بكرمي الخاتوووووني الأسطوري ، سأسمح لكم بتصفح التي هي .. مدونتي
أرجو لكم وقتاً ممتعاً

الثلاثاء، 24 فبراير، 2009

فضفضة (بيني و بينكم)

ها قد جاءت الخاتون ببوست جديد، بوست تحفة، بوست مو مثل أي بوست
بما إنّ الخاتون بدأت بتكريس سياسة التعريب فخلوني أستبدل عبارة (بوست) بعبارة (تدوينة)..

يمكن هواية منكم يتساءل بحيرة: شنو هالعنوان الفطير؟ و عن ماذا جاءت الخاتوون تتحدث؟
و جني أسمع أحد يكول: أهو هاي هم كاعد تتعزز علينا و تغيب و تخلينا نكول وينها و مرة تتحجج بالدراسة و مرة ما أدري بشنو
هو فعلاً آني أشو صايرة هواية أتعزز و هذي ظاهرة جديدة قد يكون لها تأثير سلبي مستقبلي فيدرالي على بريستيجي (ماء وجهي)
ماء وجهي!!
هو ظل بوجهي ماي؟ هو الواحد يوميا يشوف هالبلاوي يظل بوجهه ماي ؟ حتى كلاص الماء هم ما يظل..
آآخ لو بس تدرون خيتكم شكيد تعاني، الله شاهد أكتب و امسح دمووع... حتى ما عارفة شاكتب أريد بس أكتب أطلع هالــ ..... هالحصرة ، هالخنقكة اللي حاسة بيها، حاسة..... جبااااااااال على قلبي..
ما أدري....
هاي شصاير بالدنيا؟؟ ليش هيجي الدنيا ما حلوة و الناس مو حلوين؟
ليش ما حد راضي يعوف أحد بحاله؟
ليش حتى الناس اللي الواحد ما عنده شي وياهم مستعدين يعادوه بأول فرصة؟
ليش الناس تكول كلام و تسوي غير الكلام اللي تكوله؟
ليش الإنسان اللي ما بينك و بينه شي ينتهز أي موقف حتى يأذيك في سبيل يطلع هو عنده شخصية و فاهم؟؟
ليش أكو ناس يفهمون سكوتك عن تصرفاتهم و أذيتهم ضعف، و ما يتركوا لك خيار غير تنطيهم العين الحمرة؟؟ ليش بس اريد أفتهم ليييييييش؟
كل شي جنت شايفته حلو تغير، لا عمري عرفت أكره و لا أحقد، بالعكس جنت أحب كل الناس..
آني تعبت، أحس ما ظل بيَّ لا حيل و.... و لا شي

أدري ضوجتكم ويايه و كاتبه كلام بلا معنى، بس ما ادري هيجي جا على بالي أكتب و كتبت...

هناك 3 تعليقات:

زهرة الراوي يقول...

عزيزتي خاتون ..
كليتنة نكبر وعبالنة الدنيا حلوة ..
بعدين نشوف فدشي يضوج ، نزعل ونتأذى ونموت ، ورة جم يوم/ شهر / سنة حسب ما تحتاجه نفسيتج حتى تتخلصين من الماضي ..
وراها تعتقدين أنه الأسوأ راح ، وأنه ما ممكن يصير شي أسوأ من اللي صار ، وما ممكن تتأذين أكثر مما تأذيتي .. وإنه إنتي صرتي مضادة للصدمات ، وحاوية للضربات ..
ثم هوب تجي المفاجأة ، ويطلع أكو بلاوي أكثر من الأول ..
بل وتأثيرها أقوى ..
ومؤلم اكثر ..
ونبدي من جديد!

تجين على الناس ..
تكولين بعد ما أغلط وأصاحب هيجي ناس .. او بعد ما أقوي علاقتي وية بشر ..
وتعتقدين أنه تعلمتي ..
وبعد الغلط ولا شبيهة ممكن يتكرر ..
وأنه إنتي صارت عندج الحكمة اللازمة ، ومالت عشر سنين لي كدام ..
وأنه حجي الناس بالزبل وبعد ولا يأثر بيج ..
للللللللللللللللكن
نرجع من جديد ..
نفس الآنة !
وتظل الناس تبحبش وراج دتلكة شي دتحجي عليج ، عبالك نجمة هوليوود وماكو غيرج بالوجود ..
شتسويلهم !!

فسواء كانت المشكلة في أمور عامة أو أمور شخصية ، طنش تعش تنتعش ، محد راح يفيدج غير ربج ونفسج ..
فديري بالج على علاقتج بربج ، وكولي دائماً ( من ترك شيئاً لله عوضه الله خيراً منه ) .
ما أدري دا أحجي خارج نطاق التغطية لو بعدني ؟ لأن نعست حيل!

Abu Al-Hasan يقول...

خاتون راح افضفضلج بلكي اخفف عنج الضوجة

مرة فد واحد كلش عزيز على قلبي أو على الاقل كان عزيز على قلبي لان اني من احس الشخص اللي كدامي سوة شي كارثي بالنسبة الي، بعد لا احنلة ولا اريد اباوع بوجهة،على العموم، وفجأة وبدون مقدمات وبعد فترة طويلةنسبيا من العلاقة طلع هذا الشخص يباوعلي من وجهة نظر كلش غريبة، وبالاخص عني، لان اني جدا واضح وما ممكن البني ادم اللي كبالي يفتهمني غلط، يعني مبادئي واضحة وأهدافي اوضح، لكن هالشخص جفصهة وياية بحجاية وحدة بينتلي هو شيفكر عني وشنو منتظر مني...
وإذا بي اريد اكوم اكله
لان من صدك حسيت انه...هاي شنو!!!
لالالالالا مستحيل...بالله!!!!اكو هيجي شي بالدنية؟ اني بس اشوفهة بالافلام المصرية...
اني ما انجرحت، لكن المصيبة انه حسيت انه اني لعبت نفسي...اقسم بالله لعبت نفسي، ولمدة يومين احس نفسي عايش غربة مو طبيعية
والدرس اللي تعلمته هو انه يا إما انجرف وية تيار معين حتى تكون حياتي اجتماعيا ناجحة أو أن اعيش بغربة بين الناس بمعنى انه اعيش وياهم لكن طناش عدا من بعض الاشخاص اللي احسبهم يفهموني واحتمال هم اطلع غلطان ونرجع لنفس القصة
لكن هي بالنهاية موقف يصير، يعلب نفسي، اروح على الحمام والعفو استفرغ وبعدين ارجع اعيش حياتي طبيعيا

اخر كلمتين
لا تضوجين
وجربي فد شغلة حلوة، العبي رياضة بليل، وكبل ما تنامين ركعتين قيام سريعة وكوليلي شنو النتيجة

يا ربي يزيح همج

*الخاتــــIraqi Ladyـــووون* يقول...

أشكركم يا أبو الحسن و يا زهرة ع الردود...
شنو زهورة جيتي علساس ده تخففين عليَّ، مو جنج سودتيها بوجهي و ظلمتيها علي أكثر ههههههه..
صحيح أبو الحسن آني هم صار بي لعبان نفس، يعني حتى من أكلت صراصير ما حسيت بهيجي لعبان نفس..
بس فعلاً ورا ما صحيت من هالصدمة أحس نفسي أقوى من قبل، و دا أشكر الله تعالى إنه كشف لي وجوه و نزع أقنعة و عرفت منو أصدقائي و منو اللي جنت مخدوعة بيهم..

شكراً أبو الحسن على هالإقتراحات الخطيرة و جزاك الله خير

تقبلوا تحياتي