمكن شوية تكاسلنة او يمكن انتي بديتي دوام واني كمت اتاخر بالدوام اكثر؟؟؟ما اعرف بس لازم تلكينة حل


طبعا ماكو داعي اعلق على الاسلوب الحلو لان راح يصير كلامي مكرر واليقرة يحكم

poor iraqi يقول...

ســـلامات خاتون , واني كالعادة متابع
:)

نوفل يقول...

لا عندج العافية خاتون

هاي بيش تسممتي

احنه ندعيلج بالخير وما نحسدج

ان شاء الله سلامات وتظلين تروحين للسوك وتسولفينه شخابيطج الرائعة ههههههه

*الخاتــــIraqi Ladyـــووون* يقول...

أشو عفت مدونتي فترة و أيست كلت ما حد حيعلق، لكيت خمسة معلقين، يا ما انت كريم يا رب

عباس هوازن.. هل ترى تناقضاً بين الجانبين؟ نعم أنا في بداية العشرينات من العمر و (لساعني مو متخرجة)، و اعتز كثيراً بتراث بلدي القديم..

سراج.. أوافقج بكلامج، و إن كان مو نفس الفكرة اللي أريد أوصلها..

أبو الحسن.. خخخ لا تخاف هالمرة مو صراصير، هالمرة .. ما ادري و الله يمكن حليب عتيك شمدريني، و آني المدونة على بالي على طول، بس تدري آني مسوية خطة بحيث أملي يومي كله و ما الكى وكت، لأنه أشو صايرة من أكعد ويا نفسي و أسولف وياها أتخبل، و آني يا عيني ما ريد اتخبل..

بوور عراقي.. الله يسلمك و هلا بيك.

نوفل.. الله يسلمك، و ان شاء الله حتشوف المزيد من الشخابيط و ان شا الله حتعجبك..


تقبلوا تحياتي جميعاً

غير معرف يقول...

هههههههههههههههه

حلوة قصة نوسااا

ولو موصلتني الفكرة الي دتريدين توصليها :)

وبالنسبة للتسمم آني بالعكس مكيفة :))

لأن طول عمرج ثابرتني أريد أضعف وأريد أضعف وتدعين وترجعين ورة وبعدين متسوين ريجيم

شون تريدين الله يستجيبلج P:


يللا بالتوفيق وإن شاء الله دائما اللي عينهم خضرة يحسدوج حتى بلكت تضعفين بعد P:


تسلمين ولا تكطعين مرة لخ ;)

هنــــــــد جمال Hind Jamal يقول...

والله خاتون اني النت يمي ليلي صاير بس بليل زين اظاهر ابو مركز النت مغرم بسهر..فاعذريني لانه مداتابع سوالفج الحلوة..مرات يصير عندي مللل من اللوحات والفنون اكمز على سوالفج اتونس عليها بس ليش اطولين بين سالفه وسالفه ..؟
المهم حمدلله على سلامتج داده خاتون -صرت احجي بغدادي- هههه

*الخاتــــIraqi Ladyـــووون* يقول...

رابعة إنتي أسكتي أسكتي! فاضحتني وين ما روح..

الموناليزااا، يمعودة اللوحات مالج منو يمل منها، بس طبعاً سوالفي هم منو يمل منها؟؟ منو يجرؤ علمود أحضر له أحلى مفخخة
و حضري دلة الكهوة حتى تسهرين على كل ما ينطق به لساني الخاتوني الحكيم، زين داده؟
آني ادري ده اطول بين مقالة و ثانية بسبب انشغالي، بس ان شاء الله مستمرة وياكم..

زهرة الراوي يقول...

هااااااااااا ! هاي شنو ؟؟

آني متأكدة إني حطيت تعليق على موضوعج هذا خاتون !!!

أصلاً جنت من أوائل المعلقين !

يمعودة دوري زين بالإيميل خاف سقط سهواً ؟!

عموماً بوكتها قلت:

عجبني الموضوع لأن بالفعل صارت الناس تخلق من كلشي تشوفه بالشارع مودة ، وبالتالي نلاحظ إنه فديوم واحد جان ناسي حزامه بالبيت وبنطرونه كل شوية ينصل ، ورا يومين كل الناس اللي بالشارع بناطيرها ناصله ، ومن هنا طلعت هاية المودة .

لذلك آني أعتقد أنه مودة الطاسة اللي فوق الراس كلش مناسبة لأجواء الصيف والشتاء ، فهي تقي من أشعة الشمس والمطر.

أما اللي سويتيه بنوسه ، فكلش ذكرني باللي جانوا يسووه بنات جامعتنا بروحهم سودة عليه ما عدهم مراية بالبيت !

تتحفيننا دوماً بسوالفج ، بس لا اطولين الغيبة :)

وصدق .. سلامات يمعودة .. بس ليروح ماكلة سمبوسة مدري جباته من الهندي اللي بالشارع، لأن دائماً يقولون تسبب تسمم !

*الخاتــــIraqi Ladyـــووون* يقول...

ها شنو هالنيو لوك زهورة، حاطة صورة جودي أبوت خخخخ
لو آني شفت أي تعليق(لا سمح الله)ليش أختله؟؟ هذا وداعتج التعليق الوحيد اللي شفته..
عموماً أشكرج على التعليق و إنتي فعلاً فهمتي بالضبط شريد أكول..

تقبلي تحياتي