بكرمي الخاتوووووني الأسطوري ، سأسمح لكم بتصفح التي هي .. مدونتي
أرجو لكم وقتاً ممتعاً

السبت، 3 يناير، 2009

كله إلا هاي!!

بعد ضغوط إقليمية و دولية و تهديدات مغرضة و هدفها لئيم.. قررت أتصدق عليكم بهاي المقالة
هوهوهوه

طبعاً كلنا شايفين شديصير بغزة، و يمكن أكثر ناس تكدر تحس بشعورهم هم إحنا العراقيين، باعتبار مرينا بنفس الظروف
و هذا ربما يفسر سلوكي (يعني بصفتي عراقية) و آني لازكة بالتلفزيون أنظر نظرة حالمة إلى صور الضحايا، و أتذكر أيام القصف الأمريكي على العراق، و أقول بنبرة حالمة (أيضاً):
أخيراً اقترب أشقاءنا الفلسطينيين أن ينالوا الحوورية و الديمووقراطية مثلنا!
و ابتسمت بعدها تلك الإبتسامة التي لا يمكن أن أوصفها إلكم، بس هي تشبه الإبتسامة التي تظهر على وجوه (البعض) بعدما يتفوهوا بكلام مشابه..
لكن حسومي طول عمره واكف لي مثل الغراب، و لازم يفسد علي أحلام اليقظة:
ها؟ شنو؟
باوعت بوجهه و هو فاك حلكه ببراءة:
ها؟
إنتي مو هسة كلتي فد شي؟ لو إنتي هسة ما كلتي فد شي؟
و إنت شنو؟ أكول فد شي لو ما أكول شعليك إنت؟
لا الله عليج كولي ليييي
لا هيج ماكو شي..
لعد ليش جنتي ده تكولين فد شي؟
آني؟ شكلت زين؟
ما ادري.. يمكن.. جنتي لو كاعد تحجين ويا التلفزيون، لو يمكن كاعد تحجين ويا روحج..
زين و شجنت أكول؟
ده تكولين الفلسطينيين.. رح يصير عدهم حرية و ديمقراطية مثلنا
زين مو هياتك طلعت تعرف آني شجنت أكول، على شنو السؤال؟!
هياتني؟؟
ثم تحمس حسومي و هو يتوصل لبعض الحقائق الخطيرة:
هااااا هياتني، يعني قصدج آني جيت، يعني آني موجود بس إنتي ما جنتي تعرفين؟ بس بعدين إنتي عرفتي؟.. يعني بعدين إنتي..
لك حسومي خلص شتريد مني هسة؟؟
آني؟ شريد؟ نسيت شريد أكولج يا ربي شنو أريد أكولج؟
همممم أي بالله؟ إذا ماعدك شي خليني أخلص الأخبار
ها أي، تذكرت.. يمكن يعني..
أي؟
ليش هم الإسرائيليين يريدون ينطون لفلسطين حرية و ديمقراطية؟
شوف هم ما كالوا صراحة، بس هم أكيد رح ينطوهم حورية و ديموقراطية..
ليش ينطوهم؟
بكيفهم
هنا تعصب حسومي: لالالا ما يصير هيجي!
شنو المايصير؟
يعني ده يقصفوهم يوميا، و هم جمالة ينطوهم حرية و ديموقراطية؟!
هنا بدأت اخاف على حسومي من النزعات الإرهابية التي ممكن أن تظهر على أي شخص فيه دم عربي، فبدأت في عملية تهدئة و ضبط النفس (مو خريطة طريق لأنه هاي شغل سودة الحسودة مو شغلي)
حسومي حبيبي هم ما كالوا هيجي، بس آني ده أكولك يمكن
شنو يمكن؟ مو بكيفهم!
لعد بكيف منو؟
ها؟ صدك بكيف منو؟ ما ادري .. بس المهم مو بكيفهم، عننننن
(حسومي يزمجر غيظاً)
ده تشوفون حسومي شون معصب؟ بدا يكول كلام جبير لا افهم معانية، و آني صافنة على حلكة، ففي هذه اللحظات أيها السادة أكتشف إن حلكه.. جبير، جبير، كلللش جبير!
وسعت عيناي و أنا أراقب حلك حسومي، عموماً هو الموضوع طول و حسومي حجى هواية، مما يؤدي لإقلاق راحتي الخاتونية و آني كله و لا راحتي الخاتونية.
فسحبت الريموت كونترول و قلبت على قناة سبيس توون
و ربتت على ذراع حسومي لأواسيه:
يلا حسومي ميخالف، هي الدنيا هيجي شنسوي
حسومي في محاولة لمقاومة منظر الكارتون
أي بس.. آني يعني تره بعدني متعصب
صدك، زين يلا حبيبي ما تسوه تعصب، أعصابك أهم شي!
زين..
و هدأ حسومي رأساً!

و هكذا ترك حسومي مراجعة امتحاناته و دروسه المهمة و فك حلكه كدام الكارتون، و يبقى إنتوا لازم تدعوا له ينجح،
مو بالله؟
هذا شغلكم إنتوا تدعوا له ينجح!!

هناك 8 تعليقات:

ابو الحسن يقول...

خاتون رهيبة مثل كل مرة
اني مصر على شغلة الكتاب
الا اخليج تكتبيه واني يكون الي الشرف انه انقحه
يللة وعين الله ترعاكي

زهرة الراوي يقول...

"يعني ده يقصفوهم يوميا، و هم جمالة ينطوهم حرية و ديموقراطية؟!"
والله حقه لحسومي ، قابل هيه الحرية أو الديمقراطية فدشي زين ؟؟ قابل هدية ؟؟ قابل خير ؟؟

الحقيقة حسومي يفتهم أكثر من الحكام العرب مجتمعين .

عاشت إيدج خاتون ، يمعودة لتكطعين بينا هالكد ، منكدر :)

*الخاتــــIraqi Ladyـــووون* يقول...

أهلييين أعزائي أبو الحسن و زهورة، نبدي بأبو الحسن..
أي أكتب كتاب ليش لا؟ بس مو هسة، مو من ضمن خططي هسة.. و طبعاً رح يشرفني إنه إنت تنقحه

زهورة، شفتي الجهال شلون صار عدهم رعب من قصة الديموقراطية هاي، كله من ورا المضروب بالقندرة (بوش)

تقبلوا تحياتي

رابعة العدوية يقول...

أخيييييييييييراً


أول مرة أفهم الرمز بقصتج :))

أو يمكن أول مرة ...

المهم

تشكرين على المجهود الحلو

واني اكثر شي عجبني استنتاجج العبقري بالبداية من عرفتي إنو أخيرا حينطوهم حرية وديمقراطية

ههههههههه

يللا جنا خايفين على الشعب الفلسطيني لا ميحصلها

هم الواحد ميصير يكون أناني :)


تحية طيبة ولا تنسون غزة من الدعاء

حبارير يقول...

اسلم وماشي على طول عشان الامتحانات

سلامي لأبي الحسن وهند وأميرة الأحزان وحسومي وأم هزيبر

وكل العراق الحر الشريف

*الخاتــــIraqi Ladyـــووون* يقول...

رابعة.. هاي شبيج ماماتي كل الناس مفتهمة و إنتي توج فهمتي؟؟ عموماً ما رح أرزلج لأنه ما اريد اخسر زبايني (حسبي الله)
دا شاقة وياج لا تزعلين يمعودة، آني ما حد يزعل مني (-;

حبارييير.. وينك يا خيي من زمان مختفي؟ امحتانات إيه اللي عندك؟ هو انت كمان بتمتحن؟؟

ضي يقول...

بعد ان اطلعت على كتاباتج عجبتني عفويتج باستخدام المفردات ، وطبعا المميز اختيارج لاسم المدونة وتعليقج عليه،لان هذا فعلا الي صار لخاتونات العراق كله بالداخل وبالخارج.
اتمنى اتابعيني مثل مراح اتابعج بس طبعا ورة الامتحانات.

*الخاتــــIraqi Ladyـــووون* يقول...

أخجلتم تواضعنا يا ضي (هوههو)

آني هسة فتحت المدونة مالج، مبين بيها خوش أشياءات و إن شاء الله بس يصير عندي وكت أقرا بيها..

تقبلي تحياتي و بارك الله بيج