بكرمي الخاتوووووني الأسطوري ، سأسمح لكم بتصفح التي هي .. مدونتي
أرجو لكم وقتاً ممتعاً

الخميس، 9 يوليو 2009

إمتحان الآيلتس.. و يوم القيامة!

عاجبني اليوم أسولف لكم على الإمتحان مالي اللي سهرت علموده الليالي، و انشغلت بيه أيام، و حفظت يمكن مئات المفردات مال إنكليزي..
يعني يمكن عمري ما تعبت بامتحان بكد ما تعبت بالآيلتس، مو بس تعب قراية و هيجي، بس التفكير، يعني شهرين من التوتر، مقالات علمية على مفردات أكاديمية على الإصغاء على الإستخلاص من القطعة و و و ..

و جمالة الأستاذ بدال ما يطمنا يخوفنا
يخوفني.. إهيء إهيء


خلال الدراسة، جان يدربنا الأستاذ على الإجابة عن كل سؤال خلال وقت محدد، يعني القراءة مثلاً 40 دقيقة، و الكتابة 20، و الإصغاء 30 و هكذا، و جان كلش صعب على معظم الطلاب إنه يلحكون ع الوقت، و آني منهم..
فخلاني هالشي قلقة، كل شوية أفز من نومي، و شفت أحلام و منامات
فد حلم منهم علساس آني بالقاعة مال الإمتحان، و القاعة جانت كلش حلوة (و هذا عكس الواقع كما سيأتي لاحقاً)، و بيها أشجار و نباتات و طيور، و الأوراق مال الأسئلة هيجي مثل القصص مال أطفال، لمن فتحتها لكيت هيجي منظر طبيعي و ورد تخبل و طارت منه فراشات تجنن، و الكتابة تملخ.. ياي!
و جان السؤال يكول: أنظر إلى المربع الفارغ في الصفحة، أمامك دقيقتين لقراءة السؤال! أشو انتظرت دقيقتين جان تطلع من المربع هيجي ورود و طار عصفورين و نبع السؤال.. حدثتني نفسي :
"هذولة الإنكليز من صدك فيكة"
بس شنو السؤال؟ فزيت من النوم و طار السؤال.. حرامات!!
هاي لازم الأستاذ جان يعرف شدا أحلم.. شكيد شرير
المهم.. لا أخفيكم فرفشتي و نعنشتي، و كلت هاي هي، شكلي حتونس بالقاعة، و خل أروح و أدرس بدون ما يظل بالي و أقلق

رحت على الكتب حتى أقرا، و لكن فجأة و آني ماشية... خطرت ببالي خاطرة مفزعة
خاطرة بدأت تبعدني عن أوراق الدراسة في الوقت الذي كنت أحاول فيه أن أقترب من أوراق الدراسة..
و كلما أمسك أوراق الدراسة تجي و تشوشني و تزيدني رعباً على رعبتي، و خرعةً على خرعتي!
الخاطرة ببساطة.. يوم القيامة
إذا آني هسة هالكد خايفة من الإمتحان، لعد يوم القياسة شحسوي؟!


هاي أولها أمتحان الآيلتس، و الثانية يوم القيامة.. إنتوا شايفين الأستاذ شكيد شرير؟

و بدأت أتخيل الموقف الذي سيسقط فيه (ماء وجهي) أمطاراً، و سيؤدي لخربطة شنيعة لبريستيجي
بدأت الذنوب و المقالب اللي سويتها بحياتي كلها تظهر أمامي


فسودة الحسودة يوم القيامة رح تكتشف الطراقات اللي خليت حسون و الوِلد الوياه يشعلوها يم بيتها مما أدى لهرب بعض الحيوانات (الأليفة) و هرولتهم في أنحاء الشعبية
و أم هزيبر رح تكتشف إنه آني اللي قنعت الزرقاوي (تتذكروه؟) يختل ببيتها، مما أدى لمشاكل مع قوات الأمن و الشرطة
و أم رسول رح تكتشف إنه آني اللي كلت عليها ناصبية، و إنه آني المصورة اللي جانت تطك صور للحسين و العباس و تسربها للـ (عامة)
و عبودي رح يكتشف إنه آني السبب في تطفيش الغيرل فريند ماله و توبتها بعد أن حدثتها عن الموت وعذاب الآخرة(عرفت هذا عندي رؤيتي لها و هي تركض بالشارع و تصيح: "عاااااا إلحكوا لي، مخبلة تريد تموتني، عااا" و طبعاً خيتكم مو هينة.. يعني فهمت ما بين السطور!)
و سوسو رح تكتشف الأغراض المدسوسة لدراستي الحثيثة للغة الإنكليزية (رغبتي في التفلسف مثلها)
و سنيوة.. عااااا حتموتني موتة اللخ
ونوسااا حتكتشف النوايا الغير سليمة لما جنت أمكيج بيها و أدعي بأنها تشبه سندريلا، قصدي سندريلاااااا
و حسومي.. لا حسومي يراد له عشر ملائكة يفهموه يعني شنو يوم القيامة، فتجي سنيوة تضربه ضربة رجل واحد يفتهم بعدها شنو جانوا يقصدون..
أما الحجية.. حتروح تؤكد للناس الواكفين بالسره الوراني (خاف واحد بيهم ما سمع زين) إنَّ كل ما سمعوه كان صحيحاً و تضيف بأنه جان عدها سبق صحفي لكنها تكتمت رأفةً بحالي و منعاً من الوقوف بطريق نصيبي (على حد قولها)

ياللهول!

المهم قريت إمتحاني، و رحت من وكت الصبح، و أشوفلكم القاعة مال الإمتحان، بالضبط تشبه السجون، بس سجون ترتيب أوربي و (أو لالا) للأمانة، بالله عدينا لهم إياها
بس يجيبوا لي سجانات، قصدي يجيبوا لي مراقبات بهذا الحجم؟ و يا عيني على الملابس.. يا عيني ع اللي مستخسرين هذي الكتل اللحمية المسماة بـ (الكروش) أن لا تسحر أنظار الممتحنين!
بالله عوفونا من الريجيم و فوائد الريجيم، و عوفونا من الدين يأمر بالستر
هسة اللي أجسامهن مرتبة.. افتهمنا ليش لابسين ضيق
لكن اللي أجسامهم من الطراز اللي شفته يوم الإمتحان.. ليش لابسين ضيق؟؟ شديفرجونا بالضبط؟
هاي طبعاً عدا عن أخطاء في اختيار الملابس الملائمة و الألوان الملائمة، و كل الجرائم الشنيعة في عالم الأناقة..
كل هذا أشعرني بوجود حرارة من النوع الحار في رأسي، اصطدمت بالبرودة الشديدة للمكان و التي تسببت في انطفاء الحرارة اللي كلت لكم عليها، لأحس بعدها إنه آني تقريباً ثلجت من البرد
و عندما شفت إنه ورقة الأسئلة ما تشبه قصص الأطفال.. هنا أيها السادة، أدركت إنه آني ما رح أتونس بالقاعة..

الإمتحان طوَّل حوالي 3 ساعات
إهيء إهيء ..3 ساعات و هذولة الشريرين اللي لابسين هدوم شتوية يجمدون بينا، لكن الحمد لله آني قهرتهم كلهم و جاوبت زين، أو أتصور هيجي
أما بعد الإمتحان، فقد انطلقنا خارج القاعة و أول ما فعلناه آني و صديقاتي إنه رحنا ع الشمس، مو أقصد سافرنا ع الشمس، فالحكومة مانعة السفر إلى هناك، بس قصدي طلعنا بره.. و تدفينا.. الحمد لله كلشي عدى على خير، و إن شاء الله النتيجة تطلع زينة يااا رب

و يا رب، النتيجة يوم القيامة هم تطلع زينة إلي و لكل من يقرا مدونتي و كل العراقيين و المسلمين ياااا رب

تقبلوا تحياتي

هناك 12 تعليقًا:

Sandybelle يقول...

هلو الخاتون, شلونج؟ انشالله زينه, هههههههههه, بصراصحه غير؟ خربت ضحك, من الحلم, ليوم القيامه للامتحان, والله اشكرج جزيلا على هالبوست الحلو, ههههههههههههههههههههههههه
عشتي , ههههههههههههههههههه ومره لخ لتخيلين اي تفكير يحصر راسج من تقرين
ههههههههههههههههههههه
ديري بالج علنفسج

البرجوازي العراقي يقول...

عجبتني هاي مالت الحجية عدها سبق صحفي
يراد تسوين مقال كامل او تسوين
Link List
للمواقع اللي ضدج وتسميها القائمة السوداء هههههههههه

بس بالمناسبة اكو كلمة بعد اقوة من البرستيج وانتي تستخدمي بس متسمي شي.

اكو مسطلح اسمة
Conoisseur
كنواسور او اذا يعجبج تلفظيها بالفرنسي
كونواسور
ومعناها ذواقة يعني اني اعتقد انتي كونواسور لان حجيتي عن تناسق الالوان مال الملابس للسجانات وعدم اهتمامهم بتخفيف وزنهم المهم

اقترح تسوين مقال كامل عن لو انتي تحولتي الى الس في بلاد العجائب بس على الطريقة الخاتونية هههههههه

وهاي افتهمنة يعني شنو ناصبية زين العامة منو هههههههه

وبالمناسبة هذه الزرقاوي صار قديم هسه احجي عن هذا الدَعّي المصري اللي يسمي نفسة بغـــــــــــــــدادي هم انتي ختلتي بسطلة الزبل اللي براس الفرع مالتكم؟؟


الحمد لله على السلامة...فرحتينا برجعتج.

البرجوازي العراقي
http://birjwazi.blogspot.com

*الخاتــــIraqi Ladyـــووون* يقول...

تدري خوش فكرة مال ألس في بلاد العجائب، رح أفكر بيها..

يتدلل وين يريد أختله؟ أبيع وطني مثل بعض ناس و أكعد أختل مثل هالأشكال.. بس هي أم هزيبر مستاهلة (إقرا مدوناتي السابقة و حتعرف ليش)..

العامة تعبير يستخدمه (بعض) الشيعة لوصف المسلمين من غير الشيعة، يعني كأنه غيرهم العامة و هم الخاصة، مثل قصة شعب الله المختار و شعوب العالم الثانية اللي عند اليهود..

*الخاتــــIraqi Ladyـــووون* يقول...

ساندي بيل، آني أشكرج على تشريفج مدونتي المتواضعة، الله يخليج يا رب

تقبلوا تحياتي

البرجوازي العراقي يقول...

لاء خاتون قضية العامة مو هيج بالضبط
اني فديوم حبيت طالبة وياية بالجامعة وردت اتقدملها فرحت عليها وهيه تعرفني يعني اكو بيناتنا كلام بس مو حب بس معرفة المهم رحت وكلتلها اني احبج واريدج وتنطين خبر لاهلج انهو اني اريدج يعني لو اي لو لا...
اجيت ورة اسبوع فلكيتها ممقررة اي شي وخجلت وكعت اللفكس والاوراق بالكاع وطشتها المهم اني النوب رحت على اخوها وكتله اريد اتقدم لاختك ورجعت وره اسبوع وكلي هيه تريد تدرس ومتريد ترتبط هسه يعني بوري واني انقهرت المهم مربط الفرس وين؟؟؟

عندي واحد من اصدقائي كان متدين كلي انت مو من السادة وهاي البنية علوية يعني انت من العامة وهيه علوية فكتلة زين عندي بيبيتي ام امي علوية فكال:

لعد انت يمكن نعتبرك
غروي
ههههههههههههههههههه
المهم اللي اكتشفته انهو اكو تقسيم ثلاثي متكون من تلث طبقات من الاعلى للاسفل وهي

السادة يعني اذا سيد او علوية
واللي يسمو بالاردن من الدوحة الهاشمية
والغروي لاسيكوتين احسن
والعامة

ف رحت على ابوية وكتله شنو هاي التفرقة يعني شنو احنا طبقات موكلنا سواسية عند الله فكلي اسكت انت متفتهم
الله وصانه باهل بيت النبي

اما قضية اليهود فهمه تلث انواع اذا عجبج تعرفين يعني همه
اشكينازي يعني غربي من اشكيناز يعني غرب وهذولة اليهود الاوربيين عدا من ايبيريا يعني اسبانيا او البرتغال

وسفردي يعني جاي من اسبانيا
ومزراحي يعني اصلة من الشرق الاوسط يعني عراقي ايراني هندي مصري مغربي يمني كيفج اي دولة بالشرق الاوسط او اسيا

المهم عاشت ايدح وانتي
عراقية اصيلة
لا ناصبية ولا رافضية
ولا غروية ولا عامية ولا علوية
ولا سيكوتينية

احنا عراقيين وبس والعراق هو الشرف
واعلى شرف هم بعد

البرجوازي العراقي
http://birjwazi.blogspot.com

Khalid from iraqiblogupdates.blogspot.com/ يقول...

الذي يقرأ اخيراً يضحك كثيراً ولاانسى ان اهنئك مرة اخرى على اتمام الامتحانات

يبدو ان الاخت ساندي توزع الفرح اينما تذهب باالرغم من الحزن الذي نثرته مقالتها الانكلو عربية الاخيرة

اما الاخ الفاضل البرجوازي العراقي فهو لايمل من الفرفرة وتفقد الاحبة العراقيين

اما انت ياخاتون فلك مني التقدير والاحترام

*الخاتــــIraqi Ladyـــووون* يقول...

يا برجوازي، كل حجاية و كالوا آل البيت و آل البيت، و كل شي لزكوا آل البيت بالنص، هسة آني علوية و من آل البيت و جدي الحسين (رضي الله عنه) يعني رح يشوفوا لي غير شوفة الجماعة؟ صدكني آني هم بنظرهم مو بس من العامة، و ناصبية..

يعني إحنا كلنا ميتين ميتين، ما رح ناخذ ويانا بالكبر لا حسب و نسب و حتى وجهنا رح ياكله الدود، ما رح ناخذ ويانا غير خركة، و لما نوكف كدام رب العالمين يوم القيامة ما رح يفيد واحدنا غير عمله و بس، يعني ما حد حيشفع لأحد و لا أحد يشيل خطية أحد..

و إذا هم معتبرين هالشي من الإسلام، الإسلام أصلاً جاي يحارب هالتفرقة و يرسخ فكرة إنه الناس كلهم سواء كدام رب العالمين و ما يتفاضلون إلا بأعمالهم..

وهذولة اللي شايفين روحهم على حسبة آل البيت و مو آل البيت، بيهم خير خلي هم يصيرون مثل آل البيت بأخلاقهم و تقواهم.. و خلوا الطبق مستور يعني..

أتشرف بقراءتك لموضوع (أكل الحشرات) الموجود ضمن قائمة (طائفية) و اعتقد إنه متصل بموضوع نقاشنا..

بالنسبة لليهود.. شكراً على المعلومات، و لو آني أعرفها لأنه أقرا أحياناً كتب بهالموضوع..

*الخاتــــIraqi Ladyـــووون* يقول...

أهلاً بيك يا خالد، تشرفت بزيارتك و تعليقك

تقبل تحياتي

البرجوازي العراقي يقول...

عندي مقترحات جديدة خاتونية..

شنو رايج بالهنود اللي يعتقدون اكو ثنين عفاريت واحد اسمه راهو واللاخ اسمة كيتو يلفطون الشمس فيصير كسوف ويحرم عليهم الاكل والماي الا اذا تطلع؟

خاتون ممكن تسوين حلقة كاملة عن ستار اكادمي واخرى عن الابراج يعني تكدرين مثلا تفهمينا انتي برجج شنو وبرج سودة الحسودة وام رسول وهكذا ...

وشنو رايج بالنزول على القمر او المريخ يعني في سبيل واحد يتمشى بدل ما يتمشى بسوك الحميدية؟

وشنو رايج بشذى حسون؟ اكتشفت انهو هاي اكثر النسوان تكرهها بس اني احبها

وشنو رايج بالمقام العراقي؟

وشنو رايج بالسباحة باللاذقية واستخدام الــ
JetSki
اللي يسمو العراقيين جسكي يعني مثل ما سمو الجويستك جوستك؟؟

واخر سؤال سياسي شوية شنو رايج لو عرضت عليج الحكومة العراقية منصب وزيرة حقوق وشؤون الحرمة قصدي المرأة؟


هاهية شوفي اي سؤال من هاي اذا ينفع واذا ميفيدن خلي يولن!

*الخاتــــIraqi Ladyـــووون* يقول...

D:
تعبتك ويايه برجوازي

عموماً أشكرك على الإقتراحات و تقبل تحياتي.

البرجوازي العراقي يقول...

انتي ناصبية قصدي يعني تنصبين من النصب يعني مثلا تنصبين على عالم يعني تضحكين عليهم واحتمال نصبتي عليهم وسموج هيج واكو احتمال اخر احتمال تنصبين ستلايتات ابو الماطور واكو ابو الشخاطة يعني مالها علاقة بالخريط مالت الطائفية!!

IRAQI SPIRIT يقول...

تحياتي القلبية محملة بالروح العراقية ونسيم دجلة الذي أصبح "مائه غورا" سيدتي أتوجه بالشكر للاستاذ البرجوازي الذي لولاه لما أطلعت على كتابات الخاتون وغيرها من المدونات الرائعة،وشكرا لانامل الخاتون التي سطرت المقاربةالجميلة بين شدة يوم الامتحان وهول يوم القيامة وهذا أن دل على شيء فيدل على عمق الوعي الثقافي والايمان العميق بالعقيدة ،والتي نظهر نوعا من التجانس الدنيوي والديني للسيدة الخاتون في كتابتها. أتمنى أن أتمكن من فرأة جميع ماتكتبون يأ صدقاء السيد البرجوازي.
تمنايتي لك بالتقدم دائما في الدين والدنيا