بكرمي الخاتوووووني الأسطوري ، سأسمح لكم بتصفح التي هي .. مدونتي
أرجو لكم وقتاً ممتعاً

الأحد، 13 يوليو 2008

أكل الحشرااات (يم يم)


جنا كاعدين آني و سودة الحسودة و الحجية سليمة و أم رسول نسولف بالدنيا و أحوالها، و جانت أم رسول تحجي بفخر و اعتزاز على إبنها اللي بالحوزة العلمية (فد حوزة علمية ما عليكم يا هيَّ) و شلون صار المتحدث الرسمي بإسم آية الله فلان الفلانستاني، و آني شلون اكيف على هيجي مواضبع:
فدوة لعينج يا حوزة يا علمية يا ناطق رسمي؟ قابل هم شنو حتى يصير عدهم ناطق رسمي؟ كل واحد حط عمامة و لبس محبس صاير يحجي بدين و دنيا؟؟
بدا واضحاً إنه أم رسول ضاجت خصوصاً لما سمعت منها صيحة مدوية:

شنووووووووووووووووو؟!!!
إنتي منو حتى تحجين ع السادة؟ أي يحجون دين و دنيا و كل شي، إحنا عمايمنا هيبة و كلمتهم لو على أرواحنا تمشي و إذا ما يعجبج طكي راسج بالحايط
أهوو هاي سوتها صدك... بعدين آني مو كايلة كله و لا راسي؟؟
و ليش لو على ارواحكم تمشي؟ شنو ما عدكم عقل حتى ياهو الجاي يمشيكم؟ و بعدين كلمة يا سيد بيهم ح تمشي؟ فلان الفلانستاني لو علان العلنستاني؟ أشو عدكم مية واحد كلمته لازم تمشي، و كلهم حرامية و مجرمين
آني هم مبين عليَّ ضجت، مو بالله؟
خاتون.. هذولة أحفاد الرسول و ما يصير تقولين عليهم حرامية و مجرمين..
لعد شكول عليهم؟
إذا قصدج فلوسهم فهمَّ أحفاد الرسول عليه الصلاة و السلام
أم رسول، الرسول عليه الصلاة و السلام جان ينام ع الحصيرة، و بعدين آني هم حفيدة الرسول (عليه الصلاة و السلام) و هم جدي الحسين بن علي (رضي الله عنه) يعني هم تمشي كلمتي عليكم؟
سودة الحسودة من يمها:
إي هسة جماعة التوافق هم مخششين روحهم بهالشغلات..

وهاي شكو بالنص؟؟ عموماً اجبتها:
و آني خما زكيتهم و قلت عفية عليهم
استطردت أم رسول:
إي عفية أشو ما تحجين على ذولة عيني؟ إحنا فلان الفلانستاني مالنا ما عليه بالسياسة، بس معتكف ببيته و يكول إذا عندكم سؤال بالدين تعالوا بس بالسياسة ما عليَّ
لعد ليش جايب إبنج مخليه ناطق رسمي؟ و بعدين أشو الفلانستاني مالكم يختل يختل و بعدين يطلع له بتصريح سياسي، و هم ما ادري منو يخوفه و يرد يختل
شحلوة إنتي، يعني إنتوا شتفتهمون بهالشغلات؟ أصلاً إنتوا ما تعرفون غير رعي الأبقار و صيد الذباب، و تلاث أرباعكم مو عراقيين أصلاً
أشو هاي كامت تغلط؟ شنو ذباب؟ آني مو غيري أصيد ذبان و أرعى بقر؟؟ و بعدين أكيد لما الواحد ده يصيد ذبان رح ياكله، يعني آني آكل ذبان؟ إنتوا صحيح أخواننا الشيعة، بس آني كله و لا برستيجي.. و بينما آني أباوع على أم رسول بحقد، سودة الحسودة من يمها:
خاتون يعني إنتي هسة أصلج من أكلة الذباب؟!
أم رسول كيفت:
أي عيوني توج تعرفين؟ أي داده، و إنتي هم أصلاً شكلج مو عراقية
مسألة المو عراقية ممكن تكون شي زين أو مو زين حسب الظروف، و عموماً ح اشوف شنو قصة المو عراقية هذي بعدين ويا أمي و أبوي!!
بس آني هسة بريستجي يكول لازم أبيع وطنيات:
مو عراقيين؟ لعد إنتوا مو هم تلاث أرباعكم من إيران؟؟
قاطعتني سودة الحسودة موجهة الكلام لأم رسول
و منو قال إنتوا ما تاكلون ذبان؟
إي صدك، لازم أدور بالتاريخ العائلي مالكم أكيد تطلعون كلكم ماكلين ذبان

أغارت قوات أم رسول عليَّ و قصفت بالمدفعية الثقيلة (ما عليكم بشنو قصفت) و آني هم رديت النيران الأخوية بنيران أخوية مضادة، و تصاعد الخلاف و اختلط حابلي بنابل أم رسول، و هرعت سودة الحسودة و الحجية سليمة لفك الخلاف بين الأخوين غير الشقيقين..
.
.
كعدوني اثنينهم على القنفة بعد تلك الجولة، و كاموا يهفوا لي لأني كنت أحس بالإشتعال
سودة الحسودة كالت لي:
ما عليج منها خل تولي، هو آني صحيح مكانج ما جنت حكعد، جنت حنطيها ضربة على بطنها تعرفها مقامها، بس يلا إنتي الظاهر مو كوية
هو آني جنت مشتعلة بس ورا هالحجاية فحمت:
إي هي اصلاً قليل بيها الضربة على بطنها، كاعدة ببيوت الناس و تسب بيهم!
ثم قامت من عندي و ذهبت إلى أم رسول و آني متأكدة كالت لها نفس الشي، لأنه من الواضح إنه ام رسول جانت تحد سنونها.
لكن الحجية سليمة حاولت تهديني كالت:

يلا خاتون هدي يمعودة الدنيا ما تسوه، و مثل ما يكول المثل: لا الولد ينسى ابنه و لا الحية تنسى ذيلها
و شنو معنى هالمثل؟
معناها الواحد ما ينسى الأذية بس لأنه يخاف يعلسوه فلازم ينساها ..
ثمًّ أضافت و أسنانها مطبقة: يولي هاي عدها كرايب بجيش المهدي هسة يسوون بيج سواية.
و لو هم ما افتهمت، قلت لها:
زين ليش مرات لما تحجين سنونج ينطبكن؟
.
.
المهم، كنت عازمة على البحث في تاريخ عائلتي و عائلة أم رسول عن أكلي ذباب أو أي نوع من الحشرات، لكن في هذه اللحظات جانت أعصابي فايرة من ورا هالأم رسول هذي.. شربت ماي شويونة و بعدين اشتهيت آكل زيت و زعتر (أكلة ملائمة لكل الأوقات و أهم عنصر في البريستيج مالي) فجبت القوطية مال الزعتر و صبيت فوقاها زيت زيتون و جبت وياهن خبز، أي و الله نعمة فضيلة، شحاطي له هالمرة بالله؟؟
هممممممم
ألقيت نظرة على الزعتر فرأيت فيه أشياء مدعبلة و بلون بني، و موجودة بالقوطية هماتين،هاي شنو هاي؟
أشو هذي ده تمشي و ده تسبح!!!
؟؟؟؟؟؟؟؟؟
صدمة دامت لثوانٍ
.
.
عااااااااااااااااااااااااااااا !!!!!

و هرعت إلى المغسلة ذبيت كل اللي بحلكي، و حاولت أزوع نفسي (تكرمون) لكن يؤسفني إخباركم إنه ما قدرت
قعدت بالصالة أولول :
أويلي عليج خاتون، أويييلي عليج و على شبابج!! تاليها تاكلين سراسير.. إهيء إهيء إهيء
و آني أصلاً ام دميعة ما صدكت ألكى حجة حتى أطكها بجيه.
و جلست أتخيلهن يسبحن و يتجولن في بطني و داخل أحشائي.. و كل اللي صار بجفة و أم رسول و سودة الحسودة و هن يذبن لي بسامير و يضحكن بجفة:
ها خاتون، طلعتي تاكلين حشراااات؟؟ يا عينيييي جان قلتي لي أعزم تيموون و بومبا ياكلون وياج
و كانت هذه أيها السادة أوَّل مرة أكره بيها تيمون و بومبا
يلا عوافي عليج كله بروتييين، صحة!
إهيء إهيء إهيء و هاي شفهمها بالبروتين
أشو بالله باوعي عليَّ؟ يمكن ده تنكلبين مرداانة... بس مردانة جابين عليها كلوور خخخخخخخ
و جان بإيد سودة الحسودة بسكت جان قالت لي:
تعاي أكلي لج بسكتاية، مو صراصيرج هسة تلقيهم جواااعة..

و يا شماتة أبلة ظاظا فيَّ ... أبلة ظاظا مين؟؟
.
.
بعد أن هدأت نفسي و صراصيري اللي خليتهم جواعة على عنادهم، قمت أمخمخ شغلة الذبان هذي براسي، و بدأت أسولف ويا نفسي

يعني معقوولة أم رسوول تووصل بيها المواصيل إنه تتشاقه وياي هذا الشقة الأخوي مالها و تحط لي جم صرصور بالزعتر؟؟؟
لا لا ما معقولة، هي شمدريها آني رح آكل زعتر؟
زين، إذا آني أكلت صراصير، بعيدة يكون واحد من جدودي جان ياكل ذبان؟؟ يعني بعيدة نكون أكلة لحوم الحشرات بالوراثة؟ و بعدين ليش ما قدرت اذبه من راسي؟

.........

كما تلاحظون أيها السادة، فإنَّ دور الحجية سليمة طوال القصة كان الصمت، و لكن بعد هذه الحادثة صرحت بأنَّ (البيوت أسرار) و أنَّ أهل البيت حتى لو كتلوا روحهم فلا يجب أن يتعدى دور الجيران معرفة هذه( الأسرار) و إنَّ فك الخلاف و التهدئة زحمة شوية.. لم تصرح بأنها ستنشر الخبر في كل انحاء المنطقة و لكني متأكدة إنها ستفعل..
أما سودة الحسودة فهي أساساً من وضع الصراصير في الزعتر، و كيف عرفت إني سآكل الزعتر فهذا سؤال تستطيع وحدها الإجابة عليه..
أما دورها في القصة كان واضحاً كما رأيتم جميعاً..

هناك 11 تعليقًا:

Ali Yaseen يقول...

ههههههههههههههههه طبعا هي الكتلة لا بسودة الحسودة ولا بأم رسول وانما الكتلة الصحيح بذيج ام راس الواكف حجية سليمة كل البلة من وراها، وتاليتهة تطلع رويتر ما تخلي شي بكلبهة نقل حي للجيران.
بس لازم خاتون تعيدين النظر بموضوع اكل الحشرات لان للعلم ترة العرب سابقا كانوا ياكلون " الجراد" ويقال انه طعمه كلش طيب ويشبه الروبيان، فاحتمال كلنة جنة نكردش خنافس وعلى كولتج كله برويتن وجنة مال الله.

ممنون ولا تكطعين فترة طويلة ترة صار عندي ادمان على المدونة الحلوة هاي" واني كلشي ولا ادماني"

Ali Yaseen يقول...

صدك لفت انتباهي شي مهم هو انه الفلنتستوني او الفلنتستاني يخنس يخنس وبعدين كلسع واحد يفوت عليه ويطلع يكول : صرح الفلنتستاني ان ال....ويتضمن الكلام كوارث اسوأ من تسونامي، بس على كولتج ما اعرف من يخوفة ويرد يخنس تكولين زلنطح طاب طالع.
النقطة الثانية هي قولج"و بعدين آني هم حفيدة الرسول (عليه الصلاة و السلام) و هم جدي الحسين بن علي (رضي الله عنه)" ها ي الجملة ترة ما يشتروهة بعانة مع احترامي للاصل اللي ترجعيلة اللي هو نفس مرجعي، لكن "بعض الناس" يطعنون بهذا النسب ويقولون انتو "لفو" على هذا النسب الحسيني الشريف بس الوضع جان غير وضع ولزكتو نفسكم بينة ...(علساس هي الناس بالانساب)

*الخاتــــIraqi Ladyـــووون* يقول...

أعيد النظر شنو؟! تريدني آكل بعد صراصير مو كافي عاااد إهيء إهيء..
و شنو هذا اللي مثل الروبيان؟ ما ادري أبو الحسن ما ماكلته آني حتى أكولك.
بس هو صحيح جانوا ياكلون الجراد و حتى شرعاً الجراد مو حرام، و القاعدة الشرعية تكول: كل ما يستقذره العرب في أيام رخاءهم فهو حرام.
بالنسبة للإدمان مالك فالله يساعدك و يساعد كل مدمن على مدونتي (هم منو؟ أشو بس إنت تحجي كلهم يدخلون و ما يحجون).
و بالنسبة للنسب، ما افتهمت قصة الـ (لفو) هذي، يا ريت توضح أكثر..

Ali Yaseen يقول...

(لفو)بلهجة العشائر والعربان والبدو تعني: فلان يلفي على فلان عشيرة اي بمعنى انه لا ينتمي لها وانما جاء لسبب اما لانه مطلوب دم ف(يلفي)يمهم او انه لصق نفسه ب(ايبوكسي) على العشيرة الفلانية كي يحصل على الشرف والسطوة وكما في التراث العربي(اذا ضاع اصلك كول عبيدي او جبوري على اختلاف الروايات.
فالعديد من الناس يعتبرون العشائر التي تدعي نسبها الحسيني والذين هم من بغداد وانت صاعدة الى حد دهوك وشمال العراق يعتبرهم كاذبين بشان هذا النسب وانما هم (لفو)عليه. ولكن طبعا ثبت بالدليل العملي (كلاوات) مزاعمهم وطلعت فعلا اكو عشائر حسينية وحسنية بوسط العراق مثل صلاح الدين وحتى المنطقة الغربية والموصل.
وينراد فد يوم نجرب الجراد بس ما اعرف وين يبيعوا، اكيد اكو ب(سبينيس.
وبللة بس ملاحظة: شبيهم شكول الشارجة ترة والله احلى من دبي واهدأ والطف وارخص حتى عجمان هسة بادية تصير الى حد ما زينة، دبي عبارة عن هوسة 24 ساعة هذا رأيي والله من وراء القصد

*الخاتــــIraqi Ladyـــووون* يقول...

أي شكراً ع الشرح يا استاذ أبو الحسن، هاي معلومة قيمة تضاف إلى معلوماتي القيمة..
آني الحمد لله من عشيرة معروفة و أخوالي شيوخ العشيرة و ما محتاجة أسوي اللي يكولون عليه (لفو)..

تقبل تحياتي

غير معرف يقول...

ههههههههههههه والله يا خاتون


حلوة القصة وللمعلومات ( يعني للناس الي ميعرفون خاتون زين ) تره هي صدك مرة أكلت زعتر بيه حشرات وقامت تبجي بعدين ( تسوي نفسها مجانت تدري انو بيه حشرات p-: ) مع إنه الظاهر ( وحسب مفتهمت من القصة ) إنو عادة أكل الحشرات متأصلة بعائلتها

المهم عاشت إيدج على المدونة واني تره من المتابعين بس مدا أعلق وانتي تعرفين طبعا انو اني ( سكوتية ) عشتو يعني أخزي العين على قولة أهل الشام

ونصيحتي تشدون حيلكم انتي وابو الحسن وتسوون دعاية ( جامدة جدا ) لمدوناتكم حتى تصير بيها حركة شوية


أطيب تحية ...

* رابعة العدوية *

غير معرف يقول...

خاتووووون مدونتج رائعة

اسلوبج حلو جداً

وهسه اتعرفنا على مدونة ابو الحسن همين

ونروح نقرأ بيها

اهم شي الفلانتستاني

غير معتكفين هاي شبيج

Ali Yaseen يقول...

طبعا اني كلش متونس وكشرتي هل كبر صارت من دا اقرة الزيارات اللي على الرغم من كونها قليلة لكن صدك حلوة وتونس، بس اللي ضحكني اكثر هو انه الخاتون طلعت صدك تاكل حشرات ههههههههههههههههههههههههههه، هو الموضوع عادي اذا خطية اسد تعلم ياكل حشرات اذا تتذكوه لاخونا سيمبا...زين هسة نجي للموضوع اللاخ اللي طرحتة الاخت "غير معرف" " وانتي تعرفين طبعا انو اني ( سكوتية ) عشتو يعني أخزي العين على قولة أهل الشام"، يمعودة على بختج ترة حرام اذا احد مكلب مدوناتنة كبلج فالله يخليج بس عن العين ادخلي يومية وذبي تعليق حتى لو باسماء مختلفة ووصية اخرة من تدخلين ضلي سوي ريفريش حتى يزداد عدنا مؤشر الزيارات شوية نكخش بيه بنص العالم هههههههههههههههه
والاخ العراقي تشرفنا بأي وقت وانت هم يمعود دير بالك تلبس مدونتي ترة ازعل وعلى كولة خاتون اني كلشي ولا ازعل.
وخاتون والنعم منج ومن عشيرتج(ولو اني ما اعرفهة يا عشيرة بس مع ذلك كتابتج مبينة انت من اصل طيب)ممنون

*الخاتــــIraqi Ladyـــووون* يقول...

هسة هذا هم إسم تختاريه؟ رابعة العدوية؟
يعني شلون بالله إذا الواحد يريد يرزلج لو يحجي عليج شيسوي؟
لوما آني أعرفج زيييين جان كلت هاي من جماعة أخوتنا اللي دازتهم أم رسوول، بس آآخ شكول..
آني أكلت حشرات، و حتى أبو الحسن شخصياً شمت بيَّ (إهيء إهيء)
عموماً أشكركم كلكم ع المرور، العراقي و رابعة و أبو الحسن..
و بما إنه آني هسة أسد، منا و غادي كلمن ما يعلق رح أزأر (و إنتوا ما تعرفون لما أزأر شيصير!)

تقبلوا تحياتي

البرجوازي العراقي يقول...

خاتون ماعتقد احد خال شي بالزعتر المشكلة هي بترك الزعتر ما مغطة على اساس انهو شي يابس ميتلف فتجي بي اشكال حشرات لان هذي الحشرات تجي على شي تختل بي وخاصة اذا كان نباتي او خشبي ...

والقضية الثانية هي قضية العلوية تشور يعني اذا ياذوج تصير بيهم لعنة يعني مو مهم انتي بالاصل شيعية لو سنية او مثلي علمانية المهم انتي علوية وهذولة لازم تلقين الرعب في داخلهم لان حسب عقلهم انتي لازم تشورين بيهم اذا يتناقشون وياج يعني همه شنو لو عامة لو غرويين لو سيكوتين لو سادة ههههههه

استخدمي هذا السلاح ايضا ههه

تمنياتي بالتوفيق ويعجبني اسلوبج بالنقاش لان يستند للعقل ويلوك الدلال للعراقية يعني الشي اللي انتي تسمي برستيج وكتلج اكو بعد كناسور
Conoiseur
المهم انتي كناسور مو بس برستيج يعني تعرفين بالالوان والترتيب هذا اللي شفته بالمدونة مالتج واقترح فديوم تحجينا عن العطور والالوان والورود اللي تعجبج يعني اي شي بي برستيج.

واقترح تسوين مقال تعريفي تشرحين بي العناصر مثل سودة الحسودة وام رسول وكل هاذي المخلوقات يعني تحلل كل شخصية وتوجها الفكري يعني تفلسيها بمقالة خاصة مرجعية حلوة مالت مرجعية مو؟!

وتخليها للمقالة علة صفحة بالمدونة يعنني اما تخلين الرابط مالتها على صفحة فيكون مرجعا وفهرسا لنا لكي نستطيع تفهم شخصيات المسرح الذي تعريضينة هنا ...

تمنياتي بالتوفيق وشكرا لاقتراحك بان اقرا هذا المقال لان عجبني وبل مناسبة من رحت للاذقية اخر مرة بالشاطيء الازرق اكلت هذه الخبز الي يسوو فد تلث انواع يشبه اللحم بعجين بس اني اكلته بالزعتر يعني تقترحين انهو اني هم صرت من أكلة الـــ ......!!!!

*الخاتــــIraqi Ladyـــووون* يقول...

وداعتك جان الزعتر بقوطية، بس هيجي صار قدر ههههه..

حلو اقتراحك مال العطور و الألوان و الورود، بس آني مو مخصصة المدونة لهالأمور، و ثاني شغلة آني ما عندي معرفة بالزهور..و يعني أحب الأناقة، بس مو كلش عندي اهتمام بالمودة و شنو آخر مودة، لأن تدري أكو أشياء بالدنيا أهم، و بعدين مو شرط تكون المودة تناسبني..

و بالنسبة لاقتراح إنه أعرف بالشخصيات، آني أعتذر عن تنفيذ هذا الإقتراح، تدري ليش؟
أول شي، أريد القاريء الكريم هو يفهم قصدي
ثاني شي، مو كل الفرق ترضى بالتسمية اللي تتسمى بيها، فآني ما أريد أدخل بجدال حول التسمية و اتهم بالتهجم على الطوائف الأخرى
ثالث شي، أريد أبين الموضوع على إنه كلنا عراقيين و أسامينا عراقية قبل ما نتسمى أي شي ثاني..

عموماً جزاك الله خير عالقراءة و التعليق، و الاقتراحات

تقبل تحياتي